କୋରାପୁଟ,୭ା୩(ଅମିତାଭ ବେହେରା): କୋରାପୁଟସ୍ଥିତ ଶ୍ରୀରାମକୃଷ୍ଣ ବିଦ୍ୟାମନ୍ଦିରରେ ଯୁକ୍ତ୨ ଶ୍ରେଣୀ ଖୋଲିବା ପାଇଁ CBSE ପକ୍ଷରୁ ଅନୁମତି ମିଳିଛି। ସିବିଏସ୍ଇ ବୋର୍ଡର ନିୟମାନୁଯାୟୀ ଏହି ବିଦ୍ୟାଳୟ ସମସ୍ତ ଆବଶ୍ୟକ ଭିତ୍ତିଭୂମି ରହିଥିବାରୁ ଏହି ଅନୁମତି ମିଳିଥିବା ନେଇ ବିଦ୍ୟାଳୟର ଅଧକ୍ଷା ତପସ୍ବିନୀ ମହାପାତ୍ର ପ୍ରକାଶ କରିଛନ୍ତି। ବିଦ୍ୟାଳୟକୁ ଏହି ଅନୁମତି ପ୍ରମାଣପତ୍ର ମିଳିବା ପରେ ବିଦ୍ୟାଳୟର ସମସ୍ତ ଶିକ୍ଷୟିତ୍ରୀ, ଶିକ୍ଷକ ଏବଂ ଛାତ୍ରୀଛାତ୍ରଙ୍କ ମଧ୍ୟରେ ଆନନ୍ଦ ଖେଳିଯାଇଛି। ବିଶେଷକରି ବିଦ୍ୟାଳୟର ପଠନ କକ୍ଷ, ଅଗ୍ନି ନିର୍ବାପକ ବ୍ୟବସ୍ଥା, କମ୍ପ୍ୟୁଟର ଲ୍ୟାବ୍, କମ୍ପୋଜିଟ ଲ୍ୟାବ୍, ଖେଳ ପଡ଼ିଆ ସହ ବିଦ୍ୟାଳୟରେ କାର୍ଯ୍ୟରତ ୪୫ ଜଣଶିକ୍ଷୟିତ୍ରୀ-ଶିକ୍ଷକଙ୍କ ଶିକ୍ଷାଗତ ଯୋଗ୍ୟତା ଓ ପାଠଦାନର ଗୁଣାତ୍ମକ ମାନକୁ ଆଧାର କରି ସିବିଏସ୍ଇ ପକ୍ଷରୁ ଅନୁଧ୍ୟାନ କରାଯାଇଥିଲା। ଗତ ଜାନୁଆରୀ ୧୬ ତାରିଖରେ ସିବିଏସ୍ଇରୁ ଆସିଥିବା ଦୁଇଜଣିଆ ପ୍ରତିନିଧି ଦଳ ବିଦ୍ୟାଳୟର ବିଭିନ୍ନ ବ୍ୟବସ୍ଥା ପରିଦର୍ଶନ କରିଥିଲେ।
ପରେ ଅନୁଧ୍ୟାନ ରିପୋର୍ଟ ଆଧାରରେ ଚଳିତ ଶିକ୍ଷାବର୍ଷଠାରୁ ଯୁକ୍ତ୨ ଶ୍ରେଣୀ ଆରମ୍ଭ କରିବା ପାଇଁ ସିବିଏସ୍ଇ ପକ୍ଷରୁ ଅନୁମତିପତ୍ର ସଂଖ୍ୟା ୧୫୩୦୪୦୭୨୦୨୬ ଜାରି କରାଯାଇଛି। ଏହି ଅନୁମତି ଆଗାମୀ ୫ ବର୍ଷ, ଅର୍ଥାତ୍ ୨୦୩୧ ମସିହା ପର୍ଯ୍ୟନ୍ତ ବୈଧ ରହିବ। ପୂର୍ବରୁ ଏହି ବିଦ୍ୟାଳୟକୁ ଦଶମ ଶ୍ରେଣୀ ପର୍ଯ୍ୟନ୍ତ ଶିକ୍ଷାଦାନ ପାଇଁ ମଧ୍ୟ ସିବିଏସ୍ଇ ଅନୁମତି ପ୍ରଦାନ କରିଥିଲା।
