ନୂଆଦିଲ୍ଲୀ,୧୦।୨: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡର ଦଶମ ଏବଂ ଦ୍ୱାଦଶ ପରୀକ୍ଷା ୧୫ ଫେବୃଆରୀ ୨୦୨୪ରୁ ଆରମ୍ଭ ହେଉଛି ଏବଂ ଏଥିପାଇଁ ବୋର୍ଡ ଆଡମିଟ କାର୍ଡ ଜାରି କରିଛି। ତେବେ ଏହି ବର୍ଷଠାରୁ ସିବିଏସଇ ବୋର୍ଡର ଛାତ୍ରୀଛାତ୍ରଙ୍କୁ ଦୁଇଥର ବୋର୍ଡ ପରୀକ୍ଷା ଦେବାକୁ ସୁଯୋଗ ମିଳିବ। ନିକଟରେ ବୋର୍ଡ ପରୀକ୍ଷାକୁ ନେଇ ଶିକ୍ଷା ମନ୍ତ୍ରଣାଳୟ ଏକ ବଡ ଘୋଷଣା କରିଥିଲା ଯେ ବର୍ତ୍ତମାନ ବର୍ଷକୁ ଦୁଇଥର ବୋର୍ଡ ପରୀକ୍ଷା କରାଯିବ। ନୂତନ ଶିକ୍ଷା ନୀତି (ଏନ୍ଇପି) ଅନୁଯାୟୀ ଶିକ୍ଷା ବ୍ୟବସ୍ଥାରେ ପରିବର୍ତ୍ତନ ହେତୁ ଏହା କରାଯାଇଛି। ଏହି ଅନୁଯାୟୀ, ଚଳିତ ବର୍ଷଠାରୁ ଦଶମ ଏବଂ ଦ୍ୱାଦଶ ସିବିଏସଇ ବୋର୍ଡର ଛାତ୍ରୀଛାତ୍ର ବର୍ଷକୁ ଦୁଇଥର ବୋର୍ଡ ପରୀକ୍ଷା ଦେବେ। ପ୍ରଥମ ଥର ନଭେମ୍ବର-ଡିସେମ୍ବର ୨୦୨୪ ରେ ଏବଂ ଦ୍ୱିତୀୟ ଥର ଫେବୃଆରୀ-ମାର୍ଚ୍ଚରେ ପରୀକ୍ଷା କରାଯିବ ବୋଲି ଆଶା କରାଯାଉଛି। ତେବେ ଏ ବାବଦରେ ସିବିଏସଇ ପକ୍ଷରୁ ଏ ପର୍ଯ୍ୟନ୍ତ କୌଣସି ସରକାରୀ ସୂଚନା ଦିଆଯାଇ ନାହିଁ। ଗତ ବର୍ଷ ଏନସିଏଫ ଅଧୀନରେ ବର୍ଷକୁ ଦୁଇଥର ବୋର୍ଡ ପରୀକ୍ଷା କରିବାକୁ ଶିକ୍ଷା ମନ୍ତ୍ରଣାଳୟ ଘୋଷଣା କରିଥିଲା। ଏହି ଢାଞ୍ଚା ପରୀକ୍ଷା ଛାତ୍ରୀଛାତ୍ରଙ୍କ ପାସହାର ପ୍ରତିଶତ ବୃଦ୍ଧି ଲକ୍ଷ୍ୟରେ କରାଯାଇଛି।
