ପଟ୍ଟାମୁଣ୍ଡାଇ, ୪ା୧୧(ସ୍ବ.ପ୍ର.):କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ କଲୋନୀ ଶିଶୁଉଦ୍ୟାନ ମଧ୍ୟରୁ ୧୬ ଦିନ ତଳେ ବେଆଇନ ଭାବେ ୫ଟି ମୂଲ୍ୟବାନ ବଡ ଶିଶୁ ଗଛ କଟାଯାଇଥିଲା। ଗଛ କାଠଗଡ ସବୁ ଉଦ୍ୟାନ ମଧ୍ୟରେ ପଡି ରହିଥିଲା। ବୁଧବାରଠାରୁ ଏହି ଗଛ କାଠଗଡ ସବୁ ଗାଏବ୍ ହୋଇଯାଇଛି। ଗଛ କିଏ କାଟିଲା ଓ କଟା ଗଛ କିଏ ନେଲା, ତା’ର ହିସାବ କାହା ପାଖରେ ନାହିଁ। ଏ ବାବଦରେ ବନ ବିଭାଗ କିଛି ଜାଣିନି କି ରାଜସ୍ବ ବିଭାଗ ପାଖରେ କଟା ଗଛ ସବୁର ହିସାବ ନାହିଁ। ଦିନ ଦ୍ୱିପହରେ ଏତେ ଗଛ କାଟି କିଏ କୁଆଡ଼େ ନେଲା, ତାହା ବଡ଼ ପ୍ରଶ୍ନବାଚୀହୋଇ ଉଭା ହୋଇଛି।
ପରିବେଶବିତ୍ ସେକ୍ ଚାନ୍ଦ କହିଛନ୍ତି, ବିଶ୍ୱ ତାପାୟନ ବୃଦ୍ଧି ପାଉଥିବାବେଳେ ବୃକ୍ଷରୋପଣ ଉପରେ ଏବେ ସବୁଠି ଗୁରୁତ୍ୱ ଦିଆଯାଉଛି। ସାମାଜିକ ବନୀକରଣଠାରୁ ଆରମ୍ଭ କରି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) ଜରିଆରେ ଅର୍ଥ ବ୍ୟୟ କରାଯାଇ ବୃକ୍ଷରୋପଣ କରାଯାଉଛି। ବିଶ୍ୱ ପରିବେଶ ଦିବସ ମଧ୍ୟ ସ୍ବତନ୍ତ୍ର ଭାବେ ପାଳିତ ହୋଇ ବ୍ୟାପକ ବୃକ୍ଷରୋପଣ ହେଉଛି। ବୃକ୍ଷରୋପଣ ପାଇଁ ବନ ବିଭାଗ ପକ୍ଷରୁ ସମସ୍ତ ପ୍ରକାର ବୈଷୟିକ ସହାୟତା ଯୋଗାଇ ଦିଆଯାଉଛି। କିନ୍ତୁ ଏ ସମସ୍ତ ବ୍ୟବସ୍ଥା ମଧ୍ୟରେ ପୌର ପରିଷଦ ଶିଶୁ ଉଦ୍ୟାନ ଭିତରେ ଥିବା ମୂଲ୍ୟବାନ ୫ଟି ବଡ ଶିଶୁ ଗଛ ଗାଏବ ହବା ଘଟଣା ନେଇ ବିଭାଗୀୟ ଅଧିକାରୀ ଆଖି ବୁଜି ଦେବା ସହ ନୀରବତା ଅବଲମ୍ବନ କରୁଛନ୍ତି। ଯାହାକି ପରୋକ୍ଷରେ ବିଭାଗୀୟ ଉଦାସୀନତା କିମ୍ବା ଅଭିଯୁକ୍ତଙ୍କ ପ୍ରତି ଅନୁକମ୍ପା ଦେଖାଉଥିବା ସ୍ପଷ୍ଟ ବାରି ହୋଇପଡୁଛି। ପରିବେଶବିତ ତପନ ନନ୍ଦୀ କହିଛନ୍ତି, ବିଡ଼ମ୍ବନାର ବିଷୟ ଯେ ବନ ବିଭାଗ ହେଉ କି ରାଜସ୍ବ ବିଭାଗ ୫ଟି ମୂଲ୍ୟବାନ ଶିଶୁ ଗଛ କାଟି କିଏ କୁଆଡ଼େ ନେଇଗଲା, କେହି ଜାଣିପାରିଲେ ନାହିଁ। ତେଣୁ ରାଜ୍ୟ ସରକାରଙ୍କ ବିଭାଗଗୁଡ଼ିକ ମଧ୍ୟରେ ସମନ୍ବୟ ନ ଥିବା ଏଥିରୁ ସ୍ପଷ୍ଟ ବାରି ହୋଇପଡୁଛି। ଏବେ ଏହା ପରିବେଶବିତ୍ମାନଙ୍କୁ ବ୍ୟଥିତ କରିଛି। ଗଛ ଗାଏବ ହେବା ପଛରେ ଅସାଧୁ ସରକାରୀ କର୍ମଚାରୀମାନଙ୍କ ହାତ ରହିଛି। ଏ ବାବଦରେ ଏକ ଉଚ୍ଚସ୍ତରୀୟ ତଦନ୍ତ ହେବା ଉଚିତ ବୋଲି ସେ କହିଛନ୍ତି। ପ୍ରକାଶଥାଉକି, ଅକ୍ଟୋବାର ୨୨ ତାରିଖରେ କେତେଜଣ ଦୁର୍ବୃତ୍ତ ୫ଟି ବଡ ଶିଶୁ ଗଛକୁ କାଟି ଦେଇଥିଲେ। ଏ ସମ୍ପର୍କରେ କେତେଜଣ ସାମାଜିକ କର୍ମୀ ବନ ବିଭାଗ ଅଧିକାରୀଙ୍କୁ ଜଣାଇଥିଲେ। ଏହାପରେ ମହାକାଳପଡ଼ା ଫରେଷ୍ଟର ମହନ୍ତ କୁମାର ମଲିକ ଘଟଣାସ୍ଥଳରେ ପହଞ୍ଚତ୍ ବେଆଇନ ଭାବେ କଟାଯାଇଥିବା ଗଛକଟା ସ୍ଥାନରୁ ଫଟୋ ନେଇଥିଲେ। ଗଛ କାଟୁଥିବା ଲୋକଙ୍କୁ ଗୋଡାଇବା ସହ କରତ ଛଡାଇ ରଖିଥିଲେ। କଟା ଯାଇଥିବା ଶିଶୁ ଗଛକୁ ଜବତ କରି ଉଦ୍ୟାନ ଭିତରେ ରଖିଥିଲେ। ତେବେ ଇତିମଧ୍ୟରେ ୧୬ଦିନ ବିତିଯାଇଥିବା ବେଳେ ଗଛ କାଠଗଡ ସବୁ ଗାଏବ ହୋଇଯାଇଛି। କିନ୍ତୁ ବନ ବିଭାଗ ପକ୍ଷରୁ ଏଯାବତ୍ ମାମଲା ରୁଜୁ ହୋଇ ନ ଥିବା ଜଣାପଡିଛି। ଏ ସମ୍ପର୍କରେ ବିଭାଗୀୟ ଅଫିସର ଚିତ୍ତରଞ୍ଜନ ବେଉରାଙ୍କୁ ପଚାରିବାରେ ଅବଗତ ଥିବା କହିଛନ୍ତି। ମାତ୍ର ଏହା ରାଜସ୍ବ ବିଭାଗ ଅଧୀନରେ ଆସୁଛି ବୋଲି କହିଥିଲେ। ତଥାପି ଏହାକୁ କାଟିବା ଓ ଚାଲାଣ ପୂର୍ବରୁ ବିଭାଗୀୟ ଅନୁମତି ଆବଶ୍ୟକତା ରହିଛି। ମାତ୍ର ତାହା ସେମାନେ କାଟିବା ପରେ ନେଇଛନ୍ତି ବୋଲି ସେ କହିଥିଲେ।
