ନୂଆଦିଲ୍ଲୀ,୧।୯: ସରକାର ସାରା ବର୍ଷ ଲାଗି ବଜେଟରେ ଧାର୍ଯ୍ୟ କରିଥିବା ବିତ୍ତୀୟ ନିଅଣ୍ଟ ଲକ୍ଷ୍ୟ ମାତ୍ର ୪ ମାସରେ ଟପିଯାଇଛି। ଜୁଲାଇ ଶେଷ ସୁଦ୍ଧା ବିତ୍ତୀୟ ନିଅଣ୍ଟ ୮.୨୧ ଲକ୍ଷ କୋଟି ଟଙ୍କା ରହିଛି। ଏହା ବଜେଟ ଲକ୍ଷ୍ୟର ୧୦୩.୧% ବୋଲି ସରକାରଙ୍କ ଡାଟାରୁ ଜଣାପଡିଛି। ଏହି ସମୟ ମଧ୍ୟରେ ସରକାର ୨.୦୩ ଲକ୍ଷ କୋଟି ଟଙ୍କାର ନେଟ୍ ଟିକସ ସଂଗ୍ରହ କରିବାକୁ ସକ୍ଷମ ହୋଇଛନ୍ତି। ଅପରପକ୍ଷରେ ସରକାରଙ୍କ ମୋଟ ଖର୍ଚ୍ଚ ୧୦.୨ ଲକ୍ଷ କୋଟି ଟଙ୍କା ରହିଛି। କରୋନା ଭାଇରସ୍ ଯୋଗୁ ବଜାରରେ ଉପୁଜିଥିବା ସ୍ଥିତିକୁ ସମ୍ଭାଳିବା ଲାଗି ସରକାର ଅଧିକ ଖର୍ଚ୍ଚ କରୁଥିବା ରିପୋର୍ଟରେ ପ୍ରକାଶ ପାଇଛି। ଫଳରେ ଏଭଳି ସ୍ଥିତି ଉପୁଜିଥିବା ଜଣାପଡିଛି। ଏପ୍ରିଲରେ ଆରମ୍ଭ ହୋଇଥିବା ଚଳିତ ଆର୍ଥତ୍କ ବର୍ଷରେ ବିତ୍ତୀୟ ନିଅଣ୍ଟ ୭.୫% ଛୁଇଁପାରେ ବୋଲି ବଜାର ବିଶେଷଜ୍ଞ କହିଛନ୍ତି। ଏହା ୩.୫% ସ୍ତରରେ ରହିବ ବୋଲି ସରକାର ପୂର୍ବରୁ ଆକଳନ କରିଥିଲେ। କରୋନା ଯୋଗୁ ଘରୋଇ ବଜାର ଗଭୀର ଭାବେ କ୍ଷତିଗ୍ରସ୍ତ ହୋଇଛି। କାରବାର ବର୍ତ୍ତମାନ ସୁଦ୍ଧା ଟ୍ରାକ୍କୁ ଫେରିପାରି ନ ଥିବା ଜଣାପଡିଛି। ବଜାରର ସ୍ଥିତିକୁ ସମ୍ଭାଳିବା ଲାଗି ସରକାର ଏବଂ କେନ୍ଦ୍ରୀୟ ବ୍ୟାଙ୍କର ବିଭିନ୍ନ ପଦକ୍ଷେପ ଜାରି ରଖିଛି। ସୂଚନାଯୋଗ୍ୟ, ସରକାରଙ୍କ ଆୟ ଏବଂ ବ୍ୟୟ ମଧ୍ୟରେ ରହିଥିବା ପାର୍ଥକ୍ୟକୁ ବିତ୍ତୀୟ ନିଅଣ୍ଟ ବା ରାଜକୋଷୀୟ ଘାଟା ବୋଲି ବିବେଚନା କରାଯାଇଥାଏ। ଆୟଠାରୁ ବ୍ୟୟ ବଢିଲେ ଏହା ରାଜକୋଷ ଉପରେ ବେଶି ପ୍ରଭାବ ପକାଇଥାଏ। କାରଣ ନିଅଣ୍ଟ ହେଉଥିବା ଅର୍ଥକୁ ସରକାର ଋଣ ଦ୍ୱାରା ଭରଣା କରିଥାନ୍ତି। ଟିକସ ସଂଗ୍ରହ ପରେ ଏହାକୁ ପୁଣି ଥରେ ଶୁଝିବାକୁ ପଡେ। ଏହି ଅର୍ଥ ଶୁଝିବା ଲାଗି ଏକ ବୃହତ୍ ପରିମାଣର ଅର୍ଥ ସୁଧ ଭାବେ ଖର୍ଚ୍ଚ କରିବାକୁ ପଡ଼େ।
