ମୁମ୍ବାଇ,୧୫।୪ : ଶନିବାର ସକାଳେ ମହାରାଷ୍ଟ୍ରର ରାୟଗଢରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ ଥିବା ଖାପୋଲି ଅଞ୍ଚଳରେ ଏକ ବସ ରାସ୍ତାରୁ ନିୟନ୍ତ୍ରଣ ହରାଇ ୩୦୦ ମିଟର ଗଭୀର ଖାଲରେ ପଡ଼ିଯାଇଥିଲା। ଏହି ଦୁର୍ଘଟଣାରେ ୧୩ ଜଣଙ୍କର ମୃତ୍ୟୁ ହୋଇଥିବାବେଳେ ୨୯ରୁ ଅଧିକ ଆହତ ହୋଇଛନ୍ତି। ଦୁର୍ଘଟଣା ପରେ ତୁରନ୍ତ ସ୍ଥାନୀୟ ଲୋକମାନେ ଉଦ୍ଧାର କରିବା ପାଇଁ ଉଦ୍ୟମ ଆରମ୍ଭ କରିଥିଲେ। ଆହତଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି।
ପୋଲିସର ସୂଚନାନୁସାରେ, ଘରୋଇ ବସ ପୁଣେରୁ ମୁମ୍ବାଇ ଯାଉଥିଲା। ସିଙ୍ଗରୋବା ମନ୍ଦିର ନିକଟରେ ଥିବା ମୁମ୍ବାଇ-ପୁଣେ ରାଜପଥରେ ଏହା ନିୟନ୍ତ୍ରଣ ହରାଇ ରାସ୍ତାରୁ ଖାଲରେ ଖସି ଯାଇଥିଲା। ବସରେ ପ୍ରାୟ ୪୨ ଜଣ ଯାତ୍ରୀ ଥିଲେ।
ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ଏହି ବସ ମୁମ୍ବାଇର ଗୋରେଗାଓଁରୁ ବାଜି ପ୍ରଭାସ ବାଦକ ଗ୍ରୁପ ନାମକ ଏକ ପାରମ୍ପାରିକ ମ୍ୟୁଜିକ ଟ୍ରୁପର ସଦସ୍ୟମାନଙ୍କୁ ନେଇ ଯାଉଥିଲା। ପୁଣେ ଜିଲାର ପିମ୍ପିରି ଚିଞ୍ଚୱାଡ ଅଞ୍ଚଳରେ ଏକ କାର୍ଯ୍ୟକ୍ରମରେ ଯୋଗଦେବା ପରେ ସେମାନେ ଗୋରେଗାଓଁ ଫେରୁଥିଲେ। ବସ ଶୁକ୍ରବାର ବିଳମ୍ବିତ ରାତି ପ୍ରାୟ ୧ ଟା ସମୟରେ ସ୍ଥାନ ଛାଡିଥିଲା। ଭୋର ପ୍ରାୟ ୪ଟା ୫୦ ସମୟରେ ଚାନ୍ଦଲା ଘାଟ ନିକଟରେ ଏହି ଦୁର୍ଘଟଣା ଘଟିଛି। ରାୟଗଢ ପୋଲିସ ଅଧୀକ୍ଷକ ସୋମନାଥ ଘାର୍ଗେ କହିଛନ୍ତି ଯେ ଆହତମାନେ ମୁମ୍ବାଇର ସିଓନ ଏବଂ ଗୋରେଗାଓଁ ଅଞ୍ଚଳ ତଥା ପଡୋଶୀ ପାଲଘର ଜିଲାର ଭିରାର ବାସିନ୍ଦା।
ଅଧିକାଂଶ ଆହତଙ୍କ ବୟସ ୧୮ ରୁ ୨୫ ବର୍ଷ ବୟସ ମଧ୍ୟରେ ବୋଲି କୁହାଯାଉଛି।
ଏହି ଦୁର୍ଘଟଣା ସମ୍ପର୍କରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ସହ କଥା ହୋଇଛନ୍ତି। ଶାହା ଟୁଇଟ କରି କହିଛନ୍ତି, ମହାରାଷ୍ଟ୍ରର ରାୟଗଡରେ ସଡକ ଦୁର୍ଘଟଣା ଦୁଃଖଦାୟକ। ଏ ବାବଦରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ସହ କଥାବାର୍ତ୍ତା କରି ସେ କହିଛନ୍ତି ଯେ ସ୍ଥାନୀୟ ପ୍ରଶାସନ ରିଲିଫ କାର୍ଯ୍ୟରେ ନିୟୋଜିତ ଅଛି। ମୁଁ ମୃତକଙ୍କ ପରିବାର ପ୍ରତି ସମବେଦନା ଜଣାଉଛି ଏବଂ ଆହତମାନଙ୍କୁ ଶୀଘ୍ର ଆରୋଗ୍ୟ କାମନା କରୁଛି।
ଏହି ଘଟଣାରେ ଦୁଃଖ ପ୍ରକାଶ କରି ମୁଖ୍ୟମନ୍ତ୍ରୀ ଶିନ୍ଦେ ମୃତକଙ୍କ ସମ୍ପର୍କୀୟଙ୍କୁ ପ୍ରତ୍ୟେକଙ୍କୁ ପାଞ୍ଚ ଲକ୍ଷ ଟଙ୍କାର ଅନୁକମ୍ପାମୂକ ସହାୟତା ଘୋଷଣା କରିଛନ୍ତି। ଆହତଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ବୋଲି ସେ କହିଛନ୍ତି।
