ନୂଆଦିଲ୍ଲୀ/ବେଜିଂ,୨୩।୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦% ଟାରିଫ ପରେ H-୧B ଭିଜାକୁ ନେଇ ନୂଆ ନିୟମ ଲଗାଇ ଆଉ ଏକ ବଡ଼ ଝଟ୍କା ଦେଇଛନ୍ତି। ଫଳରେ ଅନେକ ଭାରତୀୟଙ୍କ ଆମେରିକା ଯିବାର ସ୍ବପ୍ନ ମଉଳି ଯାଇଛି। ଏହି ସୁଯୋଗର ଫାଇଦା ଉଠାଇବା ଲାଗି ଚାଇନା ବଡ଼ ଘୋଷଣା କରିଛି। ଚାଇନାର ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ ଭାରତୀୟ ଇଞ୍ଜିନିୟର୍ସମାନଙ୍କୁ ଚାଇନାକୁ ସ୍ବାଗତ। କ୍ୟାରିୟରରେ ପ୍ରଗତି ସହ ମାନବିକତାର ପ୍ରଗତି ଲାଗି ଚାଇନା ଆସନ୍ତୁ ବୋଲି ସେ କହିଛନ୍ତି।
ଭାରତରେ ଥିବା ଚାଇନା ଦୂତାବାସର ମୁଖପାତ୍ର ୟୁ ଜିଙ୍ଗ୍ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ ଶେୟାର କରିଛନ୍ତି, ଯେଉଁଥିରେ ଚାଇନା ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ ଆଜିର ଗ୍ଲୋବାଲ ଦୁନିଆରେ ପ୍ରଯୁକ୍ତିବିଦ୍ୟା ଏବଂ ଅର୍ଥନୀତିର ବିକାଶ ଲାଗି ପ୍ରତିଭାଙ୍କର ସୀମା ଡେଇଁବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଚାଇନା ବିଶ୍ୱର ପ୍ରତିଟି କ୍ଷେତ୍ର ସହ ଜଡ଼ିତ ପ୍ରତିଭାଶାଳୀ ବ୍ୟକ୍ତିମାନଙ୍କୁ ସ୍ବାଗତ କରେ। ଏଠାକୁ ଆସି ସେମାନେ କେବଳ ମାନବିକତାର ପ୍ରଗତିରେ ଯୋଗଦେବେ ତାହା ନୁହେଁ ବରଂ କ୍ୟାରିୟରରେ ମଧ୍ୟ ସଫଳତାର ଶିଢ଼ୀ ଚଢ଼ିପାରିବେ। ଚାଇନା ସେମାନଙ୍କୁ ସେମାନଙ୍କର ଦକ୍ଷତା ପ୍ରଦର୍ଶନ କରିବା ଏବଂ ଗ୍ଲୋବାଲ୍ ଡେଭଲପ୍ମେଣ୍ଟର ଅଂଶ ହେବାର ସୁଯୋଗ ପ୍ରଦାନ କରେ।
Spokesperson of MOFA: In a globalized world, cross-border flow of talents is instrumental in global technological and economic advancement.
China welcomes talents from various sectors and fields across the world to come and find their footing in China for the progress of… pic.twitter.com/ZiLNsmj0Vw
— Yu Jing (@ChinaSpox_India) September 23, 2025
ଗତ ଶୁକ୍ରବାର ଆମେରିକା H-୧B ଭିଜା ଆବେଦନ ଫି’କୁ ବୃଦ୍ଧି କରିଛି। ଏହା ଏବେ ୬ ଲକ୍ଷରୁ ବଢ଼ି ୮୮ ଲକ୍ଷ ଟଙ୍କା ହୋଇଯାଇଛି। ଫଳରେ ଭାରତୀୟ ଇଞ୍ଜିନିୟର୍ସମାନଙ୍କ ଲାଗି ଆମେରିକାରେ ନିଯୁକ୍ତି ପାଇବା ଅଧିକ କଷ୍ଟକର ହୋଇଯାଇଛି। ତେବେ ନୂଆ ନିୟମ ନେଇ ଟ୍ରମ୍ପ ପ୍ରଶାସନ କହିଛି ଯେ ଏଭଳି ପଦକ୍ଷେପର ଲକ୍ଷ୍ୟ ହେଉଛି ଯେ ଆବେଦନକାରୀ ଉଚ୍ଚ କୂାଳୀ ହେବେ ଏବଂ ସେମାନେ ଆବେଦନକାରୀଙ୍କ ସ୍ଥାନ ନେବେ ନାହିଁ।
