ନବରଙ୍ଗପୁର,୨୪।୫(ସଦାଶିବ ପ୍ରହରାଜ): ନବରଙ୍ଗପୁର ଜିଲା ଚନ୍ଦାହାଣ୍ଡି ଥାନା ଅଞ୍ଚଳରେ ନିଜ ବଳଦକୁ ନେଇ ଚନ୍ଦାହାଣ୍ଡିରୁ ରାଇଘରକୁ ନେବା ସମୟରେ ବଜରଙ୍ଗ ଦଳ ସଦସ୍ୟ କହୁଥିବା କିଛି ବ୍ୟକ୍ତି ଚନ୍ଦାହାଣ୍ଡି ଥାନା ଅଧିନସ୍ତ ଲୋଧୁଆ ପଡ଼ା ଗ୍ରାମ ନିକଟରେ ଅଟକେଇ ଥିଲେ । ସେମାନଙ୍କୁ ୪୪ ଡିଗ୍ରୀ ଖରାରେ କାନ ଧରି ଆଣ୍ଠେଇ ଅଶ୍ଲୀଳ ଭାଷାରେ ଗାଳିଗୁଲଜ କରିଥିଲେ । ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା ।
ଏହାପରେ ଚନ୍ଦାହାଣ୍ଡି ବ୍ଲକର ଅନୁସୂଚିତ ଜାତି ଜନଜାତି, ପଛୁଆ ବର୍ଗ ଏବଂ ସଂଖ୍ୟାଲଘୁ ସମ୍ପ୍ରଦାୟର ଶତାଧିକ ବ୍ୟକ୍ତି ଆଜି ସକାଳୁ ଚନ୍ଦାହାଣ୍ଡି ଥାନା ଘେରାଉ କରିଛନ୍ତି । ପୋଲିସ ସମସ୍ତ ଅଭିଯୁକ୍ତକୁ ଗିରଫ ନକରିବା ପର୍ଯ୍ୟନ୍ତ ଥାନା ସମ୍ମୁଖରୁ ହଟିବୁ ନାହିଁ ବୋଲି ଚେତାବନି ଦେଇଛନ୍ତି । ପୋଲିସ ଜଣେ ଅଭିଯୁକ୍ତ ଶ୍ରୀମନ୍ତ ରଥକୁ ଅଟକ ରଖିଥିବା ସହ ଚନ୍ଦାହାଣ୍ଡି ଥାନାରେ ଏକ ମାମଲା ରୁଜୁ ହୋଇଥିବା ପୋଲିସ ପ୍ରକାଶ କରିଛି ।
ଗତ ୨୧ ତାରିଖ ଗୁରୁବାର ଦିନ ରାଇଘର ଭାରସୋଣ୍ଡି ଅଞ୍ଚଳର କିଛି ବଙ୍ଗୀୟ, ଆଦିବାସୀ, ଗୌଡ଼ ସମ୍ପ୍ରଦାୟର କିଛି ଚାଷୀମାନେ ନିଜ ଗୁରୁ ଗୁଡ଼ିକୁ ଚନ୍ଦାହାଣ୍ଡି ବ୍ଲକର ଡହିମାଲ ଗ୍ରାମରେ ଚରେଇବାକୁ ଦେଇଥିଲେ । ତେବେ ଚାଷ ଋତୁ ପାଖେଇ ଆସିଥିବାରୁ ନିଜ ଗାଁକୁ ବଳଦ ସବୁକୁ ନେଇକି ଯାଉଥିଲେ। ଏହି ସମୟରେ ନିଜକୁ ବଜରଙ୍ଗ ଦଳ ସଦସ୍ୟ ବୋଲି ପରିଚୟ ଦେଇ ଚାଷୀମାନଙ୍କୁ ବଳଦ ସହ ଅଟକାଇଥିଲେ । ପ୍ରଚଣ୍ଡ ଖରାରେ ଆଣ୍ଠେଇ ଆଣ୍ଠେଇ ଚଲାଇ ଚଲାଇ ନେଇଥିଲେ ଓ ବିଭିନ୍ନ ପ୍ରକାର ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହ ଜାତିଆଣ ଆକ୍ଷେପ କରି ଏହାର ଭିଡ଼ିଓ ଉତ୍ତୋଳନ କରି ସାମାଜିକ ଗଣମାଧ୍ୟମରେ ଛାଡିଥିଲେ।
ତେବେ ଏହି ସବୁ ଭିଡିଓ ଭାଇରାଲ ପରେ ଏହା ଚନ୍ଦା ହାଣ୍ଡି ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବିଭିନ୍ନ ମହଲରେ ଏହି ଘଟଣାକୁ ତୀବ୍ର ନିନ୍ଦା କରିଥିବା ବେଳେ ଆଜି ଚନ୍ଦା ହାଣ୍ଡି ବ୍ଲକ୍ ଏସସି,ଏସଟି ଓବିସୀ ଓ ସଂଖ୍ୟାଲଘୁ ମହା ସଂଘ ବଜାର ପଡ଼ିଆରେ ଏକତ୍ରିତ ହୋଇ ଚନ୍ଦା ହାଣ୍ଡି ଥାନାକୁ ଯାଇଥିଲେ । ଥାନ ଘେରାଉ କରି ସଂମ୍ପୃକ୍ତ ଅଭିଯୁକ୍ତମାନଙ୍କୁ ଗିରଫ ନହେବା ପର୍ଯ୍ୟନ୍ତ ଥାନା ସାମ୍ନାରେ ଧାରଣା ଦେବେ ବୋଲି ଆନ୍ଦୋଳନକାରୀମାନେ କହିଛନ୍ତି ।
