ରାଜନଗର,୨ା୧(ଭାସ୍କର ରାଉତରାୟ): ରାଜନଗର ଜେଏମ୍ଏଫ୍ସି କୋର୍ଟ ମଧ୍ୟରେ ପଶି କେହି ନ ଥିବାର ସୁଯୋଗ ନେଇ ସୁଇପର କିଛି ରେକର୍ଡ ପୋଡ଼ି ଦେଇଥିବା ନେଇ ରାଜନଗର ଥାନାରେ ଲିଖିତ ଅଭିଯୋଗ ହୋଇଛି। ଜେଏମ୍ଏଫସି କୋର୍ଟର ୱାଚମ୍ୟାନ ବିଜୟ ମଳିକଙ୍କ ଅଭିଯୋଗ ଓ ପୋଲିସର ସୂଚନା ମୁତାବକ କୋର୍ଟର ପେସକାର ଦୁର୍ଯୋଧନ ନାୟକଙ୍କ ସହ ସୁଇପର ରାଜଗଡ଼ ଗଁାର ମିହିର ଦାସଙ୍କ ସହିତ ପାଟିତୁଣ୍ଡ ହୋଇଥିଲା। ପାଟିତୁଣ୍ଡ ସମୟରେ ସେ ଉପସ୍ଥିତ ଥିଲେ।
ରବିବାର କୋର୍ଟ କାମରେ ପେସକାର ଓ ୱାଚମ୍ୟାନ ପଟ୍ଟାମୁଣ୍ଡାଇ ଯାଇଥିଲେ। ପଟ୍ଟାମୁଣ୍ଡାଇରୁ ଫେରି ରାଜନଗର ଜେଏମ୍ଏଫ୍ସି କୋର୍ଟର କବାଟ ସନ୍ଧିରୁ ଧୂଆଁ ବାହାରୁଥିବା ଦେଖିଥିଲେ। କବାଟ ଖୋଲି ଭିତରକୁ ଯିବା ବେଳକୁ କିଛି ରେକର୍ଡ ପତ୍ର ଏଣ୍ଟ୍ରାନ୍ସ ମଝିରେ ଜଳୁଥିବା ଦେଖିଥିଲେ। ସେମାନେ କବାଟ ଖୋଲିବା କ୍ଷଣି ମିହିର ଦୌଡି ପଳାଇଥିଲା। ଏ ନେଇ ପୋଲିସକୁ ଖବର ଦେଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରିଥିଲା।
ସୋମବାର କେନ୍ଦ୍ରାପଡ଼ା ଜିଲା ଜଜ୍, ପୋସକୋ କୋର୍ଟର ନ୍ୟାୟାଧିଶ, ପଟ୍ଟାମୁଣ୍ଡାଇ ଜେଏମ୍ଏଫ୍ସିର ବିଚାରପତି ଓ ରାଜନଗର ଜେଏମ୍ଏଫ୍ସିର ବିଚାରପତି ପହଞ୍ଚତ୍ ଘଟଣାର ତଦନ୍ତ କରିଛନ୍ତି। ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି। ପୋଲିସ ଅଭିଯୁକ୍ତଙ୍କୁ ଧରି ପଚରାଉଚରା କରୁଛି। ଏ ନେଇ ଥାନାରେ ଦଫା ୪୫୭, ୩୮୦, ୫୦୬, ୨୯୪ ଆଇପିସି, ପିଡିପିପି ଆକ୍ଟରେ ନଂ. ୧/୨୪ରେ ମାମଲା ରୁଜୁ ହୋଇଥିବା ପୋଲିସ ପକ୍ଷରୁ କୁହାଯାଇଛି।
