ଗୋପାଳପୁର,୧୯।୨(ନବୀନ ରାଜ ଆଚାରୀ): ଗୋଳନ୍ଥରା ଥାନା ଅଞ୍ଚଳରେ ଗତ ୭ ତାରିଖ ରାତିରେ ଜଣେ ବିଜେଡି ଯୁବନେତା ସୁବାଶିଷ ସାହୁଙ୍କ ଘର ଉପରେ ବୋମାମାଡ଼ ହୋଇଥିଲା। ଏହି ଘଟଣାରେ ମଙ୍ଗଳବାର ପୋଲିସ ଜଣଙ୍କୁ ଗିରଫ କରିଛି। ସେ ଜଣେ ଭାଜପା କର୍ମୀ ବୋଲି କୁହାଯାଉଛି। ସେ ହେଲେ କେଲୁଆପୁଲ୍ଲି ଓଡିଆରପି କଲୋନୀର ଆଲୋକ ନାୟକ (୨୨)। ଘଟଣା ପରଠାରୁ ଆଲୋକ ଫେରାର ଥିଲେ। କନିସି ହାଟସ୍ଥିତ ସୁବାଶିଷଙ୍କ ଘର ଉପରକୁ ଗତ ୭ ତାରିଖ ରାତିରେ କେତେ ଜଣ ଦୁର୍ବୃତ୍ତ ୨ଟି ବୋମାମାଡ଼ କରିଥିଲେ। ଏଥିପାଇଁ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଥିଲା। ଘଟଣା ପରଦିନ ସୁବାଶିଷଙ୍କ ବାପା ସୁଶାନ୍ତ ସାହୁ ଏନେଇ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ। ଫେରାର ଥିବା ଆଲୋକ ମଙ୍ଗଳବାର କଲୁଆପୁଲ୍ଲି ଗ୍ରାମରେ ଥିବା ଖବର ପାଇ ପୋଲିସ ଚଢାଉ କରି ତାଙ୍କୁ ଥାନାକୁ ଉଠାଇ ଆଣିଥିଲା। ଥାନାରେ ଅଟକ ରଖି ତାଙ୍କୁ ପଚରାଉଚରା କରିବା ପରେ ଗିରଫ କରି କୋର୍ଟଚାଲାଣ କରିଛି। ନଂ.୬୬/୨୫ରେ ଏକ ମାମଲା ରୁଜୁ ହୋଇ ଅଧିକ ତଦନ୍ତ ଚାଲିଥିବା ଥାନା ଅଧିକାରୀ ବିବେକାନନ୍ଦ ସ୍ବାଇଁ କହିଛନ୍ତି।
୭.୧୮
