ନୂଆଦିଲ୍ଲୀ,୨୬।୫: କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାରତୀୟ ଜନତା ପାର୍ଟି(ଭାଜପା) ସରକାରର ୯ ବର୍ଷ ପୂରଣ ହେବା ପରେ କଂଗ୍ରେସ ୯ଟି ପ୍ରଶ୍ନ କରିଛି। ଏହି ପ୍ରଶ୍ନର ଉତ୍ତର ଭାଜପା ଏମପି ତଥା ପୂର୍ବତନ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ ଦେଇଛନ୍ତି। ସେ କହିଛନ୍ତି କଂଗ୍ରେସ ଯେଉଁ ୯ଟି ପ୍ରଶ୍ନ ପଚାରିଛି ତାହା ମିଥ୍ୟା। ଏହା କଂଗ୍ରେସର ଲଜ୍ୟାର ପରାକାଷ୍ଠା।
ସାମ୍ବାଦିକ ସମ୍ମିଳନୀରେ ସେ ଆହୁରି କହିଛନ୍ତି, ତୁମେ ସମାଲୋଚନା କର, କିନ୍ତୁ ସମାଲୋଚନାରେ, ଦେଶ ଭିତରେ ଥିବା ସଂକଳ୍ପକୁ ଦୁର୍ବଳ କର ନାହିଁ, ଏହା ଏକ ବଡ଼ ଅପମାନ ଓ ସେହି ଲକ୍ଷ ଲକ୍ଷ ସେବା କର୍ମଚାରୀ, ଡାକ୍ତର, ନର୍ସ, ସଫେଇ କର୍ମଚାରୀ, ଆମ୍ବୁଲାନ୍ସ ଡ୍ରାଇଭରଙ୍କର ଅପମାନ କରନାହିଁ। ଯେଉଁମାନେ କୋଭିଡ ଯୁଗରେ ଦେଶକୁ ବଞ୍ଚାଇବାକୁ ଚେଷ୍ଟା କରିଥିଲେ। ପୂର୍ବତନ କେନ୍ଦ୍ର ମନ୍ତ୍ରୀ ଆହୁରି କହିଛନ୍ତି, ଆଜି ଦେଶ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତିରେ ପରିଣତ ହୋଇଛି। ଆଜି ୧୬ ହଜାର କୋଟି ଟଙ୍କା ମୂଲ୍ୟର ପ୍ରତିରକ୍ଷା ରପ୍ତାନି କରାଯାଉଛି। ମୋବାଇଲ ଉତ୍ପାଦନରେ ଭାରତ ବିଶ୍ୱର ଦ୍ୱିତୀୟ ବୃହତ୍ତମ ଉତ୍ପାଦକ ହୋଇପାରିଛି। ଭାରତରେ ଡିଜିଟାଲ ପେମେଣ୍ଟର ଆକଳନ ହେଉଛି ୧୦ ବିଲିୟନ ଡଲାର। ଆଜି ବିକାଶର ପ୍ରତ୍ୟେକ କ୍ଷେତ୍ରରେ ଭାରତ ଦ୍ରୁତ ଗତିରେ ଗତି କରୁଛି। ଯଦି କଂଗ୍ରେସ ଏସବୁ ଦେଖେ ନାହିଁ, ତେବେ କେହି କ’ଣ କରିପାରିବେ।
