ନୂଆଦିଲ୍ଲୀ,୨୨।୧୦: ଦୀପାବଳି ପୂର୍ବରୁ ବ୍ୟସ୍ତବହୁଳ ରୁଟ୍ଗୁଡ଼ିକରେ ବିମାନ ଭଡ଼ା ଲଗାତର ବୃଦ୍ଧି ହେଉଥିବା ଦେଖାଯାଉଛି। ବର୍ଦ୍ଧିତ ଚାହିଦା ଯୋଗୁ ବିମାନ ଭଡ଼ା ପୂର୍ବ ତୁଳନାରେ ପ୍ରାୟ ୩୦ରୁ ୪୫% ବଢ଼ିଥିବା ଜଣାପଡ଼ିଛି। ଟ୍ରାଭେଲ ପୋର୍ଟାଲ ଇକ୍ସିଗୋ ମୁତାବକ, ମୁମ୍ବାଇ-ଦିଲ୍ଲୀ ଏବଂ ମୁମ୍ବାଇ-କୋଲକାତା ସମେତ ଦେଶର ପ୍ରମୁଖ ୧୦ ରୁଟ୍ରେ ହାରାହାରି ଓ୍ବାନଓ୍ବେ ଇକୋନୋମି କ୍ଲାସ୍ ଭଡା ବୃଦ୍ଧି ୩୦%ରୁ ଊର୍ଦ୍ଧ୍ୱ ରହିଛି। ବାଙ୍ଗାଲୋର-କୋଲକାତା ରୁଟ୍ରେ ଭଡ଼ା ୪୦% ବଢ଼ିଥିବା ବେଳେ କଲିକତା ରୁଟ୍ରେ ସର୍ବାଧିକ ୪୫% ବଢ଼ିଛି। ଦିଲ୍ଲୀ-ପାଟନା ଏବଂ ବାଙ୍ଗାଲୋର-ପାଟନା ରୁଟ୍ରେ ଭଡ଼ା ବୃଦ୍ଧି ୨୫%ରୁ କମ୍ ରହିଥିବା ଜଣାପଡ଼ିଛି। ଗତ ବର୍ଷ ତୁଳନାରେ ଚଳିତ ବର୍ଷ ପାଟନାକୁ ଅଧିକ ଟ୍ରେନ୍ ଉପଲବ୍ଧ ହେଉଥିବାରୁ ବିମାନ ଭଡ଼ା ବିଶେଷ ବୃଦ୍ଧି ହୋଇ ନ ଥିବା କୁହାଯାଇଛି।
ଇକ୍ସିଗୋ ସହ ପ୍ରତିଷ୍ଠାତା କେ.ହଓ୍ବାଲେ କହିଛନ୍ତି, ଟିକାକରଣ ଯୋଗୁ ଲୋକଙ୍କର ଆତ୍ମବିଶ୍ୱାସ ବଢ଼ିଛି। ସେହିଭଳି ଆଡଭାନ୍ସ ପରଚେଜ୍ ପାଟର୍ନରେ ମଧ୍ୟ ପରିବର୍ତ୍ତନ ଆସିଛି। ଅକ୍ଟୋବରରେ ମଧ୍ୟ ବିମାନ ଯାତ୍ରା ବଢ଼ିଛି। ଏହା ପୂର୍ବ ପ୍ରସ୍ତୁତି ଅଗ୍ରିମ କ୍ରୟ ବ୍ୟବହାରକୁ ଦର୍ଶାଉଛି। ଗତ ବର୍ଷ ଏହି ସମୟରେ ବିମାନ କମ୍ପାନୀଗୁଡ଼ିକୁ ୭୦% କ୍ଷମତାରେ ଚଳାଚଳ ଲାଗି ଅନୁମତି ଦିଆଯାଇଥିଲା। ଗତ ନଭେମ୍ବରରେ ବିମାନର ଯାତ୍ରୀ ଟ୍ରାଫିକ କରୋନା ପୂର୍ବ ସମୟ ତୁଳନାରେ ପ୍ରାୟ ୫୦% ମଧ୍ୟ ନ ଥିଲା। ବର୍ତ୍ତମାନ ଦୈନିିକ ଯାତ୍ରୀ ଟ୍ରାଫିକ୍ ପ୍ରାୟ ୭୦ରୁ ୭୫% ଛୁଇଁଛି। ବିମାନ ଯାତ୍ରା ଚାହିଦା ବଢ଼ିଥିବା ବେଳେ ଭଡ଼ା ସୀମା ପରିବର୍ତ୍ତନ ହେବା ଯୋଗୁ ପାର୍ବଣରେ ଭଡ଼ା ବୃଦ୍ଧି ହୋଇଥିବା ଜଣାପଡ଼ିଛି।
ଚଳିତ ବର୍ଷ ଅକ୍ଟୋବର ୧୭ରେ ଦେଶ ମଧ୍ୟରେ ୩.୨୭ ଲକ୍ଷ ବିମାନ ଯାତ୍ରୀ ବିମାନ ଯାତ୍ରା କରିଛନ୍ତି। ଲକ୍ଡାଉନ ପରେ ଏହା ସବୁଠାରୁ ସର୍ବୋଚ୍ଚ ସ୍ତର। ଟିକାକରଣରେ ତ୍ୱରିତତା, ବିମାନ ଯାତ୍ରା ଉପରେ ରହିଥିବା ପ୍ରତିବନ୍ଧକ କୋହଳ ହେବା ଯୋଗୁ ଧୀରେ ଧୀରେ ଅଧିକ ଲୋକ ବିମାନ ଯାତ୍ରା କରୁଛନ୍ତି। ବିମାନ କମ୍ପାନୀଗୁଡ଼ିକ ଉପରେ ମଧ୍ୟ ପରିଚାଳନା ଖର୍ଚ୍ଚ ଜନିତ ଚାପ ମଧ୍ୟ ରହିଛି। ଶିଳ୍ପର ଜଣେ ଏକ୍ଜିକ୍ୟୁଟିଭ କହିଛନ୍ତି, ବିମାନ ଇନ୍ଧନ ଦର ଏବେ ପ୍ରାୟ ୨ ଗୁଣ ବଢ଼ିଛି। ମାତ୍ର ସେହି ତୁଳନାରେ ଭଡ଼ା ବୃଦ୍ଧି ହୋଇନାହିଁ।
