ଭୁବନେଶ୍ୱର, ୪।୧ (ବ୍ୟୁରୋ): ବିଶ୍ୱକପ୍ ହକି ପାଇଁ ତତ୍ପରତା ପ୍ରକାଶ କରୁଛି ବିଏମ୍ସି। ଜାନୁୟାରୀ ୧୩ରେ ଏହା ଆରମ୍ଭ ହେବାକୁ ଥିବାବେଳେ ଆଉ ମାତ୍ର ୯ଦିନ ବାକି ରହିଛି। ଇତିମଧ୍ୟରେ ପୂରା ସହରର ରୂପରେଖ ବଦଳାଇବା ସହିତ ଜନସାଧାରଣଙ୍କୁ ହକିରେ ଅନ୍ତର୍ଭୁକ୍ତ କରିବା ପାଇଁ ଜୋର୍ଦାର ପ୍ରୟାସ କରୁଛି ବିଏମ୍ସି। ସହରର ଗଳିକନ୍ଦିରେ କିଭଳି ହକି ମାନିଆ ସୃଷ୍ଟି ହେବ ସେନେଇ ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ମଙ୍ଗଳବାର ବିଏମ୍ସି କାର୍ଯ୍ୟାଳୟରେ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ସହରର ସମସ୍ତ ମଲ, ବଡ ବଡ ରେଷ୍ଟୁରାଣ୍ଟରେ ହକି ସମ୍ପର୍କିତ ବ୍ୟାନର ଲଗାଇବା, ସେଲ୍ଫି ପଏଣ୍ଟ କରିବା ଆଦି ଉପରେ ଗୁରୁତ୍ୱାରୋପ କରାଯାଇଥିଲା। ଏହାବାଦ୍ ବିଭିନ୍ନ ଆପାର୍ଟମେଣ୍ଟ, କଲୋନୀ ଅଞ୍ଚଳକୁ ଆଲୋକୀକରଣ କରିବା, ହକି ସଂକ୍ରାନ୍ତ ସ୍ଲୋଗାନ, ବ୍ୟାନର ଲଗାଇବାକୁ ଲୋକଙ୍କୁ ସଚେତନ କରାଯିବ। କର୍ପୋରେଟରମାନେ ବୁଲି ବୁଲି ଏନେଇ ଲୋକଙ୍କୁ ବୁଝାଇବା ପାଇଁ ନିର୍ଦ୍ଦେଶ ଦିଆଯାଇଛି। ତେବେ କଲୋନୀ ଏବଂ ଆପାର୍ଟମେଣ୍ଟବାସୀଙ୍କୁ ଏଥିପାଇଁ ନିଜେ ଖର୍ଚ୍ଚ କରିବାକୁ ପଡ଼ିବ। ନିଜ ନିଜ ଅଞ୍ଚଳରେ ସୌନ୍ଦର୍ଯ୍ୟକରଣ କରି ତାହାକୁ ଫେସ୍ବୁକ୍, ଟୁଇଟର ସାହାଯ୍ୟରେ ଅପଲୋଡ୍ କରିବେ। ଏହାବାଦ୍ ଆପାର୍ଟମେଣ୍ଟ ଏବଂ କଲୋନୀ ବାସିନ୍ଦାଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା ହେବ। ମହିଳା ଓ ପିଲାଙ୍କ ମଧ୍ୟରେ ଚିିତ୍ରାଙ୍କନ, ମ୍ୟୁଜିକ୍ ଚେୟାର, ଷ୍ଟୋରୀ ଟେଲିଂ, ନୃତ୍ୟ, ଗୀତ ଆଦି ବିଭିନ୍ନ ପ୍ରତିଯୋଗିତା କରାଯିବ। ଏହାଦ୍ୱାରା ଲୋକମାନେ ହକିରେ ଅଧିକ ଜଡ଼ିତ ହୋଇପାରିବେ। ସେହିପରି ଓ୍ବାର୍ଡ ବାସିନ୍ଦାଙ୍କୁ ନେଇ ସାଇକ୍ଲୋଥନ୍, ମାରାଥନ୍ ଆଦି କରାଯିବାକୁ ବିଡିଏ ଉପାଧ୍ୟକ୍ଷ ବଲଓ୍ବନ୍ତ ସିଂହ ନିର୍ଦ୍ଦେଶ ଦେଇଥିଲେ। ବସ୍ତି, ଏସ୍ଏଚ୍ଜି ସଙ୍ଗଠନ ପାଇଁ ମଧ୍ୟ ବିଭିନ୍ନ କାର୍ଯ୍ୟକ୍ରମ କରାଯିବ। ସହରର ମୁଖ୍ୟ ରାସ୍ତାଗୁଡିକୁ ପେଣ୍ଟିଂ ଏବଂ ସୌନ୍ଦର୍ଯ୍ୟକରଣ କରାଯାଉଛି। ଅପରପକ୍ଷେ ସହରର ସମସ୍ତ ବିଦ୍ୟାଳୟରେ ଶପଥ ଗ୍ରହଣ ଉତ୍ସବ କରାଯିବ। ଘରେ କିମ୍ବା ନିଜ ଆଖପାଖରେ ଅଳିଆ ପକାଇବେ ନାହିଁ କିମ୍ବା ପକାଇବାକୁ ଦେବେନାହିଁ ବୋଲି ଏଥିରେ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ଶିକ୍ଷୟିତ୍ରୀ ଶିକ୍ଷକଙ୍କ ପର୍ଯ୍ୟନ୍ତ ସମସ୍ତେ ଶପଥ ନେବେ। ବିଭିନ୍ନ ଓ୍ବାର୍ଡରେ ଏଭଳି କାର୍ଯ୍ୟକ୍ରମ ଜାରି ରହିବ। କେବଳ ହକି ପାଇଁ ନୁହେଁ ବରଂ ଏହାପରେ ବି ଏଭଳି କାର୍ଯ୍ୟକ୍ରମ ଜାରି ରହିବ ବୋଲି ସୂଚନା ଦିଆଯାଇଛି। ଏହାବାଦ୍ ବିଏମ୍ସି ପକ୍ଷରୁ ବିଭିନ୍ନ ଓ୍ବାର୍ଡରେ ଛୋଟ ଛୋଟ ଷ୍ଟଲ କରାଯିବ। ସେଠାରେ କିଛି ଲୋକ ନିୟୋଜିତ ରହିବେ। ଛୋଟପିଲା ବା ଅନ୍ୟ କେହି ସେଠାକୁ ଯାଇ ତ୍ରିରଙ୍ଗା, ହକିର ଷ୍ଟିକର ବା ଟାଟୁ କରି ପାରିବେ। ସେହିପରି ସବୁଠାରୁ ଭଲ ପ୍ରଦର୍ଶନ କରିଥିବା ଓ୍ବାର୍ଡକୁ ବେଷ୍ଟ ଓ୍ବାର୍ଡ ଭାବେ ପୁରସ୍କୃତ କରାଯିବ ବୋଲି ସୂଚନା ଦିଆଯାଇଛି। ବୈଠକରେ ଡେପୁଟି ମେୟର ମଞ୍ଜୁଲତା କହଁର, କମିଶନର ବିଜୟ ଅମୃତା କୁଲାଙ୍ଗେ, ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ, ସୂର୍ଯ୍ୟବଂଶୀ ମୟୁର ବିକାଶ ଏବଂ ସମସ୍ତ ଓ୍ବାର୍ଡର କର୍ପୋରେଟର ଉପସ୍ଥିତ ଥିଲେ।
