ମୁମ୍ବାଇ, ୧ା୨: ଅଭିନେତା ସୈଫ୍ ଅଲୀ ଖାନ୍ଙ୍କୁ ଆକ୍ରମଣ ଘଟଣାରେ କିଛି ଦିନ ତଳେ ମୁମ୍ବାଇ ପୋଲିସ ଛତିଶଗଡ଼ର ଦୁର୍ଗରୁ ୩୧ ବର୍ଷୀୟ ଆକାଶ କନୋଜିଆଙ୍କୁ ସନ୍ଦିଗ୍ଧ ଭାବି ଅଟକ ରଖିବା ସହ ପଚରାଉଚରା କରିଥିଲା। ତେବେ ଏହାର ଦିନକ ପରେ ସୈଫ୍ଙ୍କୁ ଆକ୍ରମଣରେ ଆକାଶଙ୍କ ଭୂମିକା ନ ଥିବା ସ୍ପଷ୍ଟ ହେବା ପରେ ପୋଲିସ ତାଙ୍କୁ ଛାଡ଼ି ଦେଇଥିଲା। ମୁମ୍ବାଇ ପୋଲିସର ଏହି ଭୁଲ୍ ତାଙ୍କ ଜୀବନକୁ ପ୍ରଭାବିତ କରିଛି ବୋଲି ଗୁରୁବାର ଆକାଶ କହିଛନ୍ତି। ପୋଲିସର ଅନାବଶ୍ୟକ କାର୍ଯ୍ୟାନୁଷ୍ଠାନ ଯୋଗୁ ତାଙ୍କୁ ଚାକିରି ହରାଇବାକୁ ପଡ଼ିଥିବା ସହ ତାଙ୍କ ବିବାହ ପ୍ରସ୍ତାବ ମଧ୍ୟ ଭାଙ୍ଗିଯାଇଥିବା ଆକାଶ କହିଛନ୍ତି। ସୈଫ୍ଙ୍କୁ ଛୁରାମାଡ଼ ଘଟଣାରେ ସମ୍ପୃକ୍ତି ନ ଥାଇ ମଧ୍ୟ ପୋଲିସ ତାଙ୍କ ଫଟୋକୁ ଗଣମାଧ୍ୟମକୁ ଦେଇଥିଲା। ଫଳରେ ତାଙ୍କ ଫଟୋ ବିଭିନ୍ନ ସୋସିଆଲ ମିଡିଆ ପ୍ଲାଟ୍ଫର୍ମ ଓ ଗଣମାଧ୍ୟମରେ ସୈଫଙ୍କ ଆକ୍ରମଣକାରୀ ଭାବେ ଭାଇରାଲ ହେବାରେ ଲାଗିଥିଲା। ସେ ପୂର୍ବରୁ ଡ୍ରାଇଭର ଭାବେ କାର୍ଯ୍ୟ କରୁଥିଲେ। ତେବେ ଏହି ଘଟଣା ପରେ ତାଙ୍କ ଚାକିରି ଚାଲିଯାଇଥିବା ଆକାଶ କହିଛନ୍ତି। ସେହିପରି ଘଟଣା ପୂର୍ବରୁ ତାଙ୍କର ବିବାହ ଠିକ୍ ହୋଇଯାଇଥିଲା। ସୈଫ୍ଙ୍କ ଆକ୍ରମଣକାରୀ ହୋଇଥିବା ନେଇ ବହୁଳ ଭାବରେ ପ୍ରଚାରପ୍ରସାର ହେବାରୁ କନ୍ୟା ପକ୍ଷ ପରେ ଉକ୍ତ ବିବାହ ପ୍ରସ୍ତାବକୁ ଭାଙ୍ଗି ଦେଇଥିଲେ। ସେହିପରି ଉକ୍ତ ଘଟଣା ପରେ ବନ୍ଧୁ ଓ ସମ୍ପର୍କୀୟମାନେ ମଧ୍ୟ ତାଙ୍କ ସହ କଥା ହେବାକୁ ଓ ମିଶିବାକୁ ଦ୍ୱିଧା ପ୍ରକାଶ କରୁଥିବା ଆକାଶ କହିଛନ୍ତି।
