ମୁମ୍ବାଇ,୩୦/୧୦: ବଲିଉଡ୍ ଅଭିନେତା ସଲମାନ ଖାନଙ୍କୁ ପୁଣି ଥରେ ହତ୍ୟା ଧମକ ମିଳିଛି। ଟ୍ରାଫିକ କଣ୍ଟ୍ରୋଲକୁ ଆସିଥିବା ଏକ ମେସେଜରେ ଜଣେ ଅଜଣା ବ୍ୟକ୍ତି ସଲମାନ ଖାନଙ୍କୁ ଧମକ ଦେଇଛନ୍ତି। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମେସେଜ ପଠାଇଥିବା ବ୍ୟକ୍ତି ୨ କୋଟି ଟଙ୍କା ନଦେଲେ ସଲମାନଙ୍କୁ ହତ୍ୟା କରାଯିବ ବୋଲି ଧମକ ଦେଇଛନ୍ତି।
ଏହି ପରିପ୍ରେକ୍ଷୀରେ ୱାର୍ଲି ପୁଲିସ ବିଏନଏସର ଧାରା ୩୫୪(୨), ୩୦୮(୪) ଅନୁଯାୟୀ ଅଜ୍ଞାତ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରିଛି।
ଏହା ପୂର୍ବରୁ ମଧ୍ୟ ସଲମାନ ଖାନଙ୍କୁ ଲଗାତାର ହତ୍ୟା ଧମକପୂର୍ଣ୍ଣ କଲ୍ ଓ ମେସେଜ ଆସୁଛି । ଧମକ ପାଇଥିବା ଅଭିଯୁକ୍ତଙ୍କୁ ନିକଟରେ ଉତ୍ତରପ୍ରଦେଶର ନୋଏଡାରୁ ଗିରଫ କରାଯାଇଥିଲା। ଅଭିଯୁକ୍ତଙ୍କୁ ଧରିବା ପାଇଁ ମୁମ୍ବାଇ ପୋଲିସ ବାନ୍ଦାରୁ ନୋଏଡାରେ ପହଞ୍ଚିଥିଲା। ଅଭିଯୁକ୍ତ ଜଣକ ହେଲେ ୨୦ ବର୍ଷୀୟ ମହମ୍ମଦ ତୈୟବ ଅନସାରୀ।
ଅନୁସନ୍ଧାନରୁ ଜଣାପଡିଛି ଯେ, ମହମ୍ମଦ ତୈୟବ ଦିଲ୍ଲୀର ବାସିନ୍ଦା । ସେ ଜିଶାନ ସିଦ୍ଦିକି ଓ ସଲମାନ ଖାନଙ୍କୁ ହତ୍ୟା ଧମକ ଦେଇଥିଲେ। ଏହି ସମୟରେ ପୋଲିସ ତାଙ୍କ ଫୋନ୍ କୁ ମଧ୍ୟ ଜବତ କରିଛି। ଯାହାର ତଦନ୍ତ ଜାରି ରହିଛି। ଅଭିଯୁକ୍ତଙ୍କ ସମ୍ପର୍କରେ ଅଧିକ ତଥ୍ୟ ମିଳିବା ପାଇଁ ପୋଲିସ ଏବେ ସେହି ଫୋନ୍ ଜରିଆରେ ସମସ୍ତ କଲ୍ ଡିଟେଲ୍ସ ବାହାର କରୁଛି।
ସେହିପରି କଳା ହରିଣ ଶିକାର ମାମଲାରେ ସଲମାନଙ୍କୁ କୁଖ୍ୟାତ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ଠାରୁ ହତ୍ୟା ଧମକ ମଧ୍ୟ ମିଳୁଛି । ଯଦି ସଲମାନ ଖାନ ବିଷ୍ନୋଇ ସମାଜର ମନ୍ଦିରକୁ ଯାଇ କ୍ଷମା ମାଗିବେ ତେବେ ତାଙ୍କୁ ମୁକ୍ତ କରାଯିବ ବୋଲି ଗ୍ୟାଙ୍ଗଷ୍ଟର କହିଛନ୍ତି। ଏହି ଧମକ ପରେ ପୁଲିସ ସଲମାନଙ୍କ ସୁରକ୍ଷା ବଢ଼ାଇ ଦେଇଥିଲା। ୧୯୯୮ ମସିହାର କଳା ହରିଣ ଶିକାର ମାମଲାରେ କୋର୍ଟ ୨୦୧୮ରେ ସଲମାନ ଖାନଙ୍କୁ ଦୋଷୀ ସାବ୍ୟସ୍ତ କରିଥିଲେ। ପରେ ତାଙ୍କୁ ଦୋଷମୁକ୍ତ କରାଯାଇଥିଲା।
