ଚେନ୍ନାଇ, ୨୫।୫: ଟାଓ୍ବେଲ ପିନ୍ଧି ଅନଲାଇନ କ୍ଲାସ ନେବା ଶିକ୍ଷକଙ୍କୁ ମହଙ୍ଗା ପଡ଼ିଛି। ଚାକିରି ହରାଇବା ସହ ଗିରଫ ହୋଇଛନ୍ତି ଚେନ୍ନାଇର ଜଣାଶୁଣା ସ୍କୁଲର ଜଣେ ୫୯ ବର୍ଷୀୟ ଶିକ୍ଷକ। ଚେନ୍ନାଇର କେକେ ନଗର ଅଞ୍ଚଳରେ ଥିବା ସ୍କୁଲ ସେଶାଦ୍ରି ବାଳା ବିଦ୍ୟା ଭବନର ଛାତ୍ରୀଛାତ୍ର ଅଭିଯୋଗ କରିବା ପରେ ଶିକ୍ଷକଙ୍କୁ ପୋକ୍ସୋ ଆଇନରେ ଗିରଫ କରାଯାଇଛି। ତାଙ୍କ ବିରୋଧରେ ଆଇଟି ଆଇନ ମର୍ଯ୍ୟଦା ଭଙ୍ଗ କରିବା ଓ ଯୌନ ସମ୍ବନ୍ଧୀୟ ବିଷୟ ବାଣ୍ଟିବା ଭଳି ଦଫା ମଧ୍ୟ ଲଗାଯାଇଛି।
ଉକ୍ତ ଶିକ୍ଷକଙ୍କ ବିରୋଧରେ ବହୁ ପୂର୍ବତନ ଓ ବର୍ତ୍ତମାନ ଛାତ୍ରୀଛାତ୍ର ଆଣିଛନ୍ତି ଯୌନ ଶୋଷଣ ଏବଂ ଅନୁଚିତ ବ୍ୟବହାର ଅଭିଯୋଗ। ଛାତ୍ରୀଛାତ୍ରଙ୍କ ପରିଚୟକୁ ଲୁଚାଇ ସେମାନଙ୍କ ଅଭିଯୋଗକୁ ଏକତ୍ରିତ କରି ଜଣେ ପୂର୍ବତନ ଛାତ୍ରୀ ପୋଲିସ ନିକଟରେ ଅଭିଯୋଗ କରିଥିଲେ। ତେବେ ଯୌନ ଶୋଷଣ ସମ୍ପର୍କରେ ସ୍କୁଲ ଅଧିକାରୀଙ୍କୁ ପୂର୍ବରୁ ଜଣାଥିଲା। ହେଲେ ସେମାନେ ଏହାକୁ ଅଣଦେଖା କରିଥିବା କିଛି ଛାତ୍ରୀ ଅଭିଯୋଗ କରିଛନ୍ତି।
ସୋମବାର ଡିଏମ୍କେ ଏମ୍ପି କାନିମୋଝି ଘଟଣା ସମ୍ପର୍କରେ ଟୁଇଟ୍ କରି ଏସ୍ବିବି ସ୍କୁଲର କମର୍ସ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଏହାପରେ ଉକ୍ତ ଶିକ୍ଷକଙ୍କୁ ସସ୍ପେଣ୍ଡ କରିବା ସହ ପୋଲିସକୁ ଜଣାଇଥିଲେ ସ୍କୁଲ ଅଧିକାରୀ।
