ନୂଆପଡା,୩୧।୧୦:ରାଜ୍ୟ ଭାଜପା ପ୍ରଭାରୀ ବିଜୟ ପାଲ ସିଂ ତୋମାରଙ୍କ ବଡ଼ ବୟାନ । କହିଲେ, ନବୀନ ମୈଦାନକୁ ଓହ୍ଲାଇଲେ କିଛି ବି ଫରକ ପଡ଼ିବ ନାହିଁ । ଭାଜପାର ନୂଆପଡ଼ା ବିଜୟ ସୁନିଶ୍ଚିତ । ଏପଟେ ଅରୁଣ ସାହୁଙ୍କ କାଉଣ୍ଟର । ନବୀନଙ୍କ ନାଁ ଶୁଣି ଭୟଭୀତ ଭାଜପା । କରିସ୍ମା କରିବ ବିଜେଡି ।
ନୂଆପଡ଼ାରେ ପ୍ରଚାର ମୈଦାନକୁ ଓହ୍ଲାଇବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଏହାକୁ ନେଇ ପ୍ରତିକ୍ରିୟା ରଖିଛନ୍ତି ରାଜ୍ୟ ଭାଜପା ପ୍ରଭାରୀ ବିଜୟ ପାଲ ସିଂ ତୋମାର । ସେ କହିଛନ୍ତି, ନବୀନ ପଟ୍ଟନାୟକ ନିଜ ନିର୍ବାଚନମଣ୍ଡଳୀରେ ହାରିଛନ୍ତି । ଯିଏ ଆସିଲେ ଆସନ୍ତୁ, କିଛି ବି ଫରକ ପଡ଼ିବ ନାହିଁ । ଭାଜପା ମାଇକ୍ରୋ ମ୍ୟାନେଜମେଣ୍ଟ କରିଛି । ଭାଜପା ପ୍ରାର୍ଥୀଙ୍କ ଏକତରଫା ବିଜୟ ସୁନିଶ୍ଚିତ ବୋଲି ତୋମାର କହିଛନ୍ତି । ଜବାବରେ ବିଜେଡି ବିଧାୟକ ଅରୁଣ ସାହୁ କହିଛନ୍ତି, ନବୀନ ନୂଆପଡ଼଼ା ଆସିବା ଶୁଣି ଏବେ ଭୟଭୀତ ଭାଜପା । ନବୀନ ଭିସିରେ ପ୍ରତି ପଞ୍ଚାୟତର ଲୋକଙ୍କ ସହ କଥା ହେଉଛନ୍ତି। ନବୀନ ଆସିବା ପରେ ବିଜେଡିର ଏକତରଫା ବିଜୟ ହେବ । ପ୍ରଚାର , ପ୍ରଭାବ ଓ ଲୋକଙ୍କ ଭଲ ପାଇବରେ ବିଜେଡି ଆଗରେ ରହିଛି । ସେପଟେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ନବୀନ ବାବୁ ନବୀନ ନିବାସରୁ ବାହାରନ୍ତୁ । ବିରୋଧୀ ଶକ୍ତିଶାଳୀ ହେଲେ, ନବୀନ ବାବୁ ମୈଦାନକୁ ଓହ୍ଲାଇବାକୁ ସୁଯୋଗ ମିଳିବ। ଏହା ଆମକୁ କାମ କରିବାକୁ ପ୍ରେରଣା ଯୋଗାଇବ ବୋଲି ଲଘୁ ମନ୍ତବ୍ୟ ଦେଇଛନ୍ତି ସୁରେଶ ।
Dharitri – Odisha’s No.1 Trusted Odia Daily
