ନୂଆଦିଲ୍ଲୀ,୬।୫: ଘରୋଇ ଚାକିରି କରୁଥିବା ଲୋକଙ୍କ ପାଇଁ EPF ଏକ ନିର୍ଭରଯୋଗ୍ୟ ଯୋଜନା। ଏହା ଅବସର ପରେ ବହୁତ ସାହାଯ୍ୟ କରେ। ଇପିଏଫ୍ରେ ଜମା ହୋଇଥିବା ଟଙ୍କା ଉପରେ ଟିକସ ଛାଡ଼ ଏବଂ ଭଲ ସୁଧ ମଧ୍ୟ ଉପଲବ୍ଧ ହୋଇଥାଏ। ଏଭଳି ସ୍ଥିତିରେ ଯଦି କେହି ନିକଟରେ ଚାକିରି ବଦଳାଇଛନ୍ତି ଏବଂ ଆପଣଙ୍କର ପୁରୁଣା EPF ଆକାଉଣ୍ଟକୁ ନୂତନ କମ୍ପାନୀକୁ ସ୍ଥାନାନ୍ତର କରିନାହାନ୍ତି, ତେବେ ମନରେ ଅନେକ ପ୍ରଶ୍ନ ଆସୁଥାଇପାରେ। ଯେମିତିକି ପୁରୁଣା EPF ଆକାଉଣ୍ଟରେ ସୁଧ ମିଳିବ କି ନାହିଁ, ତେଣୁ ଜାଣି ରଖନ୍ତୁ…
ଯେତେବେଳେ ଆପଣ ଚାକିରି ପରିବର୍ତ୍ତନ କରନ୍ତି, ଆପଣଙ୍କର EPF ଆକାଉଣ୍ଟ ସ୍ବୟଂଚାଳିତ ଭାବରେ ନୂତନ କମ୍ପାନୀକୁ ସ୍ଥାନାନ୍ତରିତ ହୁଏ ନାହିଁ। ଏଥିପାଇଁ ଆପଣଙ୍କୁ EPFO ସଦସ୍ୟ ସେବା ପୋର୍ଟରୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ କରିବାକୁ ପଡିଥାଏ। ଯେପର୍ଯ୍ୟନ୍ତ ଆପଣ ଏହା ନ କରିଛନ୍ତି, ସେପର୍ଯ୍ୟନ୍ତ ଆପଣଙ୍କର ଟଙ୍କା ପୁରୁଣା EPF ଆକାଉଣ୍ଟରେ ରହିବ। ଆପଣଙ୍କର UAN ନମ୍ବର ସମାନ ରହିଥାଏ, କିନ୍ତୁ ଆକାଉଣ୍ଟ ସ୍ଥାନାନ୍ତରିତ ହୁଏ ନାହିଁ। କିନ୍ତୁ କିଛି ଲୋକଙ୍କ ମନରେ ଏହି ପ୍ରଶ୍ନ ମଧ୍ୟ ଆସେ ଯେ EPF ଆକାଉଣ୍ଟ ସ୍ଥାନାନ୍ତର ନହେଲେ ମଧ୍ୟ ସୁଧ ମିଳିବ କି?
EPFO ନିୟମ ଅନୁସାରେ, ଯଦି ଆପଣଙ୍କର EPF ଆକାଉଣ୍ଟ ନିଷ୍କ୍ରିୟ ଥାଏ, ତେବେ ଏହା ୩୬ ମାସ ଅର୍ଥାତ ୩ ବର୍ଷ ପାଇଁ ସୁଧ ଦେଇଥାଏ। ଏହି ସୁଧ ଶେଷ EPF ଅବଦାନରୁ ଗଣନା କରାଯାଏ। ଯଦି ୩୬ ମାସ ପାଇଁ କୌଣସି ଅବଦାନ ଦିଆଯାଇ ନାହିଁ ଏବଂ କର୍ମଚାରୀ ଆଉ ଚାକିରି କରୁନାହାଁନ୍ତି କିମ୍ବା ଅବସର ନେଇଛନ୍ତି, ତେବେ ଆକାଉଣ୍ଟଟି ନିଷ୍କ୍ରିୟ ହୋଇଯାଏ ଏବଂ ଏଥିରେ ସୁଧ ବନ୍ଦ ହୋଇଯାଏ।
ଯଦି ଆପଣ ଚାକିରି ପରିବର୍ତ୍ତନ କରିବା ପରେ ଆପଣଙ୍କର EPF ଆକାଉଣ୍ଟ ସ୍ଥାନାନ୍ତର କରିନାହାନ୍ତି, ତେବେ ଆପଣଙ୍କୁ ପୁରୁଣା ଆକାଉଣ୍ଟ ଉପରେ କେବଳ ତିନି ବର୍ଷ ପାଇଁ ସୁଧ ମିଳିବ। ଏହା ପରେ ସୁଧ ଦେବା ବନ୍ଦ ହୋଇଯିବ। ଏହାଦ୍ୱାରା କ୍ଷତି ହେବ। କାରଣ ୨୦୨୪-୨୫ ଆର୍ଥିକ ବର୍ଷ ପାଇଁ, EPFO ୮.୨୫ ପ୍ରତିଶତ ସୁଧ ହାରକୁ ଅନୁମୋଦନ କରିଛି।
