ବରଗଡ,୯।୨(ପ୍ରେମାନନ୍ଦ ଖମାରୀ) : ବରଗଡ ବିକାଶ କ୍ରିକେଟ ଗ୍ରାଉଣ୍ଡରେ ଓଡ଼ିଶା ଦଳ ଓ ବେଙ୍ଗଲ ଦଳ ମଧ୍ୟରେ ଚାଲିଥିବା ସି.କେ ନାଇଡୁ ଟ୍ରଫିର ଇଲାଇଟ ଗ୍ରୁପ-ବିର ମ୍ୟାଚରେ ସୋମବାର ଚତୁର୍ଥ ତଥା ଅନ୍ତିମ ଦିବସରେ ବେଙ୍ଗଲ ଦଳ ଓଡ଼ିଶା ଦଳକୁ ୧୦୨ ରନରେ ହରାଇ ବିଜୟୀ ହୋଇଛି। ମ୍ୟାଚରୁ ବେଙ୍ଗଲ ଦଳ ୧୨ ପଏଣ୍ଟ ଲାଭ କରିଥିବା ବେଳେ ଓଡ଼ିଶା ଦଳକୁ ୬ ପଏଣ୍ଟ ମିଳିଛି। ନିଜର ଦିତୀୟ ଇନିଂସର ରବିବାର ଅସମାପ୍ତ ସ୍କୋର ୩୫/୩ ଉଇକେଟ୍ରୁ ସୋମବାର ସକାଳେ ଖେଳ ଆରମ୍ଭ କରି ବେଙ୍ଗଲ ଦଳ ୫୧ ଓଭରରେ ୯ ଉଇକେଟ୍ ହରାଇ ୨୭୧ରେ ପାଳି ସମାପ୍ତ ଘୋଷଣା କରି ଓଡ଼ିଶାକୁ ବ୍ୟାଟିଂ ପାଇଁ ଆହ୍ବାନ କରିଥିଲା । ବେଙ୍ଗଲ ପକ୍ଷରୁ ରବିବାର ଆୟୁଷ ସିଂ ୧୨୯ ରନ, ପ୍ରଭାତ ମୋର୍ଯ୍ୟଙ୍କ ୩୮ ରନ , ସୁମିତ ନାଗଙ୍କ ୨୭ ରନ ପରେ ସୋମବାର ସକାଳେ ଅଧିନାୟକ ଶଶାଙ୍କ ସିଂ ୨୭ ରନ, ସୁଖମିତ ସିଂ ୧୭ କରିଥିଲେ । ଅନ୍ୟ କୌଣସି ଖେଳାଳି ଦୁଇ ଅଙ୍କ ଛୁଇଁ ନଥିଲେ । ଫଳରେ ଦଳ ୯ ଉଇକେଟ୍ ବିନିମୟରେ ୨୭୧ ରନ କରି ପାଳି ସମାପ୍ତ ଘୋଷଣା କରିଥିଲେ। ଓଡ଼ିଶା ପକ୍ଷରୁ ଓମ ଟି ମୁଣ୍ଡେ ୨୫ରନ ବିନିମୟରେ ୫ ଉଇକେଟ୍ ନେଇଥିବାବେଳେ ସମ୍ବିତ ବରାଳ ୫୩ ରନ ବିନିମୟରେ ୩ ଉଇକେଟ୍, ବାଦଲ ବିଶାଳ ୯୧ ରନ ବିନିମୟରେ ୧ ଉଇକେଟ୍ ନେଇଥିଲେ। ଓଡ଼ିଶା ଦଳ ୨୯୪ ରନର ବିଜୟ ଲକ୍ଷ୍ୟ ନେଇ ପଡିଆକୁ ଓହ୍ଲାଇ ଥିଲା । ପ୍ରାରମ୍ଭିକ ଯୋଡ଼ି ଦିନେଶ ମାଝୀ ଏବଂ ଓମ ଟି ମୁଣ୍ଡେ ପ୍ରଥମ ଉଇକେଟ୍ ଯୋଡିରେ ୨୯ ରନ , ଦ୍ୱିତୀୟ ଯୋଡ଼ି ଓମ ଟି ମୁଣ୍ଡେ ଓ ଶ୍ରେୟନ୍ସ ଭରଦ୍ୱାଜ ୨୩ ପରନ, ତୃତୀୟ ଉଇକେଟ୍ ଯୋଡ଼ିରେ ଭରୱାଜ ଓ ସମ୍ବିତ ବରାଳ ୨୬ ରନ କରିଥିଲେ। ପାଖାପାଖି ସମସ୍ତ ବ୍ୟାଟ୍ସମ୍ୟାନ ବେପରୱା ମନୋଭାବରେ ଖେଳି ନିୟମିତ ବ୍ୟବଧାନରେ ଉଇକେଟ୍ ହରାଇ ବିଜୟର ସମସ୍ତ ସମ୍ଭାବନା ଥିବାବେଳେ ଶେଷରେ ୧୯୧ ରନ କରି ଅଲ ଆଉଟ ହୋଇ ୧୦୨ ରନରେ ପରାଜିତ ହୋଇଥିଲେ । ଓଡ଼ିଶା ଦଳର ଶ୍ରେୟନ୍ସ ଭରଦ୍ୱାଜ ସର୍ବାଧିକ ୪୦ ରନ କରିଥିବା ବେଳେ ସମ୍ବିତ ଜେନା ୩୧ ରନ କରିଥିଲେ । ପ୍ରତିପକ୍ଷ ବେଙ୍ଗଲ ଦଳ ପକ୍ଷରୁ ଈର୍ଷାଦ ଆଲମ ୭୧/ ୫ ଉଇକେଟ୍, ରୋହିତ ୬୧ ରନ ଡିନିମୟରେ ୫ ଉଇକେଟ୍ ନେଇଥିଲେ। ଏହି ମ୍ୟାଚର ସାରାଂଶ ଦେଖିବାକୁ ଗଲେ ବେଙ୍ଗଲ ଦଳର ଆୟୁଷ କୁମାର ସିଂ ଉଭୟ ଇନିଙ୍ଗସରେ ଶତକ ଯଥାକ୍ରମେ ୧୦୭ ରନ ଓ ୧୨୯ ରନ , ଈର୍ଷାଦ ଆଲମ ମ୍ୟାଚରେ ୧୦ ଉଇକେଟ୍ ଯଥାକ୍ରମେ ୯୭ରନ ବିନିମୟରେ ୫ ଉଇକେଟ୍ ଓ ୭୧ ରନ ବିନିମୟରେ ୫ ଉଇକେଟ୍ ନେଇଥିଲେ। ଦଳର ରୋହିତ ମ୍ୟାଚରେ ୬ ଉଇକେଟ୍ ନେଇଥିଲେ। ପ୍ରଥମ ଇନିଂଶରେ ୫୭ ରନ ଡିନିମୟରେ ୧ ଉଇକେଟ୍ ଦ୍ୱିତୀୟ ଇନିଂଶ ରେ ୬୧/୫ ଉଇକେଟ୍ ନେଇଥିଲେ । ସେହିପରି ଓଡ଼ିଶା ଦଳର ବାଦଲ ବିଶାଳ ମ୍ୟାଚରେ ୭ ଉଇକେଟ୍ ଯଥା ପ୍ରଥମ ଇନିଂସ ରେ ୯୩ ରନ ବିନିମୟରେ ୬ ୱିକେଟ, ଦ୍ୱିତୀୟ ଇନିଂସରେ ୯୧ ରନ ବିନିମୟରେ ୧ ଉଇକେଟ୍ ନେଇଥିଲେ । ସେହିପରି ଓମଟି ମୁଣ୍ଡେ ଦ୍ୱିତୀୟ ଇନିଂସରେ ୨୫ ରନ ବିନିମୟରେ ୫ ଉଇକେଟ୍ ନେଇଥିଲେ। ମ୍ୟାଚ ପରେ ଜିଲା କ୍ରିକେଟ ଏସୋସିଏଶନ ପକ୍ଷରୁ ପୂର୍ବତନ ଭାରତୀୟ ଖେଳାଳି ତଥା ବେଙ୍ଗଲ ଦଳର ଅନ୍ୟତମ କୋଚ ଉତ୍ପଳ ଚାଟାର୍ଜୀଙ୍କୁ ସ୍ମାରକୀ , ଉପାୟନ ଦେଇ ସମ୍ବର୍ଦ୍ଧିତ କରାଯାଇଥିଲା। ସେହିପରି ମ୍ୟାଚ ରେଫରୀ ଓ ଆମ୍ପାୟରମାନଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ଜିଲା କ୍ରିକେଟ ଏସୋସିଏଶନର ପ୍ରାକ୍ତନ ସଭାପତି ଅରୁଣ କୁମାର ମହାନ୍ତି,ପ୍ରାକ୍ତନ ଉପ-ସଭାପତି ପ୍ରଭାତାଦିତ୍ୟ ମିଶ୍ର, ପ୍ରାକ୍ତନ ସମ୍ପାଦକ ସୁବ୍ରତ ଚାଟାର୍ଜୀ, ସମ୍ପାଦକ ରବି ପଣ୍ଡା, କୋଷାଧ୍ୟକ୍ଷ ଅମିୟ ଭୂଷଣ ସାହୁ , ପ୍ରଦୀପ ନନ୍ଦ , ଗୁରୁଦତ୍ତ ଦାସ , ରଜତ ଦାଶଙ୍କ ସହ କ୍ରିଷ୍ଣା ବିକାଶ ସ୍କୁଲର କ୍ରୀଡା ଅଧିକାରୀ ପିତାମ୍ବର ପ୍ରଧାନ , କୋଚ ଅଶୋକ ସିଂ, ଆସିଷ୍ଟାଣ୍ଟ କୋଚ ରୂପକ ପ୍ରଧାନ ପ୍ରମୁଖ ଉପସ୍ଥିତ ଥିଲେ ।ଏହି ଖେଳକୁ ବିସିସିଆଇର ଅମ୍ପାୟାର ରଞ୍ଜୀବ ଶର୍ମା ଓ ଗଣେଶ ଚରହଟେ ପରିଚାଳନା କରିଥିବାବେଳେ ମ୍ୟାଚ ରେଫରି ଥିଲେ ଗୌରବ ବସିଷ୍ଟ । ବିସିସିଆଇ ପକ୍ଷରୁ ଅନ୍ଲାଇନ ସ୍କୋରର୍ ଥିଲେ ସି ଡି ସୁନିଲ ଓ ବୀରବର ନାୟକ, ସିନିୟର୍ ଭିଡିଓ ସାରଦା ପ୍ରସନ୍ନ ବିଶାଳ ଓ ଭିଡିଓ ଏନାଲିଷ୍ଟ ତାପସ କୁମାର ନାୟକ ରହିଥିଲେ । ଓଡ଼ିଶା ଦଳର ମୁଖ୍ୟ କୋଚ ପୂର୍ବତନ ରଣଜୀ ଖେଳାଳି ସୁବିତ ବିଶାଳ , ଆସିଷ୍ଟାଣ୍ଟ କୋଚ ପୂର୍ବତନ ରଣଜୀ ଖେଳାଳି ବିଭୁଦତ୍ତ ପଣ୍ଡା, ଫିଜିଓ ଦିନେଶ ସାହୁ, ଟ୍ରେନର୍ ମନୋଜ ବିଶ୍ୱାଳ, ଭିଡିଓ ଏନାଲିଷ୍ଟ ନବୀନ ବେହେରା, ସାଇଡ ଆର୍ମ ଥ୍ରୋଅର ଭାବରେ ଦିଲୀପ କୁମାର ଚନ୍ଦନ , ଦେବାଶିଷ ପ୍ରଧାନ ମେଶ୍ୟୁର ଥିବା ବେଳେ ସୋର୍ଯ୍ୟ ରଞ୍ଜନ ରୟ ମ୍ୟାନେଜର , ଅନିଲ କୁମାର ବିଶ୍ବାଳ ଆଡମିନ ମ୍ୟାନେଜର , ପୂର୍ବତନ ରଣଜୀ ଖେଳାଳୀ ଅବକାଶ ଖଟୁଆ ଚୟନ କର୍ତ୍ତା ଓ ଅନ୍ୟତମ ପୂର୍ବତନ ରଣଜୀ ଖେଳାଳୀ ସୁଭ୍ରଜିତ ସାହୁ ପର୍ଯ୍ୟବେକ୍ଷକ ଭାବରେ ଓଡ଼ିଶା ଦକରେ ରହିଥିଲେ । ସେହିପରି ବେଙ୍ଗଲ ଦଳର ମୁଖ୍ୟ କୋଚ ପୂର୍ବତନ ଆନ୍ତର୍ଜାତୀୟ ଖେଳାଳୀ ରିଦ୍ଧିମାନ ସାହା, ଆସିଷ୍ଟାଣ୍ଟ କୋଚ ଅଛନ୍ତି ପୂର୍ବତନ ଆନ୍ତର୍ଜାତୀୟ ଖେଳାଳୀ ଉତ୍ପଳ ଚାଟାର୍ଜୀ ଓ ଦେବବ୍ରତ ଦାସ, ଫିଜିଓ ଦୀପ୍ତି ରଞ୍ଜନ ପରିଡ଼ା, ଟ୍ରେନର୍ କପୂର୍ ଚନ୍ଦ ଅଗ୍ରୱାଲ , ଭିଡିଓ ଏନାଲିଷ୍ଟ ମୁକେଶ ସିହ୍ନା , ସାଇଡ ଆର୍ମ ଥ୍ରୋଅର ଭାବରେ ବିଶାଳ ଯାଦବ , ମୃଣାଳକାନ୍ତି ପଲ ମେଶ୍ୟୁର ଭାବରେ ଯୋଗଦେଇଥିଲେ ।
