ନୂଆଦିଲ୍ଲୀ, ୬।୧୨(ପି.ଟି.): କେନ୍ଦ୍ର ସରକାରଙ୍କ ବିବାଦୀୟ କୃଷି ଆଇନକୁ ବିରୋଧ କରି ବିଭିନ୍ନ କୃଷକ ସଂଗଠନ ପକ୍ଷରୁ ଦିଲ୍ଲୀ ସୀମାରେ ଆନ୍ଦୋଳନ ଜାରି ରହିଥିବାବେଳେ ଶନିବାର କେନ୍ଦ୍ର ସରକାରଙ୍କ ସହ ପଞ୍ଚମ ପର୍ଯ୍ୟାୟ ଆଲୋଚନା ବିନା ନିଷ୍କର୍ଷରେ ଶେଷ ହୋଇଛି। ନୂଆ ଆଇନ ପ୍ରତ୍ୟାହାର ଦାବିରେ କୃଷକମାନେ ଅଟଳ ରହିବା ଫଳରେ ଆଭ୍ୟନ୍ତରୀଣ ବିଚାରବିମର୍ଶ ଲାଗି ସରକାର ସମୟ ମାଗିଥିଲେ। ବୁଧବାର ଷଷ୍ଠ ପର୍ଯ୍ୟାୟ ଆଲୋଚନା ପାଇଁ କୃଷକ ସଂଗଠନ ରାଜି ହୋଇଛନ୍ତି।
ଆଲୋଚନା ଅର୍ଥହୀନ ବୋଲି କହି ଚାଷୀନେତାମାନେ ବୈଠକ ସ୍ଥଳ ଛାଡ଼ି ଚାଲିଯିବାକୁ ଧମକ ଦେଇଥିଲେ। ସରକାର ଆଇନ ପ୍ରତ୍ୟାହାର କରିବେ କି ନାହିଁ ସ୍ପଷ୍ଟ କରନ୍ତୁ ବୋଲି ସେମାନେ ଦାବି କରିଥିଲେ। ସରକାରୀ ସ୍ତରରେ ଆଲୋଚନା ପରେ କୃଷକଙ୍କ ଆଗରେ ନୂତନ ପ୍ରସ୍ତାବ ରଖାଯିବ ବୋଲି ବୈଠକ ଶେଷରେ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର କହିଛନ୍ତି। ଶନିବାର କୃଷକ ସଂଗଠନଗୁଡ଼ିକ ସହ ଆଲୋଚନା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବରିଷ୍ଠ କ୍ୟାବିନେଟ ସଦସ୍ୟମାନଙ୍କ ମଧ୍ୟରେ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଏଥିରେ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା, କୃଷିମନ୍ତ୍ରୀ ତୋମାର ପ୍ରମୁଖ ଯୋଗଦେଇଥିଲେ। ସରକାର ଆଇନର କେତେକ ଭାଗକୁ ସଂଶୋଧନ କରିବାକୁ ପ୍ରସ୍ତାବ ଦେଇଥିଲେ।
ତୋମାର ଏବଂ ରେଳମନ୍ତ୍ରୀ ପୀୟୂଷ ଗୋୟଲ ୫ମ ପର୍ଯ୍ୟାୟ ବୈଠକର ନେତୃତ୍ୱ ନେଇଥିଲେ। ସେମାନେ କୃଷକଙ୍କ ନିକଟରେ ଲିଖିତ ପ୍ରସ୍ତାବ ରଖିଥିଲେ। ଆମେ ଆଇନ ପ୍ରତ୍ୟାହାର ଚାହୁଁ, ସଂଶୋଧନକୁ ଗ୍ରହଣ କରିବୁ ନାହିଁ ବୋଲି ଦୋଆବା କିଷାନ ସଂଘର୍ଷ କମିଟିର ହରସୁଲିନ୍ଦର ସିଂ କହିଥିଲେ।
ଗୁରୁବାର ଆଲୋଚନା ବିଫଳ ହେବା ପରେ ପରବର୍ତ୍ତୀ ରଣନୀତି ପ୍ରସ୍ତୁତି ଲାଗି ଶୁକ୍ରବାର ୪୦ କୃଷକ ନେତା ଦିଲ୍ଲୀ-ହରିୟାଣା ସୀମାରେ ଏକାଠି ହୋଇଥିଲେ। କୃଷକମାନଙ୍କ ସହ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ଲାଗି ସରକାର ପ୍ରତିଶ୍ରୁତିବଦ୍ଧ ବୋଲି କୃଷିମନ୍ତ୍ରୀ ତୋମାର କହିଥିଲେ। ନୂଆ କୃଷି ଆଇନ ସମ୍ପର୍କରେ ସେମାନଙ୍କ ପ୍ରସ୍ତାବକୁ ମନ୍ତ୍ରୀ ସ୍ବାଗତ କରିଥିଲେ। ବିଜ୍ଞାନ ଭବନରେ ଅପରାହ୍ନ ୨ଟା ୩୦ରେ ବୈଠକ ଆରମ୍ଭ ହୋଇଥିଲା। ସେଠାରେ ତୋମାର, ଗୋୟଲଙ୍କ ସମେତ ବାଣିଜ୍ୟ ରାଷ୍ଟ୍ରମନ୍ତ୍ରୀ ସୋମପ୍ରକାଶ ମଧ୍ୟ ଉପସ୍ଥିତ ଥିଲେ।
ସେପଟେ କୃଷି ଆଇନ ପ୍ରତ୍ୟାହାର ଦାବିରେ କୃଷକ ସଂଗଠନ ପକ୍ଷରୁ ମଙ୍ଗଳବାର ଭାରତ ବନ୍ଦ ଡାକରା ଦିଆଯାଇଥିବାବେଳେ ବାମଦଳଗୁଡ଼ିକ ଏହାକୁ ସମର୍ଥନ କରିଛନ୍ତି। ଶନିବାର ସିପିଆଇ(ଏମ୍), ସିପିଆଇ, ସିପିଆଇ (ଏମ୍-ଏଲ୍), ରିଭଲ୍ୟୁଶନାରୀ ସୋସିଆଲିଷ୍ଟ ପାର୍ଟି ଏବଂ ଅଲ୍ ଇଣ୍ଡିଆ ଫରଓ୍ବାର୍ଡ ବ୍ଲକ ପକ୍ଷରୁ ଏକ ମିଳିତ ବିବୃତିରେ ଏହା ଘୋଷଣା କରାଯାଇଛି।
