ଭୁବନେଶ୍ୱର,୧୨।୧ : ଭାରତୀୟ ଷ୍ଟେଟ ବ୍ୟାଙ୍କ (ଏସ୍ବିଆଇ)ର ଭୁବନେଶ୍ବର ମଣ୍ଡଳର ବ୍ୟବସାୟିକ ସଫଳତା ଏକ ନୂଆ କୀର୍ତ୍ତିମାନ ସୃଷ୍ଟି କରିଛି। ଚଳିତ ଆର୍ଥିକ ବର୍ଷର ୩ୟ ତ୍ରୈମାସିକ କାରବାର ଶେଷ ସୁଦ୍ଧା ମୋଟ ବ୍ୟବସାୟିକ ସ୍ତର ୨ଲକ୍ଷ କୋଟି ଟଙ୍କା ଅତିକ୍ରମ କରିଥିବା ମଣ୍ଡଳ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି। ଏପରିକି ମଣ୍ଡଳ ପ୍ରଥମ ଥର ପାଇଁ ନୂତନ ବ୍ୟବସାୟିକ କୀର୍ତ୍ତି ସ୍ଥାପନ କରିପାରିଛି। ଏହି ପରିପ୍ରେକ୍ଷୀରେ ମଣ୍ଡଳର ମୁଖ୍ୟ ମହାପ୍ରବନ୍ଧକ ଚନ୍ଦ୍ରଶେଖର ଶର୍ମା ବ୍ୟାଙ୍କର ସମସ୍ତ ଗ୍ରାହକ ଓ ଓଡ଼ିଶାବାସୀଙ୍କୁ ଧନ୍ୟବାଦ ଜଣାଇବା ସହ ଗ୍ରାହକଙ୍କ ବିଶ୍ୱାସ ବ୍ୟାଙ୍କ ପ୍ରତି ଅତୁଟ ରହିଥିବାରୁ ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳର ସଫଳତାର ଏହି ସ୍ତର ପର୍ଯ୍ୟନ୍ତ ପହଞ୍ଚତ୍ପାରିଛି।
ଅପରପକ୍ଷରେ ଏସ୍ବିଆଇ ସ୍ଥାନୀୟ ପ୍ରଧାନ କାର୍ଯ୍ୟାଳୟଠାରେ ଏକ ସ୍ବତନ୍ତ୍ର ସମାରୋହ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ବ୍ୟାଙ୍କର ସମସ୍ତ କର୍ମଚାରୀଙ୍କ ସହ ମଣ୍ଡଳ ପରିଚାଳନା ସମିତିର ଅଧିକାରୀଗଣ କେକ୍ କାଟି ଉକ୍ତ ସମାରୋହକୁ ପାଳନ କରିଥିଲେ। ଏହି ଅବସରରେ ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳର ସମସ୍ତ ଜୋନ୍, କ୍ଷେତ୍ର ଓ ଶାଖା ଭିଡିଓ କନ୍ଫରେନ୍ସ ଜରିଆରେ ଯୋଗଦାନ କରିଥିଲେ।
ଉଲ୍ଲେଖଯୋଗ୍ୟ, ଏସ୍ବିଆଇ ମୁଖ୍ୟ ମହାପ୍ରବନ୍ଧକ ଶର୍ମା ସରକାରୀ କାର୍ଯ୍ୟକର୍ତ୍ତା, କର୍ମଚାରୀବୃନ୍ଦ ଓ ମୁଖ୍ୟତଃ ଗ୍ରାହକ ଓ ଜନସାଧାରଣଙ୍କୁ ଏହି ଗୌରବ ପାଇଁ ଧନ୍ୟବାଦ ଜଣାଇଛନ୍ତି।
