ଶ୍ରୀନଗର, ୨୫।୮ : ଜମ୍ମୁ-କଶ୍ମୀରର ସାମ୍ବା ସେକ୍ଟରରେ ଡ୍ରଗ୍ସ ଚୋରା କାରବାର ଉଦ୍ୟମକୁ ସୀମା ସୁରକ୍ଷା ବଳ (ବିଏସ୍ଏଫ୍) ପକ୍ଷରୁ ପଣ୍ଡ କରାଯାଇଛି। ବିଏସ୍ଏଫ୍ ଯବାନମାନେ ଜଣେ ଅନୁପ୍ରବେଶକାରୀଙ୍କୁ ଗୁଳି କରିଥିଲେ। ତେବେ ଅନୁପ୍ରବେଶକାରୀ ଖସିଯିବାରେ ସଫଳ ହୋଇଛନ୍ତି। କିନ୍ତୁ ସେ ଜୀବନ ଭୟରେ ବିପୁଳ ପରିମାଣର ଡ୍ରଗ୍ସ ଛାଡ଼ି ପଳାଇଥିଲେ। ଏସବୁକୁ ଜବତ କରାଯାଇଛି।
ଅନ୍ତର୍ଜାତୀୟ ସୀମା (ଆଇବି)ରେ ଚିଲିୟାରି ସୀମା ପୋଷ୍ଟ ନିକଟରେ ଜଣେ ବ୍ୟକ୍ତିଙ୍କ ସନ୍ଦେହଜନକ ଗତିବିଧିକୁ ଲକ୍ଷ୍ୟ କରି ବିଏସ୍ ଏଫ୍ ଯବାନମାନଙ୍କ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। ବ୍ୟକ୍ତି ଜଣକ ବ୍ୟାଗ ଧରିଥିଲେ। ଅଧିକାରୀ କହିଛନ୍ତି ଯେ ଯବାନଭାବେ ଗୁଳି ଚଳାଇ ଅନୁପ୍ରବେଶକାରୀଙ୍କୁ ଆହତ କରିଥିଲେ। ସର୍ଚ୍ଚ ଅପରେଶନ ସମୟରେ ଆଠଟି ପ୍ୟାକେଟ ଜବତ କରାଯାଇଥିବା ସେ କହିଛନ୍ତି। ଏଥିରେ ପ୍ରାୟ ଆଠ କିଲୋଗ୍ରାମ ନାର୍କୋଟିକ ପଦାର୍ଥ ରହିଛି। ଏହା ହିରୋଇନ ହୋଇପାରେ ବୋଲି ଅନୁମାନ କରାଯାଉଛି। ଅଧିକାରୀ କହିଛନ୍ତି ଯେ ଆହତ ଅନୁପ୍ରବେଶକାରୀ ପାକିସ୍ତାନ ସୀମାକୁ ଫେରିଯାଇଛନ୍ତି।
