ହାଇଦ୍ରାବାଦ,୧୦।୩: ଦୁବାଇରେ ଅନୁଷ୍ଠିତ ଚାମ୍ପିଅନ୍ସ ଟ୍ରଫିର ଫାଇନାଲରେ ଭାରତ ଏକ ବଡ଼ ବିଜୟ ହାସଲ କରିଛି। ଏବେ ଭାରତୀୟ କ୍ରିକେଟ ଦଳର ପ୍ରଶଂସକଙ୍କ ମଧ୍ୟରେ ଏକ ଉତ୍ସବର ପରିବେଶ ଥିଲା, କିନ୍ତୁ ଭାରତୀୟ ଜନତା ପାର୍ଟି ଅଭିଯୋଗ କରିଛି ଯେ ତେଲଙ୍ଗାନା ପୋଲିସ ଚାମ୍ପିଅନ୍ସ ଟ୍ରଫିରେ ଭାରତର ବିଜୟ ଉତ୍ସବ ପାଳନ କରୁଥିବା ଲୋକଙ୍କ ଉପରେ ଲାଠିଚାର୍ଜ କରିଥିଲା। ଭାଜପା ନେତା ଏହାର ଭିଡିଓ ସୋସିଆଲ ମିଡିଆରେ ଶେୟାର କରି କଂଗ୍ରେସ ସରକାର ଉପରେ ପ୍ରଶ୍ନ ଉଠାଇଛନ୍ତି।
ଭାରତୀୟ ଜନତା ପାର୍ଟିର ଆଇଟି ସେଲ ମୁଖ୍ୟ ଅମିତ ମାଲବ୍ୟ ଲାଠିଚାର୍ଜର ଭିଡିଓ ଶେୟାର କରି ଲେଖିଛନ୍ତି, ‘ହାଇଦ୍ରାବାଦ ପୋଲିସ ଦିଲସୁଖନଗରରେ ନାଗରିକମାନଙ୍କୁ ଭାରତର ଚାମ୍ପିଅନ୍ସ ଟ୍ରଫି ବିଜୟର ଉତ୍ସବ ପାଳନ କରିବାରୁ ରୋକିବା ପାଇଁ ଲାଠିଚାର୍ଜ କରିଥିଲା। କରିମନଗରରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଥିଲା। ଏହା କ’ଣ କଂଗ୍ରେସ ଶାସିତ ରାଜ୍ୟଗୁଡ଼ିକରେ ଏକ ନୂତନ ଚାଲ ବୋଲି ସେ ପ୍ରଶ୍ନ କରିଛନ୍ତି। ସେମାନେ ପ୍ରକୃତରେ କାହାକୁ ଖୁସି କରିବାକୁ ଚେଷ୍ଟା କରୁଛନ୍ତି ବୋଲଇ ମଧ୍ୟ ସେ କହିଛନ୍ତି। ଭାରତୀୟମାନେ ସେମାନଙ୍କ ଦେଶର ବିଜୟ କେଉଁଠାରେ ପାଳନ କରିବା ଉଚିତ?
ମଧ୍ୟପ୍ରଦେଶର ଇନ୍ଦୋର ନିକଟସ୍ଥ ମହୁରେ, ଚାମ୍ପିଅନ୍ସ ଟ୍ରଫିରେ ଭାରତର ବିଜୟ ପରେ ଉତ୍ସବ ପାଳନ ସମୟରେ ଦୁଇଟି ଗୋଷ୍ଠୀ ମୁହାଁମୁହିଁ ହୋଇଥିଲେ। ଏହି ସଂଘର୍ଷ ମହୁରେ ଜାମା ମସଜିଦ ନିକଟରେ ଘଟିଥିଲା ଯେଉଁଠାରେ ବିଜୟ ଶୋଭାଯାତ୍ରା ବାହାର କରୁଥିବା ଲୋକଙ୍କର ଅନ୍ୟ ଏକ ଗୋଷ୍ଠୀ ସହ ଯୁକ୍ତିତର୍କ ହୋଇଥିଲା ଏବଂ କିଛି ସମୟ ମଧ୍ୟରେ ଯୁକ୍ତିତର୍କ ବଢ଼ି ଯାଇଥିଲା ଏବଂ ପଥର ଫିଙ୍ଗିବା ଆରମ୍ଭ ହୋଇଯାଇଥିଲା। ପରିସ୍ଥିତି ନିୟନ୍ତ୍ରଣ ବାହାରକୁ ଯିବାରୁ, ଦୁର୍ବୃତ୍ତମାନେ ଭଙ୍ଗାରୁଜା ଆରମ୍ଭ କରିଦେଲେ। ଅଞ୍ଚଳର ଦୁଇଟି ଦୋକାନ ପୋଡ଼ି ଦିଆଯାଇଛି ଏବଂ ଦୁଇଟି ଗାଡ଼ି ନଷ୍ଟ ହୋଇଯାଇଥିବା ମଧ୍ୟ କୁହାଯାଇଛି।
