କୁଚିଣ୍ଡା,୨୬।୪(ବିରଞ୍ଚତ୍ ଦର୍କା): ସମ୍ବଲପୁର ଜିଲା ଗୋବିନ୍ଦପୁର ଥାନା କିନାବଗା ପଞ୍ଚାୟତ ଦଲକିବାହାଲ ଗ୍ରାମରେ ଗୁରୁବାର ରାତିରେ ଏକ ଜଘନ୍ୟ ହତ୍ୟାକାଣ୍ଡ ଘଟିଛି। ନିଜ ଭାଇବୋହୂ ଏବଂ ପୁତୁରାଙ୍କୁ ଦେଢଶୁର ଏକ ଟାଙ୍ଗିଆରେ ହାଣିବାରୁ ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଛି।
ପୋଲିସ ଅଭିଯୁକ୍ତ ଦଲକାବାହାଲ ଗ୍ରାମର ଲୁଚନ ପିଙ୍ଗ ଓରଫ କୁଜୁର(୩୫)ଙ୍କୁ ଶୁକ୍ରବାର ଗିରଫ କରି କୁଚିଣ୍ଡା ଏସ୍ଡିଜେଏମ୍ କୋର୍ଟକୁ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି। ମୃତକ ହେଲେ ଲୁଚନଙ୍କ ସାନଭାଇ ପରମେଶ୍ୱରଙ୍କ ସ୍ତ୍ରୀ ପୂର୍ଣ୍ଣିମା (୨୫) ଓ ତାଙ୍କ ଦୁଇ ବର୍ଷର ଶିଶୁପୁତ୍ର ଜାଶୁଂକ। ହତ୍ୟାର କାରଣ ଅସ୍ପଷ୍ଟ ରହିଛି।
ତେବେ ଲୁଚନ ଜଣେ ବଦରାଗୀ ପ୍ରକୃତିର ହୋଇଥିବାରୁ ଏଭଳି ହତ୍ୟାକାଣ୍ଡ ଘଟାଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ପରମେଶ୍ୱରଙ୍କ ରିପୋର୍ଟ ଆଧାରରେ ପୋଲିସ ଗୋବିନ୍ଦପୁର ଥାନାରେ ଏକ ହତ୍ୟା ମାମଲା (ନଂ. ୭୬/୨୦୨୪) ରୁଜୁ କରିଛି। ମା’ ଓ ପୁଅଙ୍କ ମୃତଦେହ ଜବତ କରି ବାମରା ଡାକ୍ତରଖାନାରେ ବ୍ୟବଚ୍ଛେଦ କରାଇଛି। ହତ୍ୟାରେ ବ୍ୟବହୃତ ଟାଙ୍ଗିଆକୁ ଜବତ କରାଯାଇଛି। କୁଚିଣ୍ଡା ଏସ୍ଡିପିଓ ଅମିତାଭ ପଣ୍ଡା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ପରମେଶ୍ୱର କୌଣସି କାମରେ ଗୁରୁବାର ସମ୍ବଲପୁରକୁ ଯାଇ ରାତି ପର୍ଯ୍ୟନ୍ତ ଘରକୁ ଫେରି ନ ଥିଲେ। ସ୍ବାମୀଙ୍କ ଅନୁପସ୍ଥିତି କାରଣରୁ ପୂର୍ଣ୍ଣିମା ତାଙ୍କ ପିଉସୀ କମଳାଙ୍କୁ ଡାକି ଘରେ ଶୋଇଥିଲେ। ଲୁଚନ ପ୍ରାୟ ସାଢେ ୯ଟାରେ ତାଙ୍କ ଘରକୁ ଆସି କବାଟ ବାଡେଇଥିଲେ। ମାତ୍ର କେହି କବାଟ ନ ଖୋଲିବାରୁ ରାଗିଯାଇ କବାଟ ଭାଙ୍ଗି ଘରକୁ ପଶି ଏଭଳି ହତ୍ୟାକାଣ୍ଡ ଘଟାଇଥିଲେ।
ରାତି ପ୍ରାୟ ୯ଟା ୪୫ଟାରେ ଲୁଚନ ଫୋନ କରି ପରମେଶ୍ୱରଙ୍କୁ କହିଥିଲେ, ‘ତୋ ସ୍ତ୍ରୀ ଓ ପୁଅକୁ ମାରି ଦେଇଛି’। ତେଣୁ ବ୍ୟସ୍ତବିବ୍ରତ ହୋଇ ପରମେଶ୍ୱର ଘରକୁ ଆସି ଦେଖିବାରେ ରକ୍ତ ଜୁଡୁବୁଡୁ ଅବସ୍ଥାରେ ଘର ଚଟାଣରେ ଉଭୟଙ୍କ ମୃତଦେହ ପଡିଥିଲା। ପିଉସୀଙ୍କ ଆଖି ସାମ୍ନାରେ ହିଁ ଏଭଳି ବିଭତ୍ସ କାଣ୍ଡ ଘଟିଥିଲା। ପରମେଶ୍ୱରଙ୍କ ଅନ୍ୟ ୩ପିଲା ଅନ୍ୟ କୋଠରୀରେ ଶୋଇଥିବାରୁ ସୌଭାଗ୍ୟବଶତଃ ସେମାନେ ବର୍ତ୍ତିଯାଇଛନ୍ତି।
