ନୂଆଦିଲ୍ଲୀ,୨୪।୫: ସିବିଏସ୍ଇ (CBSE) ଦ୍ୱାଦଶ ଶ୍ରେଣୀ ଖାତା ପୁନଃମୂଲ୍ୟାୟନ (Re-evaluation) ପ୍ରକ୍ରିୟାକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ଆବେଦନ ସମୟରେ ବାରମ୍ବାର ଦେଖାଦେଉଥିବା ବୈଷୟିକ ତ୍ରୁଟି ଯୋଗୁ ଅନେକ ଛାତ୍ରୀଛାତ୍ରଙ୍କ ଆକାଉଣ୍ଟରୁ ଦୁଇ ଦୁଇ ଥର ଫିସ କଟିଯାଇଥିଲା। ତେବେ ଏହି ସମସ୍ୟାର ସମାଧାନ କରି କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ଘୋଷଣା କରିଛି ଯେ, ସେହି ଛାତ୍ରୀଛାତ୍ରଙ୍କର ଅତିରିକ୍ତ ଟଙ୍କା ଖୁବ୍ଶୀଘ୍ର ଫେରସ୍ତ କରାଯିବ। ସିବିଏସଇ ପରୀକ୍ଷା ନିୟନ୍ତ୍ରକ ସଂଯମ ଭରଦ୍ୱାଜ ଟୁଇଟ୍ କରି ଏହି ସୂଚନା ଦେଇଛନ୍ତି।
ରବିବାର ସିବିଏସ୍ଇ ପକ୍ଷରୁ ଜାରି କରାଯାଇଥିବା ଏକ ବିଜ୍ଞପ୍ତି ଅନୁସାରେ, ଗତ ମେ ୨୧ ରୁ ୨୪ ତାରିଖ ମଧ୍ୟରେ ଦ୍ୱାଦଶ ଶ୍ରେଣୀର ସ୍କାନ କପି (Scan Copy) ପାଇଁ ଆବେଦନ କରୁଥିବା ସମୟରେ ସର୍ଭରରେ ବୈଷୟିକ ସମସ୍ୟା ଦେଖାଦେଇଥିଲା। ଏହି କାରଣରୁ କିଛି ଛାତ୍ରୀଛାତ୍ରଙ୍କ ଖାତାରୁ ନିର୍ଦ୍ଧାରିତ ଫିସ୍ଠାରୁ ଅଧିକ ଟଙ୍କା କଟିଯାଇଥିବା ବେଳେ କେତେକ କ୍ଷେତ୍ରରେ କମ ଟଙ୍କା କଟିଥିଲା।
ଯେଉଁ ଛାତ୍ରୀଛାତ୍ରଙ୍କ ଆକାଉଣ୍ଟରୁ ଅଧିକ ଟଙ୍କା କଟିଛି, ତାହା ସେମାନଙ୍କର ସେହି ସମାନ ପେମେଣ୍ଟ ମାଧ୍ୟମକୁ (Original Payment Method) ଫେରସ୍ଥ କରିଦିଆଯିବ। ଯେଉଁମାନଙ୍କର କମ ଟଙ୍କା କଟିଛି, ବାକି ଅର୍ଥ ପୈଠ କରିବା ପାଇଁ ସେମାନଙ୍କୁ ସ୍ବତନ୍ତ୍ର ଭାବେ ସୂଚିତ କରାଯିବ। ପ୍ରଭାବିତ ହୋଇଥିବା ସମସ୍ତ ଛାତ୍ରଛାତ୍ରୀଙ୍କୁ ସେମାନଙ୍କର ସ୍କାନ କପି ପ୍ରଦାନ କରାଯିବ ଏବଂ ସେମାନଙ୍କୁ ଦ୍ୱିତୀୟ ଥର ଆବେଦନ କରିବାକୁ ପଡ଼ିବ ନାହିଁ।
ସିବିଏସ୍ଇ ପୋର୍ଟାଲ କ୍ରାଶ, ସର୍ଭର ଡାଉନ ଏବଂ ପେମେଣ୍ଟ ଗେଟୱେ ଫେଲ ହେବା ଭଳି ସମସ୍ୟାକୁ ନେଇ ଅଭିଭାବକ ଓ ଛାତ୍ରୀଛାତ୍ରଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଏହି ବୈଷୟିକ ତ୍ରୁଟି ପାଇଁ ଶିକ୍ଷା ମନ୍ତ୍ରଣାଳୟ ପକ୍ଷରୁ ସିବିଏସ୍ଇଠାରୁ ଏକ ବିସ୍ତୃତ ରିପୋର୍ଟ ମଗାଯାଇଛି, ଯେଉଁଥିରେ ଏହି ଅବ୍ୟବସ୍ଥା ଏବଂ ସିଷ୍ଟମ ପରିଚାଳନା କରୁଥିବା ଏଜେନ୍ସିଗୁଡ଼ିକ ବିଷୟରେ ସମ୍ପୂର୍ଣ୍ଣ ସୂଚନା ଦେବାକୁ କୁହାଯାଇଛି।
