ନୂଆଦିଲ୍ଲୀ,୨୫।୧୨: ଭାରତ-ଚାଇନା ସମ୍ପର୍କକୁ ନେଇ ଆମେରିକାର ପ୍ରତିରକ୍ଷା ବିଭାଗ (ପେଣ୍ଟାଗନ)ର ଏକ ସାମ୍ପ୍ରତିକ ରିପୋର୍ଟକୁ ଦେଖି ଚାଇନା ରାଗିଯାଇଛି। ରିପୋର୍ଟରେ କୁହାଯାଇଛି, ଚାଇନା ଦ୍ୱିପାକ୍ଷିକ ସମ୍ପର୍କକୁ ସ୍ଥିର କରିବା ଏବଂ ଆମେରିକା-ଭାରତ ସମ୍ପର୍କକୁ ଆହୁରି ମଜଭୁତ କରିବାକୁ ରୋକିବା ପାଇଁ ପ୍ରକୃତ ନିୟନ୍ତ୍ରଣ ରେଖା (LAC) ପାଖରେ ଭାରତ ସହିତ ଉତ୍ତେଜନା ହ୍ରାସର ସୁଯୋଗ ନେବାକୁ ଚାହୁଁଛି।
ଚାଇନା ବୈଦେଶିକ ମନ୍ତ୍ରଣାଳୟର ମୁଖପାତ୍ର ଲିନ ଜିଆନ ଗୁରୁବାର କହିଛନ୍ତି, ଚାଇନା ତାର ଜାତୀୟ ପ୍ରତିରକ୍ଷା ନୀତି ସମ୍ପର୍କରେ ପେଣ୍ଟାଗନର ମନ୍ତବ୍ୟକୁ ବିରୋଧ କରେ। ସେ ଚାଇନା ଭାରତ ସହିତ ଚାଇନା ସମ୍ପର୍କକୁ ଏକ ରଣନୈତିକ ଏବଂ ଦୀର୍ଘକାଳୀନ ଦୃଷ୍ଟିକୋଣରୁ ଦେଖେ। ବିବାଦୀୟ ସୀମାବର୍ତ୍ତୀ ଅଞ୍ଚଳରେ ଭାରତ ସହିତ ଉତ୍ତେଜନା ହ୍ରାସର ସୁଯୋଗ ନେଇ ଚାଇନା ଆମେରିକା-ଭାରତ ସମ୍ପର୍କକୁ ବିପର୍ଯ୍ୟସ୍ତ କରିବାକୁ ଚେଷ୍ଟା କରିବ କି ବୋଲି ପଚରାଯିବାରୁ, ଲିନ ଜିଆନ କହିଥିଲେ, ଚାଇନା କୌଣସି ତୃତୀୟ ଦେଶକୁ ଟାର୍ଗେଟ ନ କରି ଭାରତ ସହିତ ସମ୍ପର୍କ ବିକାଶ ଉପରେ ଧ୍ୟାନ ଦିଏ।
ଚାଇନା ବୈଦେଶିକ ମନ୍ତ୍ରଣାଳୟ ଅନୁଯାୟୀ, ଚାଇନା ଭାରତ ସହିତ ଆଲୋଚନାକୁ ମଜଭୁତ କରିବା, ପାରସ୍ପରିକ ବିଶ୍ୱାସ ବୃଦ୍ଧି କରିବା ଏବଂ ସ୍ଥିର, ସୁସ୍ଥ ଏବଂ ସ୍ଥାୟୀ ବିକାଶ ଆଡ଼କୁ ଦ୍ୱିପାକ୍ଷିକ ସମ୍ପର୍କକୁ ଆଗକୁ ବଢ଼ାଇବାକୁ ପ୍ରସ୍ତୁତ। ସାମର୍ଥ୍ୟ ଏବଂ ସୁରକ୍ଷା ବିକାଶ ଜଡିତ ପିପୁଲ୍ସ ରିପବ୍ଲିକ ଅଫ ଚାଇନା ରିପୋର୍ଟ ପରିପ୍ରେକ୍ଷୀରେ ଆସିଛି, ଯେଉଁଥିରେ କୁହାଯାଇଛି ଯେ ଭାରତ-ଆମେରିକା ରଣନୈତିକ ମେଣ୍ଟକୁ ଗଭୀର ହେବାକୁ ରୋକିବା ପାଇଁ ପ୍ରକୃତ ନିୟନ୍ତ୍ରଣ ରେଖା (LAC) ରେ ଉତ୍ତେଜନା ହ୍ରାସ ପରେ ଚାଇନା ଭାରତ ସହିତ ସମ୍ପର୍କ ସ୍ଥିର କରିବାକୁ ଚେଷ୍ଟା କରୁଛି।
ପେଣ୍ଟାଗନ ରିପୋର୍ଟରେ ଅରୁଣାଚଳ ପ୍ରଦେଶକୁ ଚାଇନାର ମୂଳ ସ୍ବାର୍ଥ (ତାଇୱାନ ଏବଂ ଦକ୍ଷିଣ ଚାଇନା ସାଗର) ପାଇଁ ଗୁରୁତ୍ୱପୂର୍ଣ୍ଣ ବୋଲି ବର୍ଣ୍ଣନା କରାଯାଇଛି। ଏଥିରେ ପାକିସ୍ତାନ ସହିତ ଚୀନର ବଢ଼ୁଥିବା ସାମରିକ ସମ୍ପର୍କ ବିଷୟରେ ମଧ୍ୟ ଉଲ୍ଲେଖ କରାଯାଇଛି।
ଭାରତ ଏବଂ ଚାଇନା ମଧ୍ୟରେ ସୀମା ଉତ୍ତେଜନା ସାମ୍ପ୍ରତିକ ମାସଗୁଡ଼ିକରେ ହ୍ରାସ ପାଇଛି। ଅକ୍ଟୋବର ୨୦୨୪ରେ BRICS ଶିଖର ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଚାଇନା ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ହୋଇଥିବା ବୈଠକ ପରେ, ଦୁଇ ଦେଶ ସୀମା ପରିଚାଳନା ଉପରେ ଉଚ୍ଚସ୍ତରୀୟ ଆଲୋଚନା ଆରମ୍ଭ କରିଥିଲେ। ସିଧାସଳଖ ବିମାନ ଚଳାଚଳ, ଭିଜା ସୁବିଧା ଏବଂ କୈଳାସ ମାନସରୋବର ଯାତ୍ରା ଭଳି ପଦକ୍ଷେପ ନିଆଯାଇଛି।
Dharitri – Odisha’s No.1 Odia Daily
