ବୈଶିଙ୍ଗା,୨୧ା୧୦(ଡି.ଏନ.ଏ.): ମୟୂରଭଞ୍ଜ ଜିଲା ବୈଶିଙ୍ଗା ସ୍ଥିତ ବ୍ୟାଙ୍କ ଅଫ୍ ଇଣ୍ଡିଆରେ ନକଲି ସୁନା ଗହଣା ଦେଇ ୮୩ଲକ୍ଷ ଟଙ୍କା ଋଣ ନେଇଥିବା ଅଭିଯୋଗ ହୋଇଛି। ଘଟଣା ଜଣାପଡ଼ିବା ପରେ ବ୍ୟାଙ୍କ ପକ୍ଷରୁ ବୈଶିଙ୍ଗା ଥାନାରେ ଅଭିଯୋଗ କରାଯାଇଛି। ଏଥିରେ ପୂର୍ବତନ ବ୍ୟାଙ୍କ ପରିଚାଳକଙ୍କ ସମ୍ପୃକ୍ତି ଥିବା କୁହାଯାଉଛି। ସୂଚନା ମୁତାବକ, ବାଲେଶ୍ୱର ଜିଲା ରସାଳପୁର ଗ୍ରାମର ପୂର୍ଣ୍ଣଚନ୍ଦ୍ର ଘଡ଼େଇ (୪୯) ଉକ୍ତ ବ୍ୟାଙ୍କରୁ ୩ ମାର୍ଚ୍ଚ ୨୦୨୨ରେ ୬୧୫ ଗ୍ରାମ ସୁନା ବଦଳରେ ୨୧ ଲକ୍ଷ ୪୯ହଜାର, ତାଙ୍କ ସ୍ତ୍ରୀ ରେଣୁବାଳା ଘଡେଇଙ୍କ ନାମରେ ୨୫୫ ଗ୍ରାମ ସୁନା ବଦଳରେ ୯ ଲକ୍ଷ ୨୮ ହଜାର ଏବଂ ସମାନ ଦିନ ସହଦେବଖୁଣ୍ଟା ହରିଶ ଚନ୍ଦ୍ର ବେହେରାଙ୍କ ସ୍ତ୍ରୀ ମନୋରମା ବେହେରା(୪୮) ୫୦୦ ଗ୍ରାମ ସୁନା ବଦଳରେ ୧୭ ଲକ୍ଷ ୫୨ ହଜାର, ଜଳଖଟୁଆ ଗ୍ରାମର ବିପିନ ଚନ୍ଦ୍ର ବାରିକଙ୍କ ପତ୍ନୀ ଅଭିଲିପ୍ସା ବାରିକ (୨୭) ୧ କିଲୋ ୩୬ଗ୍ରାମ ସୁନା ବଦଳରେ ୩୩ ଲକ୍ଷ ୭୯ ହଜାର ଟଙ୍କା ଋଣ ଆକାରରେ ନେଇଥିଲେ। ଧାର୍ଯ୍ୟ ତାରିଖ ମଧ୍ୟରେ ଋଣକର୍ତ୍ତାମାନେ ଟଙ୍କା ପରିଶୋଧ ନ କରିବାରୁ ବ୍ୟାଙ୍କ ନୋଟିସ୍ ପରେ ମଧ୍ୟ କେହି ସହଯୋଗ କରି ନ ଥିଲେ। ଋଣ କାରବାର ପୂର୍ବତନ ଶାଖା ପରିଚାଳିକାଙ୍କ ସମୟରେ ହୋଇଥିବା ବେଳେ ବର୍ତ୍ତମାନର ଶାଖା ପରିଚାଳକ ଏହାର ତନାଘନ କରିଥିଲେ। ବ୍ୟାଙ୍କ ତରଫରୁ ବନ୍ଧକ ଗହଣାର ପୁନଃ ପରୀକ୍ଷଣ ପରେ ତାହା ନକଲି ବୋଲି ଜଣାପଡ଼ିଥିଲା। ବାରିପଦାସ୍ଥିତ ବ୍ୟାଙ୍କ ଅଫ ଇଣ୍ଡିଆର ଜୋନାଲ ମ୍ୟାନେଜର ରମେଶ ଚନ୍ଦ୍ର ଦାସଙ୍କ ଅଭିଯୋଗକୁ ଆଧାର ପୋଲିସ ନଂ. ୩୨୬/୨୨ରେ ଏକ ମାମଲା ରୁଜୁ କରି ତଦନ୍ତ କରୁଥିବା କହିଛି।
