ପାଟଣା,୧୮ା୨(ସ୍ବ.ପ୍ର): କେନ୍ଦୁଝର ଜିଲା ସାହାରପଡ଼ା ବ୍ଲକ୍ କୁଣ୍ଡଳା ପଞ୍ଚାୟତ ମିରିଗିଖୋଜି କୁଣ୍ଡୁଳା ହାଇସ୍କୁଲରେ ଓ୍ବାଚମ୍ୟାନ ଓ ସୁଇପର ନିଯୁକ୍ତି ନେଇ ବିବାଦ ଲାଗିରହିଛି। ଏନେଇ ଗୁରୁବାର ୧୨ ସ୍ବୟଂ ସାହାୟକ ଗୋଷ୍ଠୀର ଶତାଧିକ ମହିଳା ବିଦ୍ୟାଳୟ ଫାଟକରେ ତାଲା ପକାଇ ଦେଇଥିବା ଧାରଣା ଶୁକ୍ରବାର ବଳବତର ରହିଥିଲା। ଫଳରେ ସ୍କୁଲରେ ଚାଲିଥିବା ଫରମେଟିଭ ଆସେସମେଣ୍ଟ ପରୀକ୍ଷା ବାତିଲ ହୋଇଛି।
ମହିଳାମାନେ ଜିଦ୍ରେ ଅଟଳ ରହି ହାଇସ୍କୁଲ ଓ ପ୍ରାଥମିକ ବିଦ୍ୟାଳୟର ମୁଖ୍ୟ ଫାଟକ ଆଗରୁ ଉଠି ନ ଥିଲେ। ବିଦ୍ୟାଳୟ ଭିତରକୁ ଛାତ୍ରୀଛାତ୍ର, ଶିକ୍ଷକ ଓ କର୍ମଚାରୀ ପ୍ରବେଶ କରି ପାରି ନ ଥିଲେ। ଫଳରେ ଚାଲିଥିବା ନବମ ଓ ଦଶମ ଶ୍ରେଣୀର ଏଫଏଫୋର( ଫରମେଟିଭ ଆସେସ ମେଣ୍ଟ) ପରୀକ୍ଷାକୁ ଭାରପ୍ରାପ୍ତ ପ୍ରଧାନଶିକ୍ଷକ ତାରା ଚାନ୍ଦ ମହାନ୍ତ ବାତିଲ କରିଥିଲେ। ମଧ୍ୟାହ୍ନ ୧.୩୦ରେ ସ୍ଥାନୀୟ ସରପଞ୍ଚ ଶତ୍ରୁଘନ ନାଏକଙ୍କୁ ସିଡିପିଓ ଦୀପ୍ତିମୟୀ ନାଏକ ପଠାଇ ଆସନ୍ତା ବୁଧବାର ବିଡିଓ ବିଜୟ ନାୟକ, ସିଡିପିଓ ନାୟକ, ମିଶନ ଶକ୍ତିର ଏମବିକେ ମେନକା ମହାନ୍ତଙ୍କ ଉପସ୍ଥିତିରେ ସମସ୍ୟା ଉପରେ ଆଲୋଚନା କରିବାକୁ ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ ହୋଇଥିଲା। ବୁଧବାର ସମସ୍ୟା ସମାଧାନ ନ ହେଲେ ପୁନର୍ବାର ଆନ୍ଦୋଳନକୁ ଓହ୍ଲାଇବାକୁ ମହିଳା ଗୋଷ୍ଠୀ ଚେତାବନୀ ଦେଇଛନ୍ତି।
