ଢେଙ୍କାନାଳ,୧୦।୧୨: ଏକ ମର୍ମନ୍ତୁଦ ଦୁର୍ଘଟଣାରେ ଜୀବନ ହରାଇଲେ ତିନି ବାଇକ୍ ଆରୋହୀ। ଢେଙ୍କାନାଳ ଜିଲା ପରଜଙ୍ଗ ଥାନା ଅନ୍ତର୍ଗତ ଖାଇରାମୁଣ୍ଡା ଗ୍ରାମ ନିକଟ ଜାତୀୟ ରାଜପଥ-୫୩ ରେ ଏକ ବସ୍ ସେମାନଙ୍କ ଉପରେ ମାଡିଯିବାରୁ ତିନିଜଣଙ୍କର ମୃତ୍ୟୁ ଘଟିଛି।
ମୃତକଙ୍କ ନାମ ସାଗର ପ୍ରଧାନ (୨୪), ସୁମନ୍ତ ପରିଡ଼ା(୫୫) ଏବଂ ନାଉପାଲକାଟେନି ଗାଁର ସୌମ୍ୟ ରଂଜନ ସାହୁ (୧୯) ବୋଲି ଜଣାପଡିଛି।
ଖବର ଅନୁଯାୟୀ, ଘର ନିର୍ମାଣ କାର୍ଯ୍ୟ ପାଇଁ ଏକ ମୋଟରସାଇକେଲରେ ତିନିଜଣ ଖାଇରାମୁଣ୍ଡା ଅଭିମୁଖେ ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା। ବସ୍ ମୋଟରସାଇକେଲକୁ ଧକ୍କା ଦେବାରୁ ତିନିଜଣ ତଳେ ପଡିଯାଇଥିଲେ ଏହାପରେ ବସ୍ ସେମାନଙ୍କ ଉପରେ ମାଡି ଯାଇଥିଲା।
ଏହି ଘଟଣାରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିବା ବେଳେ ସ୍ଥାନୀୟ ଲୋକ ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ରାସ୍ତା ଅବରୋଧ କରିଥିଲେ। ଏହି ଅବରୋଧ ତାଳଚେର ଏବଂ ଡୁବୁରୀ ମଧ୍ୟରେ ଯାନବାହନ ଚଳାଚଳ ବ୍ୟାହତ ହୋଇଥିଲା।
ସୂଚନା ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ସ୍ୱାଭାବିକତା ଫେରାଇ ଆଣିବା ପାଇଁ ସ୍ଥାନୀୟ ଲୋକଙ୍କୁ ଶାନ୍ତ କରିବାକୁ ଚେଷ୍ଟା କରିଥିଲା।
