ମେଲ୍ବୋର୍ନ,୨୬।୧୨: ଜଳବାୟୁ ପରିବର୍ତ୍ତନ ଯୋଗୁ ଆଣ୍ଟାର୍କଟିକା ମହାଦେଶର ପ୍ରାଣୀ ଜଗତ ବିପଦରେ ପଡ଼ିଛନ୍ତି। ଯଦି ଏହାର ପ୍ରତିକାର ଦିଗରେ କାର୍ଯ୍ୟ କରା ନ ଯାଏ ତେବେ ୨୧୦୦ ମସିହା ବେଳକୁ ଏଠାକାର ୯୭% ସ୍ଥଳଚର ପ୍ରାଣୀ ବିଲୁପ୍ତ ହୋଇଯିବେ। ଅନ୍ୟପକ୍ଷେ ଆଣ୍ଟାର୍କଟିକାର ମୁଖ୍ୟ ଆକର୍ଷଣ ପାଲଟିଥିବା ପେଙ୍ଗୁଇନ୍ଙ୍କ ବଂଶ ମଧ୍ୟ ଲୋପ ପାଇଯିବ ବୋଲି ଅଷ୍ଟ୍ରେଲିଆର ୨୯ ଜଣିଆ ବିଶେଷଜ୍ଞଙ୍କ ପକ୍ଷରୁ କରାଯାଇଥିବା ଅଧ୍ୟୟନରୁ ଜଣାପଡ଼ିଛି। ସ୍ଥଳଚର ପ୍ରାଣୀଙ୍କ ସୁରକ୍ଷା ପାଇଁ ବିଶେଷଜ୍ଞଙ୍କ ଦ୍ୱାରା ବାହାର କରାଯାଇଥିବା ଉପାୟରେ ପ୍ରତିବର୍ଷ ୨୩ ନିୟୁତ ଡଲାର ଖର୍ଚ୍ଚ ହେବ। ଏହାଫଳରେ ଆଣ୍ଟାର୍କଟିକାର ପ୍ରାୟ ୮୪% ପକ୍ଷୀ, ସ୍ତନ୍ୟପାୟୀ ପ୍ରାଣୀ ଏବଂ ଗଛ ବାୟୁମଣ୍ଡଳ ତାପମାତ୍ରା ବୃଦ୍ଧିଜନିତ କ୍ଷତିରୁ ସୁରକ୍ଷିତ ରହିପାରିବେ।
ଖାଲି ପ୍ରାଣୀ ନୁହନ୍ତି, ଆଣ୍ଟାର୍କଟିକାରେ ଦେଖାଯାଉଥିବା ୨ଟି ବିଶେଷ ପ୍ରକାର ଫୁଲଗଛ ହାର୍ଡିମସ୍ ଏବଂ ଲିଚେନ୍ସ ମଧ୍ୟ ବିଲୁପ୍ତ ପଥରେ ପହଞ୍ଚତ୍ଛନ୍ତି। ଜଳବାୟୁ ପରିବର୍ତ୍ତନ, ଗ୍ଲୋବାଲ୍ ଓ୍ବାର୍ମିଂ ଛଡ଼ା ପର୍ଯ୍ୟଟକଙ୍କ ପାଇଁ ମଧ୍ୟ ଆଣ୍ଟାର୍କଟିକାକୁ ଅସୁବିଧା ଭୋଗିବାକୁ ପଡ଼ୁଛି। ପେଙ୍ଗୁଇନ୍ଙ୍କ ସାମ୍ରାଜ୍ୟ କୁହାଯାଉଥିବା ଆଣ୍ଟାର୍କଟିକାର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବାକୁ ଆସୁଥିବା ବିଦେଶୀ ସେଠାକାର ପରିବେଶକୁ ଅପରିଷ୍କାର କରୁଛନ୍ତି। ବର୍ତ୍ତମାନର ସ୍ଥିତି ଯଦି ଆଗାମୀ ଦିନରେ ଜାରି ରୁହେ ତେବେ ୩୭% ପ୍ରାଣୀଙ୍କ ସମ୍ପୂର୍ଣ୍ଣ ବିନାଶ ଘଟିବ। ଅନ୍ୟପକ୍ଷେ ବରଫାବୃତ୍ତ ଅଞ୍ଚଳରେ ରହିବା ସହଜ ମନେକରୁଥିବା ଫେଙ୍ଗୁଇନ୍ଙ୍କ ଉପରେ ଏହାର ଅଧିକ ପ୍ରଭାବ ପଡ଼ିବା ଆରମ୍ଭ ହୋଇଛି। ଅଲଗା ପ୍ରାଣୀମାନେ ନିଜକୁ ପ୍ରତିକୂଳ ପରିସ୍ଥିତିରେ ବଞ୍ଚାଇ ରଖିବାର ଉପାୟ ବାଛି ବାହାର କରିବାରେ ସଫଳ ହୋଇଥିବାବେଳେ ପେଙ୍ଗୁଇନ୍ଙ୍କ କ୍ଷେତ୍ରରେ ଏହା ଅସମ୍ଭବ ପ୍ରାୟ। କାରଣ ସେମାନଙ୍କ ଶାରୀରିକ ଗଠନ ଓ ଜୀବନଶୈଳୀ ବରଫାଞ୍ଚଳ ଛଡ଼ା ଅନ୍ୟ କୌଣସିଠାରେ ସହଜ ନୁହେଁ। ଏହି ବିରଳ ପ୍ରଜାତିର ପ୍ରାଣୀଙ୍କୁ ବଞ୍ଚାଇ ରଖିବାକୁ ହେଲେ ସତର୍କତାର ସହ ଏମାନଙ୍କୁ ସୁହାଇଲା ଭଳି କାର୍ଯ୍ୟପନ୍ଥା ଅବଲମ୍ବନ କରିବା ଜରୁରୀ ବୋଲି ବିଶେଷଜ୍ଞ ନିଜ ମତ ପ୍ରକାଶ କରିଛନ୍ତି। ଅନ୍ୟପଟେ ନିର୍ଦ୍ଧାରିତ ଯୋଜନାକୁ କାର୍ଯ୍ୟକାରୀ କରିବା ପାଇଁ ଆବଶ୍ୟକ ପାଣ୍ଠି ବାବଦରେ ବିଶେଷଜ୍ଞ ଓ କର୍ତ୍ତୃପକ୍ଷଙ୍କ ଭିତରେ ଆଲୋଚନା ଜାରି ରହିଛି।
