ନୂଆଦିଲ୍ଲୀ,୨୬ା୨: NCERTର ଅଷ୍ଟମ ଶ୍ରେଣୀ ସାମାଜିକ ବିଜ୍ଞାନ ପାଠ୍ୟପୁସ୍ତକରେ ‘ନ୍ୟାୟପାଳିକାରେ ଦୁର୍ନୀତି’ ସଂକ୍ରାନ୍ତ ଅଧ୍ୟାୟ ସମ୍ପର୍କରେ ଗୁରୁବାର ଶୁଣାଣି ହୋଇଥିଲା। ମୁଖ୍ୟ ବିଚାରପତି ସୂର୍ଯ୍ୟକାନ୍ତ ଖୁବ୍ ରାଗି ଯାଇଥିଲେ। ସରକାରଙ୍କ ପ୍ରତିନିଧିତ୍ୱ କରୁଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଏହି ଭୁଲ ପାଇଁ ନିଃସର୍ତ୍ତ କ୍ଷମା ପ୍ରାର୍ଥନା କରିଥିଲେ, କିନ୍ତୁ ମୁଖ୍ୟ ବିଚାରପତି ସନ୍ତୁଷ୍ଟ ନ ଥିଲେ। ସେ କହିଥିଲେ ଯେ, ଏହା ଜାଣିଶୁଣି ଏବଂ ଯୋଜନାବଦ୍ଧ ଷଡ଼ଯନ୍ତ୍ର ଥିଲା। ପ୍ରକୃତ ଦୋଷୀମାନଙ୍କୁ ଖୋଜାଯିବା ଆବଶ୍ୟକ।
ସିଜେଆଇ ସୂର୍ଯ୍ୟକାନ୍ତ ବିଚାରପତି ଜୟମାଲ୍ୟ ବାଗଚି ଏବଂ ବିପୁଲ ଏମ. ପଞ୍ଚୌଲିଙ୍କୁ ନେଇ ଗଠିତ ଖଣ୍ଡପୀଠକୁ ଏସ୍ଜି ତୁଷାର ମେହେଟ୍ଟା କହିଥିଲେ ଯେ, ଦୁଇଜଣ ବ୍ୟକ୍ତି ଏହି ଅଧ୍ୟାୟ ପ୍ରସ୍ତୁତ କରିଥିଲେ ଏବଂ ଏହି ଭୁଲ ପାଇଁ ସେମାନଙ୍କୁ କେବେବି ୟୁଜିସି କିମ୍ବା ଅନ୍ୟ କୌଣସି ମନ୍ତ୍ରଣାଳୟରେ କାମ କରିବାକୁ ଅନୁମତି ଦିଆଯିବ ନାହିଁ। ସିଜେଆଇ ଏଥିରେ ମତଭେଦ ପ୍ରକାଶ କରି କହିଥିଲେ ଯେ, ସେମାନଙ୍କୁ ଦଣ୍ଡ ନ ଦେଇ ଛାଡ଼ିବା ସେମାନଙ୍କ ପାଇଁ ସହଜ ହେବ। ସେ ଆହୁରି ମଧ୍ୟ କହିଥିଲେ, ସେମାନେ ନ୍ୟାୟପାଳିକା ଉପରେ ଗୁଳି ଚଳାଇଥିଲେ ଯାହା ଆଜି ରକ୍ତପାତ ହେଉଥିଲା।
ଜାତୀୟ ଶୈକ୍ଷିକ ଗବେଷଣା ଓ ପ୍ରଶିକ୍ଷଣ ପରିଷଦ (ଏନ୍ସିଇଆର୍ଟି) ସୋମବାର ଜାରି କରିଥିବା ଅଷ୍ଟମ ଶ୍ରେଣୀ ସାମାଜିକ ବିଜ୍ଞାନ ପୁସ୍ତକର ଏକ ଅଧ୍ୟାୟକୁ ନେଇ ବିବାଦରେ ଫସିଛି। ନ୍ୟାୟପାଳିକାରେ ଦୁର୍ନୀତିର ଅବତାରଣା କରି ଉକ୍ତ ଅଧ୍ୟାୟର ନାମ ରଖାଯାଇଛି ‘କରପ୍ଶନ ଆଟ୍ ଭେରିଅସ୍ ଲେଭେଲ୍ସ ଅଫ୍ ଦି ଜୁଡିସିଆରି’। ଏଥିରେ ବିଭିନ୍ନ କାରଣରୁ ସୁପ୍ରିମକୋର୍ଟ ଓ ରାଜ୍ୟ ହାଇକୋର୍ଟଗୁଡ଼ିକରେ ଗଡ଼ୁଥିବା ମାମଲା ସଂଖ୍ୟା ବୃଦ୍ଧି ସମ୍ପର୍କରେ ମଧ୍ୟ ଉଲ୍ଲେଖ କରାଯାଇଛି। ନ୍ୟାୟପାଳିକାରେ ପର୍ଯ୍ୟାପ୍ତ ସଂଖ୍ୟକ ବିଚାରପତିଙ୍କ ଅଭାବ, ଜଟିଳ ଆଇନଗତ ପ୍ରକ୍ରିୟା ଏବଂ ଦୁର୍ବଳ ଭିତ୍ତିଭୂମି ଭଳି ଚ୍ୟାଲେଞ୍ଜର ସମ୍ମୁଖୀନ ହେଉଥିବାରୁ ଦେଶର ସର୍ବୋଚ୍ଚ ଓ ଉଚ୍ଚ ଅଦାଲତଗୁଡ଼ିକରେ ଏଭଳି ଅଚଳାବସ୍ଥା ଉପୁଜିଥିବା ଉକ୍ତ ପୁସ୍ତକରେ ଲେଖାଯାଇଛି। ପୁରୁଣା ପାଠ୍ୟପୁସ୍ତକରେ କେବଳ ନ୍ୟାୟପାଳିକାର ଭୂମିକା, ସ୍ବାଧୀନ ନ୍ୟାୟପାଳିକା, କୋର୍ଟଗୁଡ଼ିକର ଢାଞ୍ଚା ଓ ଉପଲବ୍ଧତା ସମ୍ପର୍କରେ ଅବତାରଣା କରାଯାଇଥିଲା। ସେଥିରେ ଦୁର୍ନୀତିକୁ ନେଇ କିଛି ଲେଖାଯାଇ ନ ଥିଲା। କିନ୍ତୁ ନୂଆ ବହିର ଏକ ପାରାଗ୍ରାଫ୍ରେ ଲେଖାଯାଇଛି, କୋର୍ଟଗୁଡ଼ିକ ଏକ ମାମଲାର ଶୁଣାଣି କରିବାକୁ ଅନେକ ବର୍ଷ ଲଗାଇ ଦେଉଛନ୍ତି। ସୁପ୍ରିମକୋର୍ଟରେ ପ୍ରାୟ ୮୧ ହଜାର, ହାଇକୋର୍ଟଗୁଡ଼ିକରେ ୬୨ ଲକ୍ଷ ୪୦ହଜାର ଏବଂ ଜିଲା ଓ ସବ୍ଅର୍ଡିନେଟ୍ କୋର୍ଟଗୁଡ଼ିକରେ ୪ କୋଟି ୭୦ ଲକ୍ଷ ମାମଲା ଗଡ଼ୁଛି। ଏହି କାରଣରୁ ସାଧାରଣ ଲୋକେ ନ୍ୟାୟ ପାଇବା ପ୍ରଭାବିତ ହେଉଛି। ଅଦାଲତଗୁଡ଼ିକ ଲମ୍ବାଉଥିବା ଏତେ ସମୟକୁ ବ୍ୟାଖ୍ୟାକରିବା ପାଇଁ ଅନେକ ସମୟରେ ‘ବିଳମ୍ବିତ ରାୟ, ବିଡ଼ମ୍ବିତ ନ୍ୟାୟ’ ବାକ୍ୟ ବ୍ୟବହାର କରାଯାଇଥାଏ ବୋଲି ଏହି ଅଧ୍ୟାୟରେ ଲେଖାଯାଇଛି। ଏହି ପ୍ରସଙ୍ଗ ସାମ୍ନାକୁ ଆସିବା ପରେ ବୁଧବାର ସୁପ୍ରିମକୋର୍ଟ ଏନେଇ ଗଭୀର ଚିନ୍ତାବ୍ୟକ୍ତ କରିଥିଲେ।
