ବେଳାଭୂମି ଜଙ୍ଗଲରେ ଇଟା ପାଚେରି
9:09 amAugust 24, 2023August 24, 2023 / 08

ପାରାଦୀପ,୨୪।୮(ଶରତ ରାଉତ)ପାରାଦୀପ ଷଣ୍ଢକୁଦ ବସ୍ତିର ଅନତି ଦୂରରେ ବିସ୍ତୀର୍ଣ୍ଣ ବେଳାଭୂମି ସହ ଝାଉଁ ଜଙ୍ଗଲ ରହିଛି। ସେହି ଜଙ୍ଗଲ ମଝିରେ ଅଛି ବନ ବିଭାଗର ବିଟ୍‌ ହାଉସ। ତା’ଠାରୁ ୫୦୦ ମିଟର ଆଗକୁ ଗଲେ କେବଳ ଜଙ୍ଗଲ ଓ ବେଳାଭୂମି ରହିଛି। ମଝିରେ ରହିଛି ଉପକୂଳ ରାସ୍ତା। ରାସ୍ତାର ଗୋଟିଏ ପାର୍ଶ୍ୱରେ ବେଳାଭୂମି ଓ ଅପରପାଶର୍‌ବରେ ତୈଳ ବିଶୋଧନାଗାର ରହିଛି। ସେହି ଅଞ୍ଚଳ ଏରସମା ବ୍ଲକ ଅଧୀନରେ ରହିଛି। ପାରାଦୀପରୁ ଏରସମା ଢିଙ୍କିଆ ଗ୍ରାମ ପର୍ଯ୍ୟନ୍ତ ରାସ୍ତାର ବେଳାଭୂମି ପାର୍ଶ୍ୱରେ କେତେ ମାସ ହେଲା ଜବରଦଖଲ ଚାଲିଛି। ଏପରିକି କେତେଜଣ ଲୋକ ସେଠାରେ ଝାଉଁ ଜଙ୍ଗଲ ମଧ୍ୟରେ ଇଟା, ସିମେଣ୍ଟ ଯୁକ୍ତ ପାଚେରି ନିର୍ମାଣ କରିସାରିଲେଣି। ଆଉ କେତେଜଣ ଲୋକ ବାଡ଼ ବୁଲେଇ ତା’ ମଧ୍ୟରେ କବାଡିଆ ସାମଗ୍ରୀ ରଖିଥିବା ଦେଖିବାକୁ ମିଳିଛି। ଏହାବାଦ୍‌ ସେହି ବେଳାଭୂମିରେ୧୨ରୁ ଅଧିକ ନଳକୂପ ଖୋଳି ମୋଟର ଯୋଗେ ପାଣି ଉତ୍ତୋଳନ କରି ବିଭିନ୍ନ ଠିକା କମ୍ପାନୀକୁ ବିକୁଥିବା ଦେଖିବାକୁ ମିଳିଛି। ରାସ୍ତା କଡରେ ଚିଙ୍ଗୁଡ଼ି ଚୋପା ଓ ମୁଣ୍ଡ ଖୋଳପା ଶୁଖା ଯାଇ ଖତ ତିଆରି ଚାଲିଛି। ଏମିତି ଅନେକ ପରିବେଶ ବିରୋଧୀ କାର୍ଯ୍ୟ ସେହି ଅଞ୍ଚଳରେ ଅବାଧରେ ଚାଲିଛି ବୋଲି ପାରାଦୀପର ସ୍ବେଚ୍ଛାସେବୀ ସଙ୍ଗଠନ ଆହ୍ବାନ କମ୍ବାଇନ୍ସ ସଭାପତି ସାଗର ବିଶ୍ୱାଳ ବନ ବିଭାଗ ନିକଟରେ ଏକାଧିକ ବାର ଅଭିଯୋଗ କରିଛନ୍ତି। ଏହାସତ୍ତ୍ୱେ ସେହି ଅଞ୍ଚଳରେ ବିଭିନ୍ନ ଆପରାଧିକ କାର୍ଯ୍ୟକଳାପ ଚାଲିଛି। ବନ ବିଭାଗ ଉକ୍ତ ଅଞ୍ଚଳର ସୁରକ୍ଷା ପାଇଁ ଯେତିକି ବ୍ୟବସ୍ଥା କରିବା କଥା ତାହା କରୁନାହାନ୍ତି ବୋଲି ବିଶ୍ୱାଳ କୁହନ୍ତି। ଏହାଦ୍ୱାରା ସେଠାରେ ଜଙ୍ଗଲ ଲୋପ ପାଉଥିବା ବେଳେ ଜବରଦଖଲ ବଢୁଛି।
ଭୌଗୋଳିକ ଭାବେ ଉକ୍ତ ଅଞ୍ଚଳ ପାରାଦୀପ ସୀମା ମଧ୍ୟରେ ଯାଉଥିବା ବେଳେ ସରକାରୀ ଭାବେ ଏରସମା ତହସିଲ ଅଧୀନରେ ରହିଛି। ଏରସମା ତହସିଲ ସଦର ମହକୁମାଠାରୁ ଉକ୍ତ ଅଞ୍ଚଳ ଦୂରତା ଏବଂ ଗମନାଗମନ କଷ୍ଟସାଧ୍ୟ ଯୋଗୁ ସେମାନେ ପ୍ରାୟ ସମୟରେ ଆସନ୍ତି ନାହିଁ। ପାରାଦୀପ ପୌର ପରିଷଦ ତାଙ୍କ ସୀମା ବାହାର ହୋଇଥିବାରୁ ସେମାନେ ସେହି ଅଞ୍ଚଳକୁ ଯାଆନ୍ତି ନାହିଁ। ଏପରି ସୁଯୋଗରେ କେତେଜଣ ମୁଷ୍ଟିମେୟ ଲୋକ ସେମାନଙ୍କ ପ୍ରଭାବ ବିସ୍ତାର କରୁଥିବା ଜଣାଯାଏ। ବନ ବିଭାଗ ବିଟ ହାଉସ ଭୂତକୋଠି ପରି ରହିଛି। ଜଣେ ଗାର୍ଡ କୁଜଙ୍ଗରୁ ୨୫ କିମି ପର୍ଯ୍ୟନ୍ତ ଆସି ନିୟମିତ ପାଟ୍ରୋଲିଂ କରୁନାହାନ୍ତି ବୋଲି ଖୋଦ୍‌ ଗାର୍ଡ ନିରଞ୍ଜନ ମଣ୍ଡଳ କହିଛନ୍ତି। ଯେଉଁ ବେଳାଭୂମି ଜଙ୍ଗଲକୁ ପାଚେରି ଦ୍ୱାରା ଆବଦ୍ଧ କରାଯାଇଛି ତାହା ପଟ୍ଟା ଜାଗା ବୋଲି ଗାର୍ଡ ମଣ୍ଡଳ କୁହନ୍ତି। ପଟ୍ଟା ଜାଗାରେ ବନ ବିଭାଗ କିପରି ଚାରା ରୋପଣ କରିବା ପ୍ରଶ୍ନରେ କୁହନ୍ତି, ଏ ସମ୍ପର୍କରେ ଜାଣିନାହିଁ। କୁଜଙ୍ଗ ବନାଞ୍ଚଳ ଅଧିକାରୀ ରଞ୍ଜନ ମିଶ୍ରଙ୍କୁ ପଚାରିବାରେ ଆମର ମ୍ୟାନ ପାୱାର କମ୍‌ ଥିବାରୁ ଠିକ୍‌ ଭାବେ ଅଞ୍ଚଳର ତଦାରଖ କରିପାରୁ ନାହାନ୍ତି। କିନ୍ତୁ ଯେଉଁମାନେ ଜଙ୍ଗଲ ଜମି ଜବରଦଖଲ କରିଥିବା ଯାଞ୍ଚ ବେଳେ ଜଣାପଡ଼ିବ ସେତେବେଳେ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ।