ଓଟାଓ୍ବା,୪।୩: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୂର୍ବରୁ ମେକ୍ସିକୋ ଏବଂ କାନାଡାରୁ ହୋଉଥିବା ଆମଦାନୀ ଉପରେ ୨୫ ପ୍ରତିଶତ ଟାରିଫ୍ ଘୋଷଣା କରିଛନ୍ତି। ସେହି ସମୟରେ, ଚାଇନାରୁ ଆମଦାନୀ ଉପରେ ଅତିରିକ୍ତ ୧୦% ଟାରିଫ୍ ଘୋଷଣା କରାଯାଇଛି। ନିକଟରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ରାଜା ଚାଲର୍ସ ତୃତୀୟଙ୍କୁ ଭେଟିଥିଲେ, ଯେଉଁଥିରେ ସେମାନେ କାନାଡାର ସାର୍ବଭୌମତ୍ୱ ଏବଂ ସ୍ବାଧୀନତା ବିଷୟରେ ଆଲୋଚନା କରିଛନ୍ତି।
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାନାଡାକୁ ଆମେରିକାର ୫୧ତମ ରାଜ୍ୟ କରିବା ପାଇଁ ପରାମର୍ଶ ଦେବା ପରେ ଏହି ବୈଠକ ଅନୁଷ୍ଠିତ ହୋଇଛି, ଯାହାକୁ କାନାଡା ଦୃଢ଼ ଭାବରେ ପ୍ରତ୍ୟାଖ୍ୟାନ କରିଛି। ରାଷ୍ଟ୍ରପତି ହେବା ପରେ, ଡୋନାଲ୍ଡ ଟ୍ରମ୍ପ ବାରମ୍ବାର କାନାଡାକୁ ଆମେରିକାର ୫୧ତମ ରାଜ୍ୟ କରିବା ବିଷୟରେ କଥା ହୋଇଛନ୍ତି। କାନାଡାର ରାଷ୍ଟ୍ରମୁଖ୍ୟ ଭାବରେ ମଧ୍ୟ କାର୍ଯ୍ୟ କରୁଥିବା ରାଜା ଚାଲର୍ସ ଏପର୍ଯ୍ୟନ୍ତ ଏହି ବିଷୟରେ କୌଣସି ମନ୍ତବ୍ୟ ଦେଇନାହାଁନ୍ତି।
ମଙ୍ଗଳବାର ଟ୍ରୁଡୋ ବ୍ରିଟିଶ ରାଜାଙ୍କ ସହ ନିଜର ଏକ ଫଟୋ ଶେୟାର କରିଛନ୍ତି। ଯେଉଥିରେ ସେ ଲେଖିଛନ୍ତି, ମୁଁ ଆଜି ସକାଳେ ମହାମହିମ ରାଜା ଚାଲର୍ସ ତୃତୀୟଙ୍କୁ ଭେଟିଥିଲି। ଆମେ କାନାଡିଆନମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକ ଉପରେ ଆଲୋଚନା କରିଥିଲୁ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, କାନାଡାର ସାର୍ବଭୌମ ଏବଂ ସ୍ବାଧୀନ ଭବିଷ୍ୟତ।
ଟ୍ରମ୍ପ ପ୍ରଶାସନ କାନାଡା ଏବଂ ମେକ୍ସିକୋରୁ ଆସୁଥିବା ଉତ୍ପାଦଗୁଡ଼ିକ ଉପରେ ୨୫% ଟାରିଫ୍ ଘୋଷଣା କରିଛନ୍ତି। ଯାହାକୁ ନେଇ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ କହିଛନ୍ତି ଯେ ଯଦି ଟ୍ରମ୍ପ ପ୍ରଶାସନ ଏହାର ଯୋଜନାକୁ ଆଗକୁ ବଢ଼ାଏ, ତେବେ ତାଙ୍କ ଦେଶ ମଙ୍ଗଳବାରଠାରୁ ୩୦ ବିଲିୟନ କାନାଡା ଡଲାର ମୂଲ୍ୟର ଆମେରିକୀୟ ସାମଗ୍ରୀ ଉପରେ ୨୫ ପ୍ରତିଶତ ଟାରିଫ୍ ଲାଗୁ କରିବ। ଟ୍ରୁଡୋ କହିଥିଲେ ଯେ ୧୨୫ ବିଲିୟନ କାନାଡିଆନ ଡଲାର ମୂଲ୍ୟର ଆମେରିକୀୟ ସାମଗ୍ରୀ ଉପରେ ବାକି ପ୍ରତିଶୋଧମୂଳକ ଟାରିଫ୍ ୨୧ ଦିନ ମଧ୍ୟରେ ଲାଗୁ କରାଯିବ।
