ତାଇପେଇ, ୧୧ା୪ : ତାଇଓ୍ବାନ୍ ଚାରିପଟେ ଚାଇନାର ତିନିଦିନିଆ ସମରାଭ୍ୟାସ ସୋମବାର ଶେଷ ହୋଇଛି। ସମରାଭ୍ୟାସ ଶେଷ ହେବା ପରେ ଲଢ଼ିବା ପାଇଁ ପ୍ରସ୍ତୁତ ବୋଲି ଚାଇନା ସୈନ୍ୟବାହିନୀ ଘୋଷଣା କରିଛି। ଗତ ସପ୍ତାହରେ ତାଇଓ୍ବାନ୍ ରାଷ୍ଟ୍ରପତିଙ୍କ ଆମେରିକା ଗସ୍ତ ପରେ ବେଜିଂ ଭୟ ଦେଖାଇଛି। ସମରାଭ୍ୟାସ ବେଳେ ତାଇଓ୍ବାନ ଦ୍ୱୀପକୁ ଚାଇନା ସମ୍ପୂର୍ଣ୍ଣ ସିଲ୍ କରି ରଖିଥିଲା। ଜଏଣ୍ଟ ସୋର୍ଡ ନାମରେ ଏହି ଯୁଦ୍ଧ ପ୍ରସ୍ତୁତି ପାଟ୍ରୋଲ ସ୍ବଶାସିତ ତାଇଓ୍ବାନ୍କୁ ଏକ ଚେତାବନୀ। ଉକ୍ତ ଭୂଖଣ୍ଡକୁ ଚାଇନା ନିଜର ଦାବି କରିଆସୁଛି। ତାଇଓ୍ବାନର ଯେକୌଣସି ପ୍ରକାର ସ୍ବାଧୀନତା ଏବଂ ବିଦେଶୀ ହସ୍ତକ୍ଷେପକୁ ଧ୍ୱଂସ କରିଦେବା ଲାଗି ସବୁ ସମୟରେ ଲଢ଼ିବା ପାଇଁ ଆମେ ପ୍ରସ୍ତୁତ ବୋଲି ମିଳିତ ସେନା ପକ୍ଷରୁ କୁହାଯାଇଛି।
ଗତବର୍ଷ ଅଗଷ୍ଟରେ ତତ୍କାଳୀନ ଆମେରିକା ହାଉସ୍ ସ୍ପିକର ନାନ୍ସି ପେଲୋସି ତାଇଓ୍ବାନ୍ ଗସ୍ତ କରିବା ପରେ ଚାଇନା ଏହାର ସୀମାରେ ସମରାଭ୍ୟାସ କରିବା ସହ ସମୁଦ୍ରର ନିର୍ଦ୍ଦିଷ୍ଟ ଅଞ୍ଚଳକୁ ଟାର୍ଗେଟ କରି କ୍ଷେପଣାସ୍ତ୍ର ମାଡ଼ କରିଥିଲା। ବେଜିଂର ଏଭଳି ସମରାଭ୍ୟାସ ତାଇଓ୍ବାନ ପାଇଁ କେବଳ ଧମକ ନୁହେଁ, ସମୁଦ୍ର ଓ ଆକାଶ ପଥକୁ ଅବରୋଧ କରି ଏହି ଦ୍ୱୀପକୁ ଚାରିପଟୁ ସିଲ୍ କରିଦେବା ଲାଗି ଏହା ଏକ ସୁଯୋଗ। ଚାଇନା ମିଲିଟାରୀ ଶକ୍ତିର ଏହା ଏକ ଗୁରୁତ୍ୱପୂର୍ଣ୍ଣ ରଣନୀତି ବୋଲି ସାମରିକ ବିଶେଷଜ୍ଞମାନେ ମତ ଦେଇଛନ୍ତି।
ତାଇଓ୍ବାନ୍ର ସ୍ବାଧୀନତାକୁ ସ୍ଥାୟୀ କରିବା ଲକ୍ଷ୍ୟରେ ଏହାର ରାଷ୍ଟ୍ରପତି ସାଇ ଇଙ୍ଗ୍-ଓ୍ବେନ୍ଙ୍କ ଆମେରିକା ସମେତ କେତେକ ଦେଶ ଗସ୍ତ କରିଥିଲେ। ସେ ଆମେରିକା ହାଉସ୍ ସ୍ପିକର କେଭିନ୍ ମାକାର୍ଥତ୍ଙ୍କୁ ଭେଟିବା ପରେ ବେଜିଂ ନିଜର ଆକ୍ରମଣାତ୍ମକ ସାମରିକ ସାମର୍ଥ୍ୟ ପ୍ରଦର୍ଶନ କରିଛି। ଶନିବାର ତାଇଓ୍ବାନ୍ ଦ୍ୱୀପ ଚାରିପଟେ ଚାଇନାର ୮ଟି ଯୁଦ୍ଧଜାହାଜ ଏବଂ ୭୧ଟି ଲଢ଼ୁଆ ବିମାନ ପଇଁତରା ମାରିଥିଲା। ଏଥିରେ ଚେଙ୍ଗଡୁ ଜେ-୧୦, ଶେନ୍ୟାଙ୍ଗ ଜେ-୧୧ ଏବଂ ଶେନ୍ୟାଙ୍ଗ ଜେ-୧୬ ଜେଟ୍ ସାମିଲ ଥିଲେ। ଏଥର ଚାଇନା ମୁଖ୍ୟତଃ ଏହାର ବାୟୁସେନା ସାମର୍ଥ୍ୟ ପ୍ରଦର୍ଶନ କରିଥିଲା। ୩ ଦିନରେ ଚାଇନା ଯୁଦ୍ଧବିମାନଗୁଡ଼ିକ ୨୦୦ ଥର ତାଇଓ୍ବାନ ଚାରିପଟେ ପଇଁତରା ମାରିଥିଲେ। ଯୁଦ୍ଧବିମାନବାହୀ ଯୁଦ୍ଧଜାହାଜ ଶାଣ୍ଡୋଙ୍ଗ ପ୍ରଥମ ଥର ପାଇଁ ତାଇଓ୍ବାନ୍ ଚାରିପଟେ ଚକ୍କର କାଟିଥିଲା। ତାଇଓ୍ବାନକୁ ସହାୟତା ପାଇଁ ଆସିବାକୁ ଥିବା ବିଦେଶୀ ଶକ୍ତିକୁ ପ୍ରତିହତ କରିବା ଏହାର ଉଦ୍ଦେଶ୍ୟ ବୋଲି ଜଣେ ପ୍ରତିରକ୍ଷା ଗବେଷକ କହିଛନ୍ତି। ଅର୍ଥାତ୍ ଭବିଷ୍ୟତରେ ଅନୁରୂପ ସାମରିକ କାର୍ଯ୍ୟାନୁଷ୍ଠାନ ହେଲେ ତାଇଓ୍ବାନ୍କୁ ଏକାକୀ ଏହାର ସମ୍ମୁଖୀନ ହେବାକୁ ପଡ଼ିବ ବୋଲି ନ୍ୟାଶନାଲ ଡିଫେନ୍ସ ଆଣ୍ଡ ସିକ୍ୟୁରିଟି ରିସର୍ଚ୍ଚର ଗବେଷକ ହାନ୍ ଗାନ୍-ମିଙ୍ଗ୍ କହିଛନ୍ତି।
