ଦାରିଙ୍ଗବାଡ଼ି,୧୬ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ବାରମ୍ବାର ମୋବାଇଲ ସେବା ପୂରା ବନ୍ଦ ହୋଇପଡୁଛି। ଫଳରେ ଉପଭୋକ୍ତାମାନେ ହଟହଟା ହେଉଛନ୍ତି। ଏଭଳି ଦିନେ କି ଦୁଇ ଦିନ ନୁହଁ ଦୀର୍ଘ ସମୟ ଧରି ଅଚଳ ହୋଇପଡୁଥିବା ବେଳେ ଏବେ କିରିକୁଟି ପଞ୍ଚାୟତରେ ରହିଥିବା ବିଏସ୍ଏନ୍ଏଲ୍ ମୋବାଇଲ ସେବା ଆଜକୁ ଏକ ସପ୍ତାହ ହେଲା ଅଚଳ ହୋଇପଡ଼ିଛି। କିଛି ଗ୍ରାହକଙ୍କ ମୋବାଇଲ ସିଗନାଲ ଥିବା ବେଳେ କଲ୍ କିମ୍ବା ଇଣ୍ଟରନେଟ ନାହିଁ। ପଞ୍ଚାୟତର ସମସ୍ତ ଉପଭୋକ୍ତାଙ୍କ ମଧ୍ୟରୁ ବାବୁଲା ପଣ୍ଡାଙ୍କ ଜଣଙ୍କର ହିଁ ମୋବାଇଲକୁ କଲ୍ ଯାତାୟାତ କରୁଥିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ବିଏସ୍ଏନ୍ଏଲ୍ ସେବାର ଏହି ଅଜବ ନୀତି ଓ ଯାନ୍ତ୍ରିକ ତ୍ରୁଟିକୁ ନେଇ ଅଞ୍ଚଳବାସୀ ଅସନ୍ତୋଷ ବ୍ୟକ୍ତ କରିଛନ୍ତି।
ଉକ୍ତ ପଞ୍ଚାୟତର ଦୁର୍ଗମ ଗ୍ରାମ ନାହୁଡ଼ସରୁ ଗ୍ରାମର ସୁକାନ୍ତ କୁମାର ପ୍ରଧାନ କହିଛନ୍ତି ଯେ, ଏହି ସେବା ଅଚଳ ଯୋଗୁ ଆମ୍ବୁଲାନ୍ସକୁ ଫୋନ କରିବା ସମ୍ଭବ ହେଉ ନ ଥିବା ବେଳେ ଅନଲାଇନ କାର୍ଯ୍ୟ ବିଶେଷ କରି ସରକାରୀ ଓ ବେସରକାରୀ କାର୍ଯ୍ୟରେ ସମସ୍ୟା ଦେଖାଯାଉଥିବା ସେ ଅଭିଯୋଗ କରିଛନ୍ତି। ତେବେ ମୋବାଇଲର କିଛି ଲୋକଙ୍କ ସିଗ୍ନାଲ ଆସୁଥିବା ବେଳେ ବହୁ ଲୋକଙ୍କ ସିଗ୍ନାଲ କି କଲ ଆସୁ ନ ଥିବା ଅଭିଯୋଗ ହୋଇଛି। ତୁରନ୍ତ ଏହାର ମରାମତି କରିବାକୁ ଅଞ୍ଚଳବାସୀ ଦାବି କରିଛନ୍ତି।
