ଭୁବନେଶ୍ୱର,୮।୫(ବ୍ୟୁରୋ): କେତେବେଳେ ଚାକିରି ଦେବାକୁ କହି ଫସାଉଥିଲେ ତ ଆଉ କେତେବେଳେ ଭିଜିଲାନ୍ସ ଅଧିକାରୀ ପରିଚୟରେ ବ୍ଲାକ୍ମେଲ କରି ଟଙ୍କା ଲୁଟୁଥିଲେ। ଏକାଧିକ ଚାକିରି ଆଶାୟୀ, ସରକାରୀ ଅଧିକାରୀ ଓ କଣ୍ଟ୍ରାକ୍ଟରଙ୍କୁ ଠକେଇ କରିଥିବା ଜଣେ ଉଚ୍ଚଶିକ୍ଷିତ ଠକଙ୍କୁ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଗିରଫ କରିଛି। ସେ ହେଲେ ପୁରୀ ଜିଲା କୃଷ୍ଣପ୍ରସାଦ ଥାନା ଅନ୍ତର୍ଗତ ଫୁଲବାରୀ ଗ୍ରାମର ମନୋଜ କୁମାର ମାଝୀ। ଶନିବାର ବିଳମ୍ବିତ ରାତିରେ ଏସ୍ଟିଏଫ୍ ଟିମ୍ ମନୋଜଙ୍କ ଘରେ ଚଢ଼ାଉ କରି ତାଙ୍କୁ କାବୁ କରିଥିଲା। ଏଥିସହ ତାଙ୍କ ଘରୁ ବହୁ ଜାଲ କାଗଜପତ୍ର, ୩ଟି ନକଲି ସେକ୍ସନ ଅଫିସର ଆଇକାର୍ଡ ଜବତ ହୋଇଛି। ମନୋଜଙ୍କୁ ରବିବାର ଭୁବନେଶ୍ୱର ଏସ୍ଡିଜେଏମ୍ଙ୍କ କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସୂଚନା ଅନୁଯାୟୀ, ନିକଟରେ ମନୋଜ ନିଜକୁ ଭିଜିଲାନ୍ସ ଏସ୍ପି ପରିଚୟ ଦେଇ ପୂର୍ତ୍ତ ବିଭାଗର ଅତିରିକ୍ତ ମୁଖ୍ୟଯନ୍ତ୍ରୀ ଅଜିତ ପ୍ରସାଦ ମହାପାତ୍ରଙ୍କୁ ଫସାଇବାକୁ ଚେଷ୍ଟା କରିଥିଲେ। ଏଥିସହ ତାଙ୍କୁ ୧ କୋଟି ଟଙ୍କା ଦେବାକୁ ଦାବି କରିଥିଲେ। ଟଙ୍କା ନ ଦେଲେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଧମକ ଦେଇଥିଲେ। ଅଜିତ ଏନେଇ ଏସ୍ଟିଏଫ୍ ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତି କରି ଏସ୍ଟିଏଫ୍ ଏକ ମାମଲା (ନଂ.୯/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ମନୋଜ ଧରାପଡ଼ିବା ପରେ ତାଙ୍କ ଠକେଇ ସାମ୍ରାଜ୍ୟ ନେଇ ଏସ୍ଟିଏଫ୍ ଅଧିକ ତଥ୍ୟ ପାଇଛି। ମନୋଜ ଜଣେ ଉଚ୍ଚଶିକ୍ଷିତ ବୋଲି ଜଣାପଡ଼ିଛି। ସେ କେମିଷ୍ଟ୍ରିରେ ମାଷ୍ଟର ଡିଗ୍ରୀ ଓ ପିଏଚ୍ଡି ମଧ୍ୟ କରିଛନ୍ତି। ସେ ଶିକ୍ଷିତ ଉପାୟରେ ବିଭିନ୍ନ ସରକାରୀ ଅଧିକାରୀ, ଚାକିରି ଆଶାୟୀ ଓ କଣ୍ଟ୍ରାକ୍ଟରଙ୍କୁ ଫସାଉଥିଲେ। ଏପରିକି ସେ ଜଣଙ୍କୁ ଏସ୍ଏସ୍ଓ ଚାକିରି କରାଇଦେବାକୁ କହି ୧୫ ଲକ୍ଷ ଓ ଖଣି ନିଗମରେ ତାଙ୍କ ଝିଆରୀଙ୍କୁ ଚାକିରି କରାଇଦେବାକୁ କହି ବିବେକାନନ୍ଦ ପ୍ରଧାନ ନାମକ ଜଣେ କଣ୍ଟ୍ରାକ୍ଟରଙ୍କଠାରୁ ମଧ୍ୟ ୬ ଲକ୍ଷ ଠକିଥିବା ଏସ୍ଟିଏଫ୍ ପ୍ରମାଣ ପାଇଛି। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା (ଡିଆର୍ଡିଏ), ପୂର୍ତ୍ତ ବିଭାଗ (ପିଡବ୍ଲ୍ୟୁଡି), ଓଡ଼ିଶା ଖଣି ନିଗମ (ଓମ୍ସି), ରାସ୍ତା ଓ ଗୃହ ବିଭାଗ (ଆର୍ଏଣ୍ଡ ବି), ସମ୍ମନ୍ବିତ ଆଦିବାସୀ ଉନ୍ନୟମ ସଂସ୍ଥା (ଆଇଟିଡିଏ) ଆଦି ବିଭିନ୍ନ ସରାକାରୀ ବିଭାଗ ଓ ସଂସ୍ଥାର ଏକାଧିକ ଅଧିକାରୀ ତାଙ୍କ ଠକେଇ ଫାସରେ ଫସିଥିବା ତଦନ୍ତବେଳେ ଜଣାପଡିଛି। ତେବେ ଏହି ମହାଠକେଇରେ ସମ୍ପୃକ୍ତ ଅନ୍ୟମାନଙ୍କୁ ଧରିବା ସହ ମାମଲାରେ ଅଧିକ ତଥ୍ୟ ଆଣିବାକୁ ମନୋଜଙ୍କୁ ରିମାଣ୍ଡରେ ଅଣାଯିବ ବୋଲି ଏସ୍ଟିଏଫ୍ ଏସ୍ପି କେ.କେ. ପାଣିଗ୍ରାହୀ କହିଛନ୍ତି। ଏଥିସହ ତାଙ୍କ ବ୍ୟାଙ୍କ ଆକାଉଣ୍ଟ ସିଜ୍ କରାଯିବ ବୋଲି ସେ କହିଛନ୍ତି।
