ନୂଆଦିଲ୍ଲୀ,୧୩।୧୨ : ଡିସେମ୍ବର ୯ ରେ ତୱାଙ୍ଗ ସେକ୍ଟରରେ ଭାରତ ଏବଂ ଚାଇନା ସୈନିକଙ୍କ ମଧ୍ୟରେ ହୋଇଥିବା ସଂଘର୍ଷ ପୁଣିଥରେ ଦୁଇ ଦେଶ ମଧ୍ୟରେ ତିକ୍ତତାକୁ ଚରମ ସୀମାରେ ପହଞ୍ଚାଇଛି। ତେବେ କୁହାଯାଉଛି ଯେ ଚାଇନ ଲଗାତାର ଦୀର୍ଘ ଦିନ ଧରି ଭାରତରଆକାଶ ମାର୍ଗ ସୀମାରେନୁପ୍ରବେଶ କରିବାକୁ ଚେଷ୍ଟା କରିଥିଲା। ସର୍ବଶେଷ ସୂଚନା ଅନୁଯାୟୀ, ଗତ ଦୁଇ-ତିନି ସପ୍ତାହ ମଧ୍ୟରେ ଚାଇନା ଅରୁଣାଚଳ ପ୍ରଦେଶର ଲାଇନ ଅଫ ଆକଚ୍ୟୁଆଲ କଣ୍ଟ୍ରୋଲ (ଏଲଏସି) କୁ ଅନେକ ଥର ଡ୍ରୋନ ପଠାଇଛି। ଏଗୁଡିକ ମାଧ୍ୟମରେ ଚାଇନା ଭାରତୀୟ ଆକାଶ ସୀମାକୁ ଉଲ୍ଲଂଘନ କରିବାକୁ ଚେଷ୍ଟା ଜାରି ରଖିଛି।
ଖବର ଅନୁଯାୟୀ ଚାଇନାର ଏହି କାର୍ଯ୍ୟର ଜବାବ ଦେବା ପାଇଁ ଭାରତକୁ ଅନେକ ଥର ଏହି ଅଞ୍ଚଳରେ ଯୁଦ୍ଧ ବିମାନକୁ ନିୟୋଜିତବାକୁ ପଡିଥିଲା। ପ୍ରତିରକ୍ଷା ମନ୍ତ୍ରଣାଳୟର ସୂତ୍ରରୁ ପ୍ରକାଶ ଯେ ଗତ କିଛି ସପ୍ତାହ ମଧ୍ୟରେ ଏଭଳି ଦୁଇ-ତିନିଥର ଘଟିଥିଲା, ଯେତେବେଳେ ବାୟୁସେନାକୁ ଏଲଏସିରେ ଅନୁପ୍ରବେଶ କରିବାକୁ ଚେଷ୍ଟା କରୁଥିବା ଡ୍ରୋନଗୁଡ଼ିକୁ ଘଉଡ଼ାଇବା ପାଇଁ ଯୁଦ୍ଧ ବିମାନ ବ୍ୟବହାର କରିବାକୁ ପଡିଥିଲା। ଏହାର ମୁକାବିଲା କରିବା ପାଇଁ ବାୟୁସେନାକୁ ସୁଖୋଇ-୩୦ ଏମକେଆଇର ଯୁଦ୍ଧ ବିମାନର ବ୍ୟବହାର କରିବାକୁ ପଡ଼ିଥିଲା।
ସୂଚନାନୁସାରେ, ବାୟୁସେନା ଚାଇନା ସୀମାରେ ଡ୍ରୋନର କାର୍ଯ୍ୟକଳାପ ଉପରେ ନିରନ୍ତର ନଜର ରଖିଛି। ବାୟୁ ସୀମା ଉଲ୍ଲଂଘନ ହେବାର ସମ୍ଭାବନାକୁ ଦୃଷ୍ଟିରେ ରଖି ଭାରତୀୟ ସେନା ମଧ୍ୟ ପ୍ରସ୍ତୁତ ହୋଇଛି। ସୂତ୍ରରୁ ଜଣାପଡିଛି ଯେ ଯଦି ଡ୍ରୋନ ଏଲଏସି ସହିତ ସମାନ ଭାବରେ ଉଡୁଥିବାର ଦେଖାଯାଏ, ତେବେ ଭାରତରେ କୌଣସି ଅସୁବିଧା ନାହିଁ। କିନ୍ତୁ ଯଦି ବିମାନ କିମ୍ବା ଡ୍ରୋନ ରାଡାର ଉପରେ ଆସି ଭାରତୀୟ ସୀମା ଆଡକୁ ଆସିବାକୁ ଚେଷ୍ଟା କରେ, ତେବେ ଏହାକୁ ଘଉଡାଇବା ପାଇଁ ଆବଶ୍ୟକ ପଦକ୍ଷେପ ନିଆଯାଇଥାଏ।
ଉଲ୍ଲେଖନୀୟ ଯେ, ଉତ୍ତର ପୂର୍ବ ରାଜ୍ୟଗୁଡ଼ିକରେ ବାୟୁସେନା ଏକ ଶକ୍ତିଶାଳୀ ଉପସ୍ଥିତି ବଜାୟ ରଖିଛି। ବର୍ତ୍ତମାନ ସୁଖୋଇ-୩୦ ଯୁଦ୍ଧ ବିମାନର ସ୍କ୍ବାଡନଗୁଡିକ ତେଜପୁରରୁ ଆସାମର ଛାବୁଆ ପର୍ଯ୍ୟନ୍ତ ମୁତୟନ କରାଯାଇଛି। ଏହା ବ୍ୟତୀତ ପଶ୍ଚିମବଙ୍ଗର ହାସିମାରା ଠାରେ ରାଫାଲ ଯୁଦ୍ଧ ବିମାନ ମଧ୍ୟ ରଖାଯାଇଛି। ଚାଇନାକୁ ଉପଯୁକ୍ତ ଉତ୍ତର ଦେବାକୁ ଆସାମ ସେକ୍ଟରରେ ରୁଷିଆରୁ କିଣାଯାଇଥିବା ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥା ମଧ୍ୟ ସ୍ଥାପନ କରାଯାଇଛି।
