ନୂଆଦିଲ୍ଲୀ,୧୨।୯ : ରଦ୍ଦି କାଗଜରୁ କେନ୍ଦ୍ର ସରକାର ହଜାରେ କୋଟି ଟଙ୍କା ରୋଜଗାର କରିବେ। ବାସ୍ତବରେ କେନ୍ଦ୍ର ସରକାର ଆସନ୍ତା ମାସରୁ ସ୍ବଚ୍ଛତା ଅଭିଯାନର ତୃତୀୟ ସଂସ୍କରଣ ଆରମ୍ଭ କରିବାକୁ ଯାଉଛନ୍ତି। ଏହି ସମୟ ମଧ୍ୟରେ କେନ୍ଦ୍ର ସରକାର ସରକାରୀ କାର୍ଯ୍ୟାଳୟ ସଫା କରିବା ପରେ ବାହାରୁଥିବା ଅଦରକାରୀ ଫାଇଲ କିମ୍ବା ଅନ୍ୟାନ୍ୟ ବର୍ଜ୍ୟବସ୍ତୁ ବିକ୍ରୟ କରି ପ୍ରାୟ ହଜାରେ କୋଟି ଟଙ୍କା ରୋଜଗାର କରିବେ।
ପ୍ରଶାସନିକ ସଂସ୍କାର ଏବଂ ଜନ ଅଭିଯୋଗ ବିଭାଗର ସଚିବ ଭି ଶ୍ରୀନିବାସ କହିଛନ୍ତି ବିଚାରାଧୀନ ମାମଲାଗୁଡ଼ିକର ଆନୁଷ୍ଠାନିକ ସମାପ୍ତି ଏବଂ ଶୀଘ୍ର ସମାଧାନ ପାଇଁ କେନ୍ଦ୍ର ସରକାର କାର୍ଯ୍ୟ କରୁଛନ୍ତି। ସ୍ବଚ୍ଛତା ଅଭିଯାନର ସ୍ବତନ୍ତ୍ର ଅଭିଯାନ ୩.୦ ଅକ୍ଟୋବର ୨ରୁ ଆରମ୍ଭ ହେବାକୁ ଯାଉଛି ଏବଂ ଅକ୍ଟୋବର ୩୧ ପର୍ଯ୍ୟନ୍ତ ଏହା ଚାଲିବ। ଏହି ଅବଧି ମଧ୍ୟରେ ସମସ୍ତ ସରକାରୀ କାର୍ଯ୍ୟାଳୟରେ ସଫେଇ କାର୍ଯ୍ୟ କରାଯିବ। ୧୯୮୯ ବ୍ୟାଚ ଆଇଏଏସ ଅଧିକାରୀ ଏସ ଶ୍ରୀନିବାସ କହିଛନ୍ତି ସ୍ବଚ୍ଛତା ଅଭିଯାନର ଦ୍ୱିତୀୟ ସଂସ୍କରଣ ଅତ୍ୟନ୍ତ ସଫଳ ହୋଇଛି ଏବଂ ଏହି ସମୟରେ ବର୍ଷସାରା ସମସ୍ତ ମନ୍ତ୍ରଣାଳୟ ଏବଂ ସରକାରୀ ବିଭାଗରେ ସ୍ବଚ୍ଛତା ପ୍ରତି ସପ୍ତାହରେ ତିନି ଘଣ୍ଟା ଦିଆଯାଇଥିଲା।
ଏହି ଅଭିଯାନରେ ୧୦୦ ରୁ ଅଧିକ ନୋଡାଲ ଅଧିକାରୀଙ୍କୁ ଏହି ସ୍ବଚ୍ଛତା ଡ୍ରାଇଭ ଦାୟିତ୍ୱ ଦିଆଯାଇଛି। ସ୍ବଚ୍ଛତା ଅଭିଯାନର ଦ୍ୱିତୀୟ ସଂସ୍କରଣ ସମୟରେ ୧.୩୭ ଲକ୍ଷ ସ୍ଥାନ ସଫା କରାଯାଇଥିଲା ଏବଂ ଏହି ସମୟ ମଧ୍ୟରେ ଉତ୍ପାଦିତ ଅଳିଆରୁ ପ୍ରାୟ ୫୨୦ କୋଟି ଟଙ୍କା ରୋଜଗାର କରାଯାଇଥିଲା । ଦ୍ୱିତୀୟ ସଂସ୍କରଣ ସମୟରେ ସରକାରୀ କାର୍ଯ୍ୟାଳୟରୁ ପ୍ରାୟ ୫୦ ଲକ୍ଷ ଫାଇଲ ହଟାଯାଇଥିଲା ଏବଂ ଏହା ୧୭୨ ଲକ୍ଷ ବର୍ଗଫୁଟ ଅଫିସ ସ୍ଥାନ ମୁକ୍ତ କରିଥିଲା। ୩୧.୩୫ ଲକ୍ଷ ମାମଲା ସନାଧାନ କରାଯାଇଥିଲା। ବର୍ତ୍ତମାନ ତୃତୀୟ ସଂସ୍କରଣ ଅଧୀନରେ, ପ୍ରାୟ ହଜାରେ କୋଟି ଟଙ୍କା ମୂଲ୍ୟର ସ୍କ୍ରାପ ୩୧ ଅକ୍ଟୋବର ୨୦୨୩ ସୁଦ୍ଧା ପୁନରୁଦ୍ଧାର ହୋଇପାରିବ। ଏହା ସହିତ ୧୦୦ ଲକ୍ଷ ବର୍ଗ ଫୁଟ ଅଫିସ ସ୍ଥାନ ମୁକ୍ତ କରାଯିବାର ଲକ୍ଷ୍ୟ ରହିଛି।
