ନୂଆଦିଲ୍ଲୀ,୨୫ ।୩: ଗୁଜରାଟର ସୁରଟ କୋର୍ଟରୁ ଆପରାଧିକ ମାନହାନୀ ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସଜା ମିଳିବା ପରେ ତାଙ୍କ ସଂସଦ ସଦସ୍ୟତା ରଦ୍ଦ ହୋଇଯାଇଛି । ଏହାପରଠାରୁ କଂଗ୍ରେସ ଓ ଭାରତୀୟ ଜନତା ପାର୍ଟି(ଭାଜପା) ସାମ୍ନାସାମ୍ନି ହୋଇଛନ୍ତି । ସଂସଦସ ସଦସ୍ୟତା ରଦ୍ଦ ହେବାପରେ ଶନିବାର ରାହୁଲ ଗାନ୍ଧୀ ପ୍ରଥମଥର ମିଡିଆ ସାମ୍ନାକୁ ଆସିଥିଲେ । ଏହି ସମୟରେ ସେ ଭାଜପାକୁ ଟାର୍ଗେଟ କରିଥିଲେ ।
ଏହାର ଜବାବରେ ବରିଷ୍ଠ ଭାଜପା ନେତା ରବି ଶଙ୍କର ପ୍ରସାଦ ଏକ ପ୍ରେସ କନଫରେନ୍ସ କରି କହିଛନ୍ତି ରହୁଲଙ୍କ ଉପରେ ୬୦ଟି ମାନହାନି ମାମଲା ଚାଲିଛି । ସେ ପଛୁଆ ବର୍ଗଙ୍କ ଅପମାନ କରିଛନ୍ତି । ଆଲୋଚନାର ଅର୍ଥ ଗାଳି ଦେବା ନୁହେଁ । ରାହୁଲ ଗାନ୍ଧୀଙ୍କୁ ୨୦୧୯ରେ ଦେଇଥିବା ଏକ ଭାଷଣ ଉପରେ ସଜା ହୋଇଛି । ରବିଶଙ୍କର ପ୍ରସାଦ ଆହୁରି ମଧ୍ୟ କହିଛନ୍ତି, ରାହୁଲ ଗାନ୍ଧୀ କହୁଛନ୍ତି ମୁଁ ବୁଝିସୁଝି କହିଥାଏ । ହେଲେ ରାହୁଲ ୨୦୧୯ରେ ଯାହା କହିଥିଲେ ତାହା କ’ଣ ବୁଝି ସୁଝି କହିଥିଲେ । ଯେଉଁଥିରେ ସେ ପଛୁଆବର୍ଗର ଅପମାନ କରିଥିଲେ ।
