ଢେଙ୍କାନାଳ ଅଫିସ, ୨୪।୨: ଢେଙ୍କାନାଳ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ୪ ପର୍ଯ୍ୟାୟରେ ଶେଷ ହୋଇଛି। ଏହାପରେ ଜିଲାର ୮ ବ୍ଲକ ମଧ୍ୟରେ ପଞ୍ଚାୟତ ସମିତି ଅଧ୍ୟକ୍ଷ ପଦବୀ ଦଖଲ କରିବା ଲାଗି ପ୍ରମୁଖ ରାଜନୈତିକ ଦଳଗୁଡ଼ିକ ମଧ୍ୟରେ ଛକାପଞ୍ଝା ଆରମ୍ଭ ହୋଇଛି। ଫଳାଫଳ ବାହାରିବା ପୂର୍ବରୁ ବିଜୟ ସମ୍ଭାବନା ଥିବା ସମିତିସଭ୍ୟମାନେ ଅଜ୍ଞାତବାସକୁ ଚାଲିଯାଇଥିବାବେଳେ ଏହାକୁ ନେଇ ରାଜନୈତିକ ବାତାବରଣ ଉଷ୍ମ ହୋଇଛି।
ନିର୍ବାଚନ ଶେଷ ପରେ ଜିଲାର ୨୧୨ ପଞ୍ଚାୟତରୁ ପ୍ରତିଦ୍ୱନ୍ଦ୍ୱିତା କରୁଥିବା ସମିତିସଭ୍ୟଙ୍କ ଭାଗ୍ୟ ଏବେ ଭୋଟ ବାକ୍ସରେ ସିଲ୍ ହୋଇଛି। ୨୬ ତାରିଖରୁ ୩ଦିନ ଧରି ବିଧିବଦ୍ଧ ଭାବେ ଭୋଟ ଗଣତି ହେବାକୁ ଥିବାବେଳେ ସରକାରୀ ଭାବେ ୨୮ ତାରିଖରେ ଫଳାଫଳ ବାହାରିବ। ଏହାପରେ ସମିତିସଭ୍ୟମାନେ ଅଧ୍ୟକ୍ଷ ବାଛିବେ। ଏହାକୁ ନେଇ ଘୋଡ଼ାବେପାର ହେବାର ସମ୍ଭାବନା ଥିବାରୁ ବିଭିନ୍ନ ବ୍ଲକର ସମିତିସଭ୍ୟମାନଙ୍କୁ ସମର୍ଥିତ ଦଳ ପକ୍ଷରୁ ଅଜ୍ଞାତବାସରେ ପଠାଇ ଦିଆଯାଇଛି। ଅନ୍ୟପଟେ ସ୍ବାଧୀନ ଭାବେ ଲଢୁଥିବା କେତେଜଣ ସମିତିସଭ୍ୟଙ୍କ ଉପରେ ମଧ୍ୟ ସବୁ ଦଳ ନଜର ପକାଇଛନ୍ତି। ସଂଖ୍ୟା ଗରିଷ୍ଠ ନ ହେଲେ ବିଜୟୀ ସ୍ବାଧୀନ ପ୍ରାର୍ଥୀ ପ୍ରମୁଖ ଭୂମିକା ଗ୍ରହଣ କରିବେ। ତେଣୁ ଏବେଠାରୁ କଳ ବଳ କୌଶଳ ଖଟାଇ ସେମାନଙ୍କୁ ନିଜ ପକ୍ଷକୁ ଆଣିବାକୁ ନିର୍ବାଚନ ମଙ୍ଗ ଧରିଥିବା ନେତାମାନେ ଉଦ୍ୟମ କରୁଛନ୍ତି। ଏହାକୁ ନେଇ ଦଳୀୟ ନେତୃବୃନ୍ଦ ମୁହଁ ଖୋଲୁନାହାନ୍ତି। ଅନ୍ୟପଟେ ନିଜ ମନପସନ୍ଦର ପ୍ରାର୍ଥୀଙ୍କୁ ଅଧ୍ୟକ୍ଷ ପଦବୀରେ ବସାଇବାକୁ ରଣନୀତି ପ୍ରସ୍ତୁତ କରାଯାଉଥିବା ଜଣାପଡ଼ିଛି।
ଭୋଟଗଣତିର ଭିଡିଓଗ୍ରାଫି ହେବ
ଢେଙ୍କାନାଳ ଜିଲାରେ ସମସ୍ତ ୮ ବ୍ଲକ କାର୍ଯ୍ୟାଳୟରେ ଫେବୃୟାରୀ ୨୬ରୁ ୨୮ ଯାଏ ଭୋଟଗଣତି ହେବ। ଏଥିଲାଗି ଜୋର୍ସୋର୍ରେ ଚାଲିଛି ପ୍ରଶାସନିକ ପ୍ରସ୍ତୁତି। ୨୬ ତାରିଖରେ ପ୍ରତ୍ୟେକ ବ୍ଲକ ଅନ୍ତର୍ଗତ ୧ନଂ. ଜିଲା ପରିଷଦ ଜୋନ୍ ଏବଂ ଏହା ଅଧୀନରେ ଥିବା ପଞ୍ଚାୟତର ସରପଞ୍ଚ, ସମିତିସଭ୍ୟ ଓ ଓ୍ବାର୍ଡମେମ୍ବର ପଦବୀ ଲାଗି ଭୋଟଗଣତି ହେବ। ଅନୁରୂପ ଭାବେ ୨୭ ତାରିଖରେ ୨ନଂ. ଜୋନ୍, ୨୮ ତାରିଖରେ ୩ନଂ. ଜୋନ୍ ପାଇଁ ଭୋଟ ଗଣତି ହେବ। ୪ଟି ଜୋନ୍ ଥିବା ବ୍ଲକଗୁଡ଼ିକର ମତଗଣନା ୨୮ ତାରିଖ ଦିନ ହିଁ ଶେଷ ହେବ। ଏହାପରେ ଚୂଡ଼ାନ୍ତ ଫଳାଫଳ ପ୍ରକାଶ ପାଇବ। ଭୋଟଗଣତିରେ ଭିଡିଓଗ୍ରାଫି କରାଯିବ। ଫଳାଫଳ ଜାଣିବାକୁ ମତଗଣନା କେନ୍ଦ୍ର ବାହାରେ ଏଲ୍ଇଡି ଟିଭି ଲାଗିବ। ଗୋଟିଏ ଜୋନ୍ରେ ଯେତିକି ପଞ୍ଚାୟତ ରହିଛି, ମତଗଣନା ଲାଗି ସେତିକି ଟେବୁଲ ରହିବ। ସକାଳ ୮ଟାରୁ ଭୋଟ ଗଣନା ଆରମ୍ଭ ହେବ। ଆଇନଶୃଙ୍ଖଳା ଏଡ଼ାଇବାକୁ ଯଥେଷ୍ଟ ପୋଲିସ ଫୋର୍ସ ମୁତୟନ କରାଯିବ ବୋଲି ଜିଲା ପଞ୍ଚାୟତ ଅଧିକାରୀ ଚନ୍ଦ୍ରଶେଖର ମହାରଣା ସୂଚନା ଦେଇଛନ୍ତି।
