ରାଞ୍ଚି, ୨।୨ ଶୁକ୍ରବାର ଝାଡ଼ଖଣ୍ଡର ନୂତନ ମୁଖ୍ୟମନ୍ତ୍ରୀ ଭାବେ ଶପଥ ନେବେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍)ର ବିଧାୟକ ଦଳ ନେତା ଚମ୍ପାଇ ସୋରେନ। ରାଜ୍ୟପାଳ ସି. ପି. ରାଧାକ୍ରିଷ୍ଣନ ଚମ୍ପାଇଙ୍କୁ ମୁଖ୍ୟମନ୍ତ୍ରୀ ଭାବେ ଶପଥ ନେବା ପାଇଁ ନିମନ୍ତ୍ରଣ କରିଛନ୍ତି। ଏହା ସହ ୧୦ ଦିନ ମଧ୍ୟରେ ବିଧାନସଭାରେ ନିଜ ସଂଖ୍ୟାଗରିଷ୍ଠତା ପ୍ରମାଣ କରିବାକୁ ଚମ୍ପାଇଙ୍କୁ ନିର୍ଦ୍ଦେଶ ଦେଇଛନ୍ତି ରାଜ୍ୟପାଳ।
ଗୁରୁବାର ସାରେ ଚମ୍ପାଇଙ୍କ ନେତୃତ୍ୱରେ କଂଗ୍ରେସ, ଜେଏମ୍ଏମ୍ ଓ ଆର୍ଜେଡିର ବିଧାୟକମାନେ ଝାଡ଼ଖଣ୍ଡ ରାଜ୍ୟପାଳ ସି. ପି. ରାଧାକ୍ରିଷ୍ଣନଙ୍କୁ ଭେଟିଥିଲେ। ୪୩ ବିଧାୟକଙ୍କ ସମର୍ଥନ ତାଙ୍କ ସହ ରହିଥିବାନେଇ ରାଜ୍ୟପାଳଙ୍କୁ ଜଣାଇଥିଲେ ଚମ୍ପାଇ। ଏହା ପୂର୍ବରୁ ଚମ୍ପାଇଙ୍କ ନିକଟରେ ୪୩ ବିଧାୟକଙ୍କ ସମର୍ଥନ ରହିଥିବା ନେଇ ଜେଏମ୍ଏମ୍ ପକ୍ଷରୁ ଏକ ଭିଡିଓ ବାର୍ତ୍ତା ଜାରି କରାଯାଇଥିଲା।
ତେବେ ଗୁରୁବାର ରାତିରେ ରାଜ୍ୟପାଳଙ୍କ ଦ୍ୱାରା ନୂତନ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ବିଳମ୍ବ ହେବା ଆଶଙ୍କା କରି ଚମ୍ପାଇଙ୍କୁ ସମର୍ଥନ କରୁଥିବା ସମସ୍ତ ବିଧାୟକ ଏକ ବସ ଯୋଗେ ରାଞ୍ଚି ବିମାନବନ୍ଦରକୁ ଯାଇଥିଲେ। ସମସ୍ତ ବିଧାୟକ ଭାଜପା ଦ୍ୱାରା ଘୋଡ଼ାବେପାର କରାଯିବା ଭୟରେ ସ୍ବତନ୍ତ୍ର ବିମାନ ଯୋଗେ ହାଇଦ୍ରାବାଦକୁ ଯିବା ନେଇ ଚର୍ଚ୍ଚା ଜୋର ଧରିଥିଲା। ଖରାପ ପାଗ ଯୋଗୁଁ ଦୃଶ୍ୟମାନ କ୍ଷମତା କମ ଥିବାରୁ ବିଧାୟକମାନେ ବିମାନବନ୍ଦରରୁ ଫେରି ଆସିଥିଲେ।
