ଶେରଗଡ଼,୫ା୮(ଡି.ଏନ.ଏ.): ଗଞ୍ଜାମ ଜିଲା ଶେରଗଡ଼ ଥାନା ଅଞ୍ଚଳର ଜଣେ ମହିଳାଙ୍କୁ ଅପହରଣ କରି ବଳାତ୍କାର କରିଥିବା ଅଭିଯୋଗ ହୋଇଛି। ଏନେଇ ପୋଲିସ ଜଣେ ଯୁବକଙ୍କୁ ଗିରଫ କରିଛି। ସେ ହେଲେ ଷଢଙ୍ଗୀପଲ୍ଲୀ ଗ୍ରାମର ସଞ୍ଜୟ ଗୌଡ। ତାଙ୍କୁ ଶେରଗଡ଼ କୋର୍ଟ ଚାଲାଣ ପରେ ଆସିକା ଜେଲକୁ ପଠାଇ ଦିଆଯାଇଥିବା ପୋଲିସ କହିଛି।
ପୋଲିସ ସୂଚନା ମୁତାବକ, ସଞ୍ଜୟ ପୀଡିତାଙ୍କ ସହ ପ୍ରେମ ସମ୍ପର୍କ ରଖିଥିଲେ। ପରେ ତାଙ୍କୁ ଅପହରଣ କରି ରାଜ୍ୟ ବାହାରକୁ ନେଇଯାଇଥିଲେ। ସେଠାରେ ତାଙ୍କୁ ବଳାତ୍କାର କରିଥିଲେ। ପରେ ମହିଳାଙ୍କୁ ଗାଁକୁ ଯିବା କହି ଝାନ୍ସି ରେଳ ଷ୍ଟେଶନରେ ଏକୁଟିଆ ଛାଡ଼ି ଫେରାର ହୋଇଯାଇଥିଲେ।
ଜୁନ୍ ୧୩ରେ ମହିଳାଙ୍କ ସ୍ବାମୀଙ୍କ ଏତଲା କ୍ରମେ ଶେରଗଡ଼ ଥାନା ଆଇଆଇସି ମମତା ସାମନ୍ତରାୟ ଏକ ନିଖୋଜ ମାମଲା ରୁଜୁ କରି ତଦନ୍ତ ଚଳାଇଥିଲେ। ଜଣେ ଓଡ଼ିଆ ମହିଳାଙ୍କୁ ଝାନ୍ସି ଜିଆର୍ପି ଉଦ୍ଧାର କରି ଶେରଗଡ଼ ପୋଲିସକୁ ଖବର ଦେଇଥିଲା। ଏନେଇ ଶେରଗଡ଼ ପୋଲିସର ଏକ ଟିମ୍ ସେଠାରୁ ତାଙ୍କୁ ଉଦ୍ଧାର କରି ବ୍ରହ୍ମପୁରର ଏକ ସର୍ଟ ଷ୍ଟେ ହୋମରେ ରଖିଥିଲା। ଅଭିଯୁକ୍ତ ସଞ୍ଜୟ ରାୟଗଡାରେ ଥିବା ଖବରପାଇ ପୋଲିସ ବୁଧବାର ତାଙ୍କୁ ଗିରଫ କରିଥିଲା। ମହିଳାଙ୍କ ଏତାଲାକୁ ଭିତ୍ତିକରି ପୋଲିସ ଏକ ବଳାତ୍କାର ମାମଲା(ନଂ. ୧୪୨/୨୧) ରୁଜୁ କରିଥିଲା। ପୋଲିସ ଅଭିଯୁକ୍ତ ଓ ପୀଡ଼ିତାଙ୍କ ଡାକ୍ତରୀମାଇନା କରାଇଛି।
