ଭଞ୍ଜନଗର,୨୭ା୨(ବାବୁଲା ପ୍ରଧାନ):ଘୁମୁସର ବୀର ଚକରା ବିଷୋୟୀଙ୍କ ସ୍ମୃତିକୁ ବଜାୟ ରଖିବା ପାଇଁ ଦେଶ ସାଧୀନତାର ୭୮ ବର୍ଷ ପରେ ବର୍ତ୍ତମାନର ଭାଜପା ସରକାର ଉଦ୍ୟମ ଆରମ୍ଭ କରିଛନ୍ତି। ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକଙ୍କ ଉଦ୍ୟମରେ ଚକରା ଘାଟିର ଉନ୍ନତିକରଣ କାର୍ଯ୍ୟ ଆରମ୍ଭ ହୋଇଛି। ଏହାକୁ ନେଇ ଅଞ୍ଚଳବାସୀ ଖୁସି ପ୍ରକଟ କରିଛନ୍ତି। ଇତିମଧ୍ୟରେ ଘାଟିର ବିକାଶ ପାଇଁ ପ୍ରାୟ ୬ କୋଟି ଟଙ୍କା ଜଙ୍ଗଲ ବିଭାଗ ପକ୍ଷରୁ ଅନୁମୋଦନ ହୋଇଛି। ଠିକାଦାର କାମ ୧୦ ଦିନ ହେବ ଆରମ୍ଭ କରିଛନ୍ତି। ଆଗାମୀ ଦିନରେ ସମ୍ପୃକ୍ତ ଅଞ୍ଚଳର ଅନ୍ୟାନ୍ୟ ବିକାଶ ପାଇଁ ଆହୁରି ୨ଶହ କୋଟି ଟଙ୍କା ଅନୁଦାନ ଆସିବ। କାର୍ଯ୍ୟ କିଭଳି ଠିକ ଭାବେ ହେବ ସେଥିପାଇଁ ଭଞ୍ଜନଗର ବିଧାୟକ ନାୟକ ବାରମ୍ବାର ଉକ୍ତ ଘାଟି ପରିଦର୍ଶନ କରି କାର୍ଯ୍ୟ ସମୀକ୍ଷା କରୁଛନ୍ତି । ଗୁରୁବାର ଆରସିସିଏଫ ସଞ୍ଜୟ ସ୍ବାଇଁ, ଡିଏଫଓ ହିମାଂଶୁ ଶେଖର ମହାନ୍ତି, ଏସିଏଫ୍ ଡ. ରଶ୍ମି ରଞ୍ଜନ ସାଇଁ, ଗାଲେରି ରେଞ୍ଜର ଆଶାଲତା ଦିଗାଲ, ବନପାଳ ଶୁଭସ୍ମିତା ପାତ୍ର ପ୍ରମୁଖ ଚକରା ଘାଟି ପରିଦର୍ଶନ କରି ଘାଟିର ବିକାଶ ପାଇଁ ନିଆଯାଇଥିବା ପଦକ୍ଷେପ ଏବଂ କାମ କିଭଳି ଚାଲିଛି ତାହାର ସମୀକ୍ଷା କରିଥିଲେ। ଏହି ସମୟରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଚୁକ୍ତି ଅନୁସାରେ କାମ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିରେ ଖିଲାପ କଲେ ଦୃଢ଼ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି। ଏହି ଅର୍ଥରେ ଘାଟିରେ ଦୁଇଟି ୱାଚ ଟାୱାର, ପୋଖରୀ, ମନ୍ଦିର, ରୋଷେଇ ଘର, ପାଚେରି, ପିଇବା ପାଣି ଆଦି ବ୍ୟବସ୍ଥା କରାଯିବାକୁ ଲକ୍ଷ୍ୟ ରଖାଯାଇଛି।
ସ୍ବାଧୀନତା ସଂଗ୍ରାମ ବେଳେ ବ୍ରିଟିଶଙ୍କ ବିରୋଧରେ ଘୁମୁସର ବୀର ଚକରା ବିଷୋୟୀ ଲଢ଼େଇ କରିଥିଲେ। ଏଥିପାଇଁ ସେ ତିଲିସିଙ୍ଗୀଠାରୁ ୧୦ କି.ମି. ଦୂର ଘଞ୍ଚ ଜଙ୍ଗଲ ଭିତରେ ଚନ୍ଦ୍ରଗିରି ଜଙ୍ଗଲରେ ଘାଟି ପ୍ରସ୍ତୁତ କରିଥିଲେ। ଚକରାଙ୍କୁ ୧୪ ବର୍ଷ ବୟସ ହୋଇଥିବା ବେଳେ ୧୮୩୬ରେ ସେ ବ୍ରିଟିଶମାନଙ୍କ ବିରୋଧରେ ଲଢେଇ ପାଇଁ ପଦକ୍ଷେପ ନେଇଥିଲେ। ଉକ୍ତ ଘାଟିରେ ଚକରା ରହି ଆଦିବାସୀମାନଙ୍କୁ ମେଳି କରି ଲଢ଼େଇ କରୁଥିଲେ। ଏଥିସହ ସେ ରାଜ୍ୟର ବିଭିନ୍ନ ଅଞ୍ଚଳ ବୁଲି ବ୍ରିଟିଶ ଶାସକଙ୍କ ବିରୋଧରେ ମେଳି କରି ଲଢ଼େଇ କରୁଥିଲେ। ୧୮୪୨ରେ ଚକରା ଘୁମୁସର ନୂଆଗାଁରେ ହୋଇଥିବା ବ୍ରିଟିଶଙ୍କ ଶିବିରକୁ ପୋଡ଼ି ଦେଇଥିଲେ। ଏଥିରେ ବ୍ରିଟିଶ ଶାସକଙ୍କ ବ୍ୟାପକ କ୍ଷୟକ୍ଷତି ହୋଇଥିଲା। ଚକରାଙ୍କ ବୀରତ୍ୱ ଦେଖି ବ୍ରିଟିଶମାନେ ତାଙ୍କୁ ଧରିବା ପାଇଁ ଅନେକ ଚେଷ୍ଟା କରିଥିଲେ। ମାତ୍ର ଚକରା ଧରା ପଡ଼ି ନ ଥିଲେ। ସେ କେବେ ମୃତ୍ୟୁବରଣ କରିଛନ୍ତି କିଭଳି ମୃତ୍ୟୁବରଣ କରିଛନ୍ତି ତାହାର କିଛି ଇତିହାସ ନାହିଁ। କିନ୍ତୁ ଚକରା ଯେଉଁ ଘାଟିରେ ରହି ଲଢ଼େଇ କରୁଥିଲେ ତାହା ଆଜି ପର୍ଯ୍ୟନ୍ତ ରହିଛି। ଦେଶ ସାଧୀନତା ପରେ ଚକରା ଘାଟିର ବିକାଶ ପାଇଁ ଏପର୍ଯ୍ୟନ୍ତ ସରକାର ଟଙ୍କାଟିଏ ଅନୁଦାନ ଦେଇ ନ ଥିଲେ। କିଛି ବର୍ଷ ତଳେ ସମ୍ପୃକ୍ତ ଅଞ୍ଚଳରେ ରେଞ୍ଜର ଥିବା ତଥା ବର୍ତ୍ତମାନର କେନ୍ଦୁପତ୍ର ଫୁଲବାଣୀ ଡିଭିଜନର ଡିଏଫଓ ଶରତ ମିଶ୍ର ନିଜ ଉଦ୍ୟମରେ ଘାଟିରେ ଛୋଟିଆ ମନ୍ଦିରଟିଏ ନିର୍ମାଣ କରିଥିଲେ। ବର୍ତ୍ତମାନ ପ୍ରଦ୍ୟୁମ୍ନ ନାୟକ ବିଧାୟକ ନିର୍ବାଚିତ ହେବା ପରେ ଘୁମୁସର ମାଟିର ବୀରପୁତ୍ରମାନଙ୍କ ସ୍ମୃତି ରକ୍ଷା ପାଇଁ ପଦକ୍ଷେପ ନେଇଛନ୍ତି। ଏନେଇ ପରିବେଶବିତ୍ ରମେଶ ପାତ୍ର କହନ୍ତି, ଘାଟିର ସୁରକ୍ଷା ସହ ବନ୍ୟପ୍ରାଣୀ ଏବଂ ଜଙ୍ଗଲ ସୁରକ୍ଷା ପାଇଁ ସରକାର ପଦକ୍ଷେପ ନେଇଛନ୍ତି। ଏହା ପ୍ରଶଂସନୀୟ ପଦକ୍ଷେପ। ସେହିଭଳି ଚକରା ବିଷୋୟୀ କଲଚୁରାଲ ଟ୍ରଷ୍ଟର କର୍ମକର୍ତ୍ତା ଜଗବନ୍ଧୁ ଜେନା କହିଛନ୍ତି, ଚକରା ପ୍ରଥମେ ବ୍ରିଟିଶ ଶାସକଙ୍କ ବିରୋଧରେ ଲଢେଇ କରିଥିଲେ।
ଫୋଟ ୨୭a ବିଧାୟକ ପ୍ରଦ୍ୟୁମ୍ନ କୁମାର ନାୟକ ଉନ୍ନୟନ କାର୍ଯ୍ୟ ତଦାରଖ କରୁଛନ୍ତି।
ଫୋଟ ୨୭b ଆର୍ସିସିଏଫ୍ ଏବଂ ଅନ୍ୟମାନେ ସମୀକ୍ଷା କରୁଛନ୍ତି।
