ବଞ୍ଚୋ,୨୨।୩(ପ୍ରଦୋଷ କୁମାର ବିଶ୍ୱାଳ ): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ଚୋରଗାଡ଼ିଆ ଗ୍ରାମରେ ସରକାରୀ ଜମି ଜବରଦଖଲକୁ ନେଇ ଜନଅସନ୍ତୋଷ ଦେଖାଦେଇଛି । ଗ୍ରାମବାସୀଙ୍କ ଅଭିଯୋଗ ଅନୁସାରେ, ଗ୍ରାମରେ ଥିବା ପ୍ରାୟ ୮ ଏକର ସରକାରୀ ଜମିରୁ କିଛି ବ୍ୟକ୍ତି ଅବୈଧ ଭାବେ ଦଖଲ କରି ରଖିଛନ୍ତି । ଏହାର ପରିଣାମରେ ଗାଁକୁ ଆମ୍ବୁଲାନ୍ସ ଓ ଦମକଳ ଯାନ ପ୍ରବେଶ କରିପାରୁ ନାହିଁ । ଫଳରେ ଗ୍ରାମବାସୀ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିବା ନେଇ ଅଭିଯୋଗ କରିଛନ୍ତି ।
ଗ୍ରାମବାସୀମାନେ ୨୦୧୯ ମସିହାରୁ ସରକାରୀ ଜମି ମାପ ଓ ଚିହ୍ନଟ ପାଇଁ ବାରମ୍ବାର ଆବେଦନ କରୁଥିଲେ ମଧ୍ୟ ଏପର୍ଯ୍ୟନ୍ତ ତହସିଲ ପ୍ରଶାସନ ପକ୍ଷରୁ ପ୍ରୟୋଜନୀୟ ପଦକ୍ଷେପ ଗ୍ରହଣ କରାଯାଇନାହିଁ । ଜମି ଚିହ୍ନଟ ପ୍ରକ୍ରିୟା ବିଳମ୍ବ ହେବାରୁ ରାସ୍ତା ସମ୍ପ୍ରସାରଣ କାମ ମଧ୍ୟ ବାଧାଗ୍ରସ୍ତ ହୋଇ ରହିଛି । ଏ ସମ୍ପର୍କରେ ପୂର୍ବରୁ ତହସିଲଦାର, ଉପଜିଲାପାଳ, ଜିଲାପାଳ, ରାଜସ୍ୱ ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ଦିଆଯାଇଥିଲେ ମଧ୍ୟ ସମସ୍ୟାର ସମାଧାନ ହୋଇପାରିନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି ।
ଏହାର ପ୍ରତିବାଦରେ ଗୁରୁବାର ଦିନ ଗ୍ରାମବାସୀ ହାଟଡିହି ତହସିଲ କାର୍ଯ୍ୟାଳୟକୁ ଘେରାଉ କରି ତୁରନ୍ତ ଜବରଦଖଲ ହଟାଇବାକୁ ଦାବି କରିଥିଲେ । ଗୋବର୍ଦ୍ଧନ ସାହୁ, ଭାଗୀରଥି ନାୟକ, ସୁଧାଂଶୁ ଶେଖର ଜେନା, କୋଦଣ୍ଡ ଦାସ, ଲଛମନ ବେହେରା, ମାର୍କଣ୍ଡ ବେହେରା, ନବଘନ ସାହୁ, କୈଳାସ ନାୟକ, ଅଖିଳ ଦାସ, ବୀରବର ଦାସ, କୃଷ୍ଣଚନ୍ଦ୍ର ସାହୁ, ଶ୍ରୀଧର ସାହୁ, ରବୀନ୍ଦ୍ର ଦାସ, ନରେନ୍ଦ୍ର ସାମଲ, ସୌଭାଗ୍ୟ ସନ୍ଦୀପ ସାମଲ ଏବଂ ରାମଚନ୍ଦ୍ର ସାହୁ ପ୍ରମୁଖ ଏହି ଦାବିରେ ସାମିଲ ହୋଇଥିଲେ । ଗ୍ରାମବାସୀ କହିଛନ୍ତି ପ୍ରଶାସନ ନଶୁଣିଲେ ରାଜରାସ୍ତା ଅବରୋଧ ସହ ତହସିଲ ଘେରାଉ କରିବେ ବୋଲି କଡା ଚେତାବନୀ ଦେଇଛନ୍ତି ।