ଗଞ୍ଜାମ, ୮।୭(ଡି.ଏନ୍.ଏ.): ଗଞ୍ଜାମ ଏନ୍ଏସି ଅଞ୍ଚଳରେ ମହାମାରୀ କରୋନା ଧୀରେ ଧୀରେ କାୟା ବିସ୍ତାର କରିବା ଆରମ୍ଭ କରିଛି। ଗତ ଶନିବାରଠାରୁ ଆରମ୍ଭ ହୋଇଥିବା କରୋନା ଆକ୍ରାନ୍ତଙ୍କ ସଂଖ୍ୟା ୫ ଦିନରେ ୭କୁ ବୃଦ୍ଧି ହୋଇଛି l ଏ ନେଇ ବୁଧବାର ସକାଳେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଓ ଆଇଏଏସ୍ କୋରାଲା ପାଟୱା ଏନ୍ଏସି ଆସି କାର୍ଯ୍ୟନିର୍ବାହୀ ଅଧିକାରୀ ପ୍ରଭୁ କଲ୍ୟାଣ ଦାସଙ୍କ ସହ ଆଲୋଚନା କରିଛନ୍ତି l ଏଥିସହ କୋଭିଡ-୧୯ ମନିଟରିଂ ନିମନ୍ତେ ୧୨ଟି ୱାର୍ଡର ଯୁବକଙ୍କୁ ନେଇ ଏକ ପରିଚାଳନା କମିଟି ଗଠନ କରାଯାଇଛି l ସେମାନେ ନିଜ ନିଜ ୱାର୍ଡ ସମସ୍ୟା ଏନ୍ଏସି ଇଓଙ୍କୁ କିମ୍ବା ସିଧା ସଳଖ ଜିଲାପାଳଙ୍କ ମୋବାଇଲକୁ ମେସେଜ କରିବେ ବୋଲି କୁହାଯାଇଛି। ପରେ କୋଭିଡ-୧୯ ନିୟମ ବିଷୟରେ ଗଞ୍ଜାମ ଏନ୍ଏସି ନିର୍ବାଚନ ଅଧିକାରୀ ଦାୟିତ୍ୱରେ ଥିବା ବିଜେଡି ଯୁବ ନେତା ରାକେଶ ରଞ୍ଜନ ଦାସଙ୍କ ସହ ଜିଲାପାଳ ଆଲୋଚନା କରିଥିଲେ l ଅନ୍ୟମାନଙ୍କ ମଧ୍ୟରେ ସାମାଜିକ କର୍ମୀ ସୁଧୀର କୁମାର ପାଢ଼ୀ, ଜିତୁ ପଣ୍ଡା, ମନୋଜ ପ୍ରଧାନ, ବିଜୁ ଯୁବବାହିନୀ ସଦସ୍ୟ ରତ୍ନାକର ଦଳାଇ ପ୍ରମୁଖ ଉପସ୍ଥିତ ଥିଲେ।
