ବାରିପଦା,୨୮ା୫(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା ପ୍ରଶାସନ ଓ ବାରିପଦା ପୌରପରିଷଦ ପକ୍ଷରୁ ସରକାରୀ ଜମି ଉପରେ ବୁଲଡୋଜର ବୁଲୁଛି। ପାଲବଣିରୁ ପିଆରଏମ ମେଡିକାଲ କଲେଜକୁ ସଂଯୋଗ କରୁଥିବା ରାସ୍ତାର ପ୍ରଶସ୍ତିକରଣ ନିମନ୍ତେ ଜବରଦଖଲ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ୪ ଲେନ୍ ବିଶିଷ୍ଟ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହେବା ପାଇଁ ଜବରଦଖଲ ମୁକ୍ତ କରିବା ନିମନ୍ତେ ପ୍ରଶାସନ ପକ୍ଷରୁ ୬ଟି ବୁଲଡୋଜର ଉଚ୍ଛେଦ ପ୍ରକ୍ରିୟାରେ ନିୟୋଜିତ ରହିଛନ୍ତି। ବାରିପଦା ସଦର ଉପଜିଲାପାଳ ଡ.ଦୟାସିନ୍ଧୁ ପରିଡ଼ା ମାଜିଷ୍ଟ୍ରେଟ୍ ଭାବେ ରହିଥିବା ବେଳେ ଶାନ୍ତିଶୃଙ୍ଖଳା ନିମନ୍ତେ ବାରିପଦା ତହସିଲଦାର, ଟାଉନ ଥାନାଧିରାରୀ ସମେତ ୪ ପ୍ଲାଟୁନ୍ ପୋଲିସ ଫୋର୍ସ ନିୟୋଜିତ ରହିଛନ୍ତି।
ସୂଚନାନୁଯାୟୀ, ପ୍ରଥମ ପର୍ଯ୍ୟାୟରେ ଉକ୍ତ ୬୧ ନମ୍ବର ରାଜ୍ୟ ରାଜପଥର ପାଲବଣିରୁ ମେଡିକାଲ କଲେଜ ପର୍ଯ୍ୟନ୍ତ ୫କିମି ରାସ୍ତା ୪ ଥାକିଆ ବିଶିଷ୍ଟ ହେବ। ପୂର୍ତ୍ତବିଭାଗ ପକ୍ଷରୁ ଏଥିପାଇଁ ୪୦,୬୬,୪୪,୯୯୫ ଟଙ୍କାରେ ଉକ୍ତ କାର୍ଯ୍ୟ ହେବାକୁ ଥିବା ବେଳେ ଅନ୍ଲାଇନ ଟେଣ୍ଡର ଆହ୍ବାନ କରାଯାଇଛି। ସର୍ଭିସ ରୋଡ୍ ସମେତ ୪ ଥାକିଆ ହେବ। ରାସ୍ତାର ପ୍ରଶସ୍ତିକରଣ ହୋଇ ୨୯ରୁ ୩୦ ମିଟର ହେବ। ବର୍ତ୍ତମାନ ପ୍ରଶସ୍ତିକରଣ କାର୍ଯ୍ୟ ପାଲବଣିରୁ ରଙ୍ଗମାଟିଆ ପର୍ଯ୍ୟନ୍ତ ହେଉଥିବା ବେଳେ ପରବର୍ତ୍ତୀ ପର୍ଯ୍ୟାୟରେ ବାକି ରାସ୍ତା ପ୍ରଶସ୍ତିକରଣ କାର୍ଯ୍ୟ ହେବ ବୋଲି ଜଣାପଡ଼ିଛି।
