ବରଗଡ,୨୩।୫(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ରବି ଧାନ ସଂଗ୍ରହ ପ୍ରକ୍ରିୟା ଚାଲିଛି। ଧାନ ସଂଗ୍ରହ ପ୍ରକ୍ରିୟାକୁ ୭ଦିନ ବିତିଛି। ଜିଲାରେ ଚାଷୀଙ୍କ ଅମଳ ଧାନ ବିକ୍ରି ସରି ନାହିଁ। ଜିଲାର ଧାନ ବିକ୍ରି ସରିବାକୁ ଆହୁରି ପ୍ରାୟ ୨ମାସ ଲାଗିଯିବ। ଅନ୍ୟପଟେ ପଡ଼ୋଶୀ ଛତିଶଗଡ଼ ରାଜ୍ୟରେ ରବିଧାନ ସଂଗ୍ରହ ପ୍ରକିୟା ଚାଲୁ ନ ଥିବା ଯୋଗୁ ସେଠାକାର ଧାନ ବେପାରୀ ଜରିଆରେ ବରଗଡ଼ ଜିଲାକୁ ପଶୁଛି। ସେଭଳି ଧାନକୁ ରାତାରାତି କେତେକ ନିର୍ଦ୍ଦିଷ୍ଟ ଜାଗା ତଥା ମିଲ୍ରେ ରଖାଯାଉଛି ଏବଂ ଜିଲାର ବିଭିନ୍ନ ଧାନକ୍ରୟ କେନ୍ଦ୍ରରେ ଫଲ୍ସଏଣ୍ଟ୍ରି କରାଯାଉଥିବା ଅଭିଯୋଗ ହୋଇଛି। ଏହା ଜିଲାର ଚାଷୀଙ୍କ ଚିନ୍ତା ବଢ଼ାଇ ଦେଇଛି। ଜିଲାର ଚାଷୀମାନେ ଧାନ ବିକ୍ରି କରି ସାରି ନ ଥିବେ, ମାତ୍ର ଆଗାମୀ ଦିନରେ ଜିଲାରେ ଧାନକ୍ରୟ ଲକ୍ଷ୍ୟ ପୂରଣ ହୋଇ ତାହା ଧାନ ସଂଗ୍ରହ ପ୍ରକ୍ରିୟାରେ ବଡ଼ ସମସ୍ୟା ସୃଷ୍ଟି କରିବ ବୋଲି ଏବେଠାରୁ ଆଶଙ୍କା ପ୍ରକାଶ ପାଇଲାଣି। ଛତିଶଗଡ଼ ସୀମାବର୍ତ୍ତୀ ପ୍ରବେଶପଥ ଗୁଡ଼ିକ ଉପରେ କଡ଼ା ନଜର ରଖାଯାଇଛି ବୋଲି ପ୍ରଶାସନିକ ଅଧିକାରୀମାନେ କହୁଛନ୍ତି। କିନ୍ତୁ ସେହି ପ୍ରବେଶ ପଥ ଅତିକ୍ରମ କରି ଛତିଶଗଡ଼ର ଧାନ ବୋଝେଇ ଟ୍ରକ କେବଳ ସୀମାବର୍ତ୍ତୀ ଗ୍ରାମ ନୁହେଁ, ସିଧାସଳଖ ଜିଲା ସଦର ମହକୁମାକୁ ମଧ୍ୟ ପହଞ୍ଚି ପାରୁଛି। ଗତ କିଛିଦିନ ତଳେ ବରଗଡ଼ ସହର ଉପକଣ୍ଠ ହଲଦୀପାଲି ଛକରେ ଏଭଳି ଏକ ଟ୍ରକ ଧରାପଡ଼ିବା ଘଟଣା ଏହାର ଦୃଷ୍ଟାନ୍ତ ଅଟେ। ତେବେ ମୁଖ୍ୟରାସ୍ତା ଦେଇ ଯଦି ଛତିଶଗଡ଼ ଧାନ ଏଭଳି ପ୍ରବେଶ କରି ପାରୁଛି, ତେବେ ଜିଲାକୁ ସଂଯୋଗ କରୁଥିବା ଅନ୍ୟ ଗଳାବାଟ ଦେଇ ଏଠାକୁ କେତେ ପରିମାଣରେ ଧାନ ପଶୁଥିବ, ତାହା ସହଜରେ ଅନୁମେୟ।
୬ନମ୍ବର ଜାତୀୟ ରାଜପଥର ବରଗଡ଼ ଜିଲା ସୋହେଲା ବ୍ଲକ ଏବଂ ଅମ୍ବାଭୋନା ବ୍ଲକ ଦେଇ ଛତିଶଗଡ଼କୁ ମୁଖ୍ୟରାସ୍ତା ଗୁଡ଼ିକ ସଂଯୋଗ କରୁଛି। ମୁଖ୍ୟରାସ୍ତା ଗୁଡ଼ିକରେ ନିୟମିତ ଯାତ୍ରୀବାହୀ ବସ୍ ସହିତ ଅନ୍ୟ ଯାନବାହନ ଯାତାୟାତ କରୁଛି। ତେବେ ଏବେ ମୁଖ୍ୟରାସ୍ତା ସମେତ ବରଗଡ଼କୁ ଛତିଶଗଡ଼ ଧାନ ଚାଲାଣ ପାଇଁ ଉଭୟ ବ୍ଲକ ଦେଇ ରହିଥିବା ଗଳାବାଟ ଗୁଡ଼ିକ ଧାନ ବେପାରୀଙ୍କ ପ୍ରମୁଖ ମାଧ୍ୟମ ପାଲଟିଛି। ଛତିଶଗଡ଼ ରାଜ୍ୟର ନୂଆପଡ଼ା, କଞ୍ଚନପୁର, ବୋରିଦା ଖଏରଗଡ଼ି, ମାନିଅମୁରା, କେନ୍ଦାଢ଼ିପା, ରିଷିଡ଼ାରୁ ଯଥାକ୍ରମେ ବରଗଡ଼ ଜିଲା ଅମ୍ବଭୋନା ବ୍ଲକ ଅନ୍ତର୍ଗତ ବଡ଼ଧରା, ରୁଚିଦା, ଗଣ୍ଠିଆପାଲି, ବେହେରାପାଲି, ବିଲେଇଗଡ଼ି, ସାନ ସରେଇପାଲି, କୁମ୍ଭୋକୁ ରାସ୍ତା ସଂଯୋଗ ହୋଇଛି।
ତେବେ ଏହି ରାସ୍ତାଗୁଡ଼ିକ ମଧ୍ୟରୁ ନୂଆପଡ଼ା-ବଡ଼ଧରା, କଞ୍ଚନପୁର-ରୁଚିଦା, ବୋରିଦା-ଗଣ୍ଠିଆପାଲି ରାସ୍ତା ଦେଇ ମୁଖ୍ୟତଃ ଯାତ୍ରୀବାହୀ ବସ୍ ଏବଂ ଅନ୍ୟ ଯାନବାହନ ନିୟମିତ ଯାତାୟାତ କରିଥାଏ। ତେବେ ଛତିଶଗଡ଼ରୁ ଧାନ ଚାଲାଣ ପାଇଁ ଧାନ ବେପାରୀମାନେ ଏହି ରାସ୍ତା ବ୍ୟବହାର କରୁଥିଲେ ସୁଦ୍ଧା ଚଢ଼ାଉ ଭୟରେ ଖଏରଗଡ଼ି-ବେହେରାପାଲି, ମାନିଅମୁରା-ବିଲେଇଗଡ଼ି, କେନ୍ଦାଢ଼ିପା-ସାନ ସରେଇପାଲି, ରିଷିଡ଼ା ଭଳି ଗଳାବାଟରେ ଅନାୟାସରେ ବରଗଡ଼ ଜିଲାକୁ ଧାନ ଆଣୁଥିବା ଅଭିଯୋଗ ହୋଇଛି। ଏହା ସହିତ ଭଟଲି ବ୍ଲକର କାଶିପାଲି ଦେଇ ବରଡ଼ୋଲକୁ ସଂଯୋଗ କରୁଥିବା ରାସ୍ତାରେ ମଧ୍ୟ ଛତିଶଗଡ଼ ରାଜ୍ୟର ଧାନ ବୋଝେଇ ଟ୍ରକଗୁଡ଼ିକ ଆସୁଥିବା ସ୍ଥାନୀୟ ଲୋକେ କହୁଛନ୍ତି। ଅନୁରୂପଭାବେ ସୋହେଲା ବ୍ଲକ ଦେଇ ମଧ୍ୟ ଅନେକ ଗଳାବାଟ ରହିଛି ଏବଂ ସେହି ରାସ୍ତା ଗୁଡ଼ିକ ଦେଇ ବରଗଡ଼କୁ ଧାନ ପଶୁଥିବା ଅଭିଯୋଗ ହୋଇଛି। ଏହି ବ୍ଲକର କରଣ୍ଡୋଲା ପଞ୍ଚାୟତ ଦାମପାଲି, କାଶିପାଲି-କୁଦୋପାଲି, ଗ୍ରୀଞ୍ଜେଲ-ବୁଡ଼ାମାଳ ଦେଇ ଛତିଶଗଡ଼ରୁ ବରଗଡ଼କୁ ଧାନ ବୋଝେଇ ଟ୍ରକଗୁଡ଼ିକ ଆସୁଥିବା ଅଞ୍ଚଳର ଲୋକେ କହୁଛନ୍ତି। ଅନ୍ୟପଟେ ଛତିଶଗଡ଼ ଧାନ ଯେଭଳି ବରଗଡ଼କୁ ପଶିବ ନାହିଁ, ସେଥିପ୍ରତି ପ୍ରବେଶପଥ ଗୁଡ଼ିକରେ ସିସିଟିଭି ସ୍ଥାପନ ସହିତ ସ୍ବତନ୍ତ୍ର ସ୍କ୍ବାଡ୍ ନଜର ରଖିଥିବା କୁହାଯାଉଥିଲେ ହେଁ ତାହା ଧର୍ମକୁ ଆଖିଠାର ଭଳି ହୋଇଛି। ଏପରିକି ଗଳାବାଟ ଦେଇ ଛତିଶଗଡ଼ରୁ ବରଗଡ଼କୁ ଧାନ ନିୟମିତ ଆସୁଛି। ସେଥିପ୍ରତି ବିଭାଗୀୟ ଅଧିକାରୀମାନେ ଜାଣି ଅଜଣା ରହୁଛନ୍ତି। ମିଲର୍ସ, ବେପାରୀ ଏବଂ ବିଭାଗୀୟ କର୍ମଚାରୀଙ୍କ ମିଳିତ ସହଯୋଗରେ ଛତିଶଗଡ଼ ଧାନ ବରଗଡ଼କୁ ପ୍ରବେଶ କରୁଥିବା ଚାଷୀନେତାମାନେ ଅଭିଯୋଗ କରିଛନ୍ତି।
ସଂଯୁକ୍ତ କୃଷକ ସଙ୍ଗଠନର ଉପଦେଷ୍ଟା ରମେଶ ମହାପାତ୍ର କହିଛନ୍ତି, ସବୁବର୍ଷ ରବିଧାନ ବରଗଡ଼କୁ ଆସୁଛି। ନୂଆ ସରକାର ତାକୁ ଅଟକାଇବେ ବୋଲି ଆଶା ରହିଥିଲା। ମାତ୍ର ଆଗଭଳି ଏବେ ମଧ୍ୟ ଛତିଶଗଡ଼ରୁ ବରଗଡ଼କୁ ଧାନ ଆସୁଛି। ସିସିଟିଭି କେଉଁଠି ବସିଛି ଏବଂ ଏହା ରୋକିବାକୁ ଗଠିତ ଟାସ୍କଫୋର୍ସ ଏବଂ ପୋଲିସ କଣ କରୁଛନ୍ତି ବୋଲି ସେ ପ୍ରଶ୍ନ କରିଛନ୍ତି। ସେହିପରି ଜୟ କିଷାନ ଆନ୍ଦୋଳନର ସମ୍ପାଦକ ହର ବଣିଆଁ କହିଛନ୍ତି, ବ୍ୟବସାୟୀ ଏବଂ ମିଲର୍ସ ଜରିଆରେ ଛତିଶଗଡ଼ର ଧାନ ବରଗଡ଼ ଆସୁଛି। ଏଥିରେ ମିଲର୍ସ ଏବଂ ବ୍ୟବସାୟୀମାନେ ଲାଭବାନ ହେଉଛନ୍ତି। ମାତ୍ର ଶେଷରେ ବରଗଡ଼ ଜିଲାର ଚାଷୀମାନଙ୍କୁ ଧାନବିକ୍ରି ପାଇଁ ବହୁ ହଟହଟା ହେବାକୁ ପଡ଼ିଥାଏ ବୋଲି ବଣିଆଁ କହିଛନ୍ତି।