ଭୁବନେଶ୍ୱର,୧୭।୭(ବ୍ୟୁରୋ): ଖାକିରେ ଲାଗିଛି ଲାଞ୍ଚ କଳଙ୍କ। ସବୁଠୁ ଦକ୍ଷ ତଥା ସଚ୍ଚୋଟ ବୋଲି କହୁଥିବା କମିଶନରେଟ ପୋଲିସ ମୁଖ୍ୟାଳୟରେ ବି ଚାଲିଛି ଲାଞ୍ଚ କାରବାର। ଯେଉଁଥିପାଇଁ ଗୁରୁବାର ପୋଲିସ ଭବନରେ ପଶିଛି ଭିଜିଲାନ୍ସ। ପ୍ରୋଭିଡେଣ୍ଟ ଫଣ୍ଡ୍ (ପିଏଫ୍) କରାଇ ଦେବାକୁ ୮ ହଜାର ଟଙ୍କା ଲାଞ୍ଚ ନେଉଥିବାବେଳେ ଜଣେ କନଷ୍ଟେବଳଙ୍କୁ ଧରିଛି। ସେ ହେଲେ ପୋଲିସ ସେବା ଭବନର ଆକାଉଣ୍ଟ ସେକ୍ସନରେ କାର୍ଯ୍ୟରତ କନଷ୍ଟେବଳ ସୁରେଶଚନ୍ଦ୍ର ଦାସ। ଭିଜିଲାନ୍ସ କେସ୍ ନଂ-୧୮/୨୦ ରୁଜୁ କରି ସୁରେଶଙ୍କୁ ଗିରଫ ପରେ କୋର୍ଟଚାଲାଣ କରିଥିଲା। ଜାମିନ ନ ମିଳିବାରୁ ତାଙ୍କୁ ଝାରପଡା ଜେଲକୁ ପଠାଇ ଦିଆଯାଇଛି। ଅନ୍ୟପକ୍ଷରେ ଏହି ଘଟଣାକୁ ନେଇ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କନଷ୍ଟେବଳ ସୁରେଶଙ୍କୁ ନିଲମ୍ବିତ କରିଛନ୍ତି।
ସୂଚନାନୁଯାୟୀ, ବାଲିପାଟଣା ଅଞ୍ଚଳରେ କାର୍ଯ୍ୟରତ ଓଏପିଏଫ୍ର ରତ୍ନାକର ପେଦେନ୍ତି ନିଜ ପ୍ରୋଭିଡେଣ୍ଟ ଫଣ୍ଡ୍ (ପିଏଫ୍) କରିବାକୁ କମିଶନରେଟ ପୋଲିସ ମୁଖ୍ୟାଳୟରେ ଅବେଦନ କରିଥିଲେ। ହେଲେ ଦାୟିତ୍ୱରେ ଥିବା କନଷ୍ଟେବଳ ସୁରେଶ ଏଥିଲାଗି ୧୦ ହଜାର ଟଙ୍କା ମାଗିଥିଲେ। ଶେଷରେ ୮ ହଜାର ଟଙ୍କାରେ କଥା ଛିଣ୍ଡିଥିଲା। ଏନେଇ ରତ୍ନାକର ଭିଜିଲାନ୍ସରେ ଜଣାଇଥିଲେ। ଭିଜିଲାନ୍ସର ଯୋଜନା ମୁତାବକ ରତ୍ନାକର ଗୁରୁବାର ସକାଳେ କମିଶନରେଟ ପୋଲିସ ମୁଖ୍ୟାଳୟକୁ ଯାଇ କେମିକାଲ ବୋଳା ୮ହଜାର ଟଙ୍କା ସୁରେଶଙ୍କୁ ଦେଇଥିଲେ। ପୂର୍ବରୁ ସେଠାରେ ଛକି ରହିଥିବା ଭିଜିଲାନ୍ସ ଅଧିକାରୀମାନେ ଚଢାଉ କରି ସୁରେଶଙ୍କୁ କାବୁ କରିବା ସହ ଉକ୍ତ ଲାଞ୍ଚ ଟଙ୍କାକୁ ତାଙ୍କ ପ୍ୟାଣ୍ଟ ପକେଟରୁ ଜବତ କରିଥିଲେ। ସୁରେଶଙ୍କ ହାତ ଓ ଟଙ୍କାରୁ କେମିକାଲ ଚିହ୍ନଟ ହେବା ପରେ ତାଙ୍କୁ ଭିଜିଲାନ୍ସ ଗିରଫ କରିଥିଲା।
