ଦିଗପହଣ୍ଡି/ପାଟପୁର,୨୯।୮(ଅଶେଷ ନାଥ ମିଶ୍ର/ସିମାଞ୍ଚଳ ସାହୁ): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ରାମଚନ୍ଦ୍ରପୁର ଗ୍ରାମ ଋଷିକୂଲ୍ୟା କେନାଲରୁ ଶୁକ୍ରବାର ସକାଳେ ଜଣେ ନାବାଳକଙ୍କ ମୃତଦେହ ଉଦ୍ଧାର କରାଯାଇଛି। ମୃତକ ଜଣଙ୍କ ହେଲେ ଶେରଗଡ଼ ଥାନା ସାଗର ପଲ୍ଲୀ ଗ୍ରାମର କୃଷ୍ଣ ନାୟକ(୧୪)। ସେ ଗୁରୁବାର ଅପରାହ୍ନରେ କେନାଲକୁ ଗାଧୋଇବାକୁ ଯାଇ ଆକସ୍ମିକ ଭାବେ ନିଖୋଜ ହୋଇଯାଇଥିଲେ। ଶେରଗଡ଼ ଅଗ୍ନିଶମ ବାହିନୀ ଏବଂ ଶେରଗଡ଼ ପୋଲିସ ଟିମ କେନାଲରେ ବହୁ ସମୟ ଧରି ଖୋଜାଖୋଜି କରିଥିଲେ ମଧ୍ୟ ତାଙ୍କ ସନ୍ଧାନ ମିଳି ନ ଥିଲା। ସକାଳେ ରାମଚନ୍ଦ୍ରପୁର ଗ୍ରାମର କିଛି ବ୍ୟକ୍ତି କେନାଲ କୁ ଗାଧୋଇବା ପାଇଁ ଯାଇଥିବା ବେଳେ ନାବାଳକଙ୍କ ମୃତଦେହ ପାଣିରେ ଭାସୁଥିବା ଦେଖି ପାଟପୁର ପୋଲିସ କୁ ଖବର ଦେଇଥିଲେ। ପୋଲିସ ଟିମ ଘଟଣାସ୍ଥଳରେ ପହଞ୍ଚି ମୃତଦେହକୁ ପାଣିରୁ ଉଦ୍ଧାର କରିବାସହ ଶେରଗଡ଼ ପୋଲିସ କୁ ଖବର ଦେଇଥିଲେ। ଶେରଗଡ଼ ପୋଲିସ ଟିମ ସେଠାରେ ପହଞ୍ଚି ମୃତଦେହ ଜବତ କରି ଅପମୃତ୍ୟୁ ମାମଲା ରୁଜୁ କରିବା ସହ ବ୍ୟବଚ୍ଛେଦ ନିମନ୍ତେ ଡାକ୍ତରଖାନାକୁ ପଠାଇଥିଲେ। ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଗାଧୋଇବା ବେଳେ ଅସାବଧାନତା କାରଣରୁ ସେ କେନାଲ ରେ ବୁଡିଯିବାରୁ ତାଙ୍କ ମୃତ୍ୟୁ ଘଟିଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି।
