ଭୁବନେଶ୍ୱର,୨୫।୨(ବ୍ୟୁରୋ): ନନ୍ଦନକାନନ ଥାନା ଅନ୍ତର୍ଗତ ରଘୁନାଥପୁର ଗ୍ରାମର ଏକ ନିର୍ମାଣାଧୀନ ଆପାର୍ଟମେଣ୍ଟ ନିକଟ ପ଼ଡ଼ିଆରୁ ଜଣେ ମହିଳାଙ୍କ ମୃତଦେହ ଜବତ ମାମଲାରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଉକ୍ତ ମହିଳାଙ୍କୁ ବଳାତ୍କାର ପରେ ଓଢ଼ଣିରେ ତଣ୍ଟିଚିପି ହତ୍ୟା କରାଯାଇଥିବା ନେଇ ଅଭିଯୋଗ ପରେ ତାଙ୍କ ପ୍ରେମିକଙ୍କୁ ପୋଲିସ ଶୁକ୍ରବାର ଗିରଫ କରିଛି। ସେ ହେଲେ ଯାଜପୁର ଜିଲା ବାଲିଚନ୍ଦ୍ରପୁର ଥାନା ଅଞ୍ଚଳର ଲୋକନାଥ ପୃଷ୍ଟି ଓରଫ ବଳିଆ। ଅଭିଯୁକ୍ତ ଲୋକନାଥଙ୍କୁ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ମୃତା ମହିଳା ଜଣଙ୍କ ଘର ପୁରୀ ଜିଲାରେ ହୋଇଥିବା ବେଳେ ସେ ରଘୁନାଥପୁର ଅଞ୍ଚଳରେ ଭଡ଼ାଘରେ ରହି ବିଭିନ୍ନ ଆପାର୍ଟମେଣ୍ଟରେ ଘରୋଇ କାମ କରୁଥିଲେ। ଅଭିଯୁକ୍ତ ଲୋକନାଥ ମଧ୍ୟ ସେହି ଅଞ୍ଚଳରେ ରହି ଶ୍ରମିକ ଭାବେ କାମ କରୁଥିଲେ। ତେବେ ଉଭୟ ୭ ମାସ ହେଲା ପରସ୍ପରକୁ ଚିହ୍ନିଥିଲେ ଏବଂ ସେମାନଙ୍କ ମଧ୍ୟରେ ପ୍ରେମସମ୍ପର୍କ ରହିଥିଲା। ଫେବୃୟାରୀ ୧୭ ଭୋର ପ୍ରାୟ ୫ଟା ୩୦ ବେଳେ ଉଭୟ ଘଟଣାସ୍ଥଳକୁ ଯାଇଥିଲେ। ତେବେ ସେଠାରେ କୌଣସି କାରଣକୁ ନେଇ ବଚସା ହେବା ପରେ ଲୋକନାଥ ଉକ୍ତ ମହିଳାଙ୍କ ଏକ ଓଢ଼ଣିରେ ତଣ୍ଟି ଚିପି ଦେଇଥିଲେ। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ପରେ ପ୍ରମାଣ ଲୁଚାଇବା ଉଦ୍ଦେଶ୍ୟରେ ମୃତଦେହକୁ ଲୋକନାଥ ନିକଟସ୍ଥ ପାଚେରି କଡ଼ରେ ଫୋପାଡ଼ି ଦେଇ ପଳାଇଥିଲେ। ମୃତଦେହ ପଡ଼ିଥିବା ଦେଖି ସ୍ଥାନୀୟ ଅଞ୍ଚଳର କୃଷ୍ଣଚନ୍ଦ୍ର ମାଝି ଥାନାରେ ଅଭିଯୋଗ କରିଥିଲେ। ଏ ନେଇ ପୋଲିସ ଅପମୃତ୍ୟୁ ମାମଲା (ନଂ.୧/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ପୋଷ୍ଟମର୍ଟମ ଓ ସାଇଣ୍ଟିଫିକ୍ ରିପୋର୍ଟରେ ମହିଳାଙ୍କୁ ବଳାତ୍କାର କରି ହତ୍ୟା କରାଯାଇଥିବା ଜଣାପଡ଼ିଥିଲା। ଏ ନେଇ ପୋଲିସ ଆଇପିସି ଦଫା ୩୭୬, ୩୦୨ରେ ଏକ ହତ୍ୟା ମାମଲା (ନଂ. ୪୬/୨୦୨୩) ରୁଜୁ କରି ତଦନ୍ତ ଚଳାଇ ଲୋକନାଥ ସମ୍ପୃକ୍ତ ଥିବା ଜଣାପଡ଼ିଥିଲା। ଶୁକ୍ରବାର ନନ୍ଦନକାନନ ଅଞ୍ଚଳରେ ସେ ବୁଲୁଥିବା ବେଳେ ପୋଲିସ ଧରିଥିଲା।
