ଭୁବନେଶ୍ୱର,୨୬।୧(ବ୍ୟୁରୋ): ଆସନ୍ତା ୨୯ ତାରିଖରୁ ପାର୍ଲାମେଣ୍ଟର ବଜେଟ ଅଧିବେଶନ ଆରମ୍ଭ ହେବାକୁ ଯାଉଛି। ଏହି ଅଧିବେଶନରେ ବିଜୁ ଜନତା ଦଳ(ବିଜେଡି) ରାଜ୍ୟ ସ୍ବାର୍ଥ ସମ୍ବଳିତ ୧୩ ପ୍ରସଙ୍ଗ ଉଠାଇବ। ସୋମବାର ଭିଡିଓ କନ୍ଫରେନ୍ସ ଜରିଆରେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବିଜେଡି ସଂସଦୀୟ ଦଳ ବୈଠକରେ ଏହି ନିଷ୍ପତ୍ତି ହୋଇଛି। ନବୀନ ନିବାସରୁ ମୁଖ୍ୟମନ୍ତ୍ରୀ ଭିଡିଓ କନ୍ଫରେନ୍ସରେ ନୂଆଦିଲ୍ଲୀରେ ଥିବା ୯ଜଣ ଏମ୍ପିଙ୍କ ସହ ଆଲୋଚନା କରିଥିଲେ।
ପୁରୀଠାରେ ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନ ବନ୍ଦର ସ୍ଥାପନ କରିବାକୁ ନିକଟରେ ମୁଖ୍ୟମନ୍ତ୍ରୀ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀଙ୍କୁ ଚିଠି ଲେଖିଥିଲେ। ଆସନ୍ତା ଅଧିବେଶନରେ ଏହି ପ୍ରସଙ୍ଗକୁ ଦଳ ଉଠାଇବ। ସେହିପରି ରାଜ୍ୟରେ ରେଲଓ୍ବେ ୩୦୦ରୁ ଊର୍ଦ୍ଧ୍ୱ ଷ୍ଟପେଜ୍କୁ ଉଠାଇ ଦେଇଛି। ରାଜ୍ୟ ସରକାର ଖୋର୍ଦ୍ଧା-ବଲାଙ୍ଗୀର ଏବଂ ଅନ୍ୟାନ୍ୟ ରେଳ ପ୍ରକଳ୍ପ ପାଇଁ ମାଗଣାରେ ଜମି ଯୋଗାଇ ଦେବା ସହ ପ୍ରକଳ୍ପ ଖର୍ଚ୍ଚର ୫୦ ପ୍ରତିଶତ ଯୋଗାଇ ଦେଇଛନ୍ତି। ଏହା ସତ୍ତ୍ୱେ ପ୍ରକଳ୍ପ କାର୍ଯ୍ୟ ଆଶାନୁରୂପ ଭାବେ ଅଗ୍ରଗତି କରୁନାହିଁ। କେନ୍ଦ୍ରାପଡ଼ା ଓ ଅନୁଗୋଳ-ସୁକିନ୍ଦା ରେଳ ପ୍ରକଳ୍ପରେ ଯାତ୍ରୀବାହୀ ଟ୍ରେନ୍ ଚଳାଇବା, କଳାହାଣ୍ଡି ଜିଲାର ସୀତାପଲ୍ଲୀଠାରେ ଓ୍ବାଗନ ଫ୍ୟାକ୍ଟ୍ରି ଓ ଇଲେକ୍ଟ୍ରିକ୍ ଲୋକୋମୋଟିଭ ମେଣ୍ଟେନାନ୍ସ ଓ୍ବାର୍କଶପ୍ କାର୍ଯ୍ୟରେ ବିଳମ୍ବ ଆଦି ପ୍ରସଙ୍ଗକୁ ପାର୍ଲାମେଣ୍ଟରେ ଉଠାଇବାକୁ ମୁଖ୍ୟମନ୍ତ୍ରୀ ଦଳୀୟ ଏମ୍ପିମାନଙ୍କୁ ପରାମର୍ଶ ଦେଇଛନ୍ତି। ଏଥିସହିତ ସମ୍ବିଧାନର ଅଷ୍ଟମ ପରିଚ୍ଛଦରେ ହୋ, କୋଶଳୀ ଓ ସମ୍ବଲପୁରୀ ଭାଷାକୁ ସାମିଲ କରିବା, ପାର୍ଲାମେଣ୍ଟରେ ୩୩ ପ୍ରତିଶତ ମହିଳାଙ୍କ ପାଇଁ ସ୍ଥାନ ସଂରକ୍ଷଣ କରିବା, ସ୍ବାମୀନାଥନ କମିଟି ରିପୋର୍ଟ ଅନୁଯାୟୀ ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି) ପ୍ରଦାନ କରିବା ବିଷୟକୁ ବିଜେଡି ଜୋରଦାର ଉଠାଇବାକୁ ନିଷ୍ପତ୍ତି ନେଇଛି। ସେହିପରି ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ପ୍ରସଙ୍ଗ ବିଜେଡି ପୁଣି ଥରେ ପାର୍ଲାମେଣ୍ଟରେ ଉତ୍ଥାପନ କରିବ। ପ୍ରାକୃତିକ ବିପର୍ଯ୍ୟୟପ୍ରବଣ ରାଜ୍ୟ ହୋଇଥିବାରୁ ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ସହ ସ୍ବତନ୍ତ୍ର ଆର୍ଥିକ ପ୍ୟାକେଜ ଦେବାକୁ ଦଳ ପକ୍ଷରୁ ଦାବି କରାଯିବ। ସମ୍ବିଧାନରେ ଅହିଂସାକୁ ସାମିଲ କରିବା, ରେଳ, ବ୍ୟାଙ୍କିଂ, ଟେଲି ଯୋଗାଯୋଗ, କୋଇଲା ରୟାଲଟି, କ୍ଲିନ୍ ଏନର୍ଜୀ ସେସ୍, ଉପକୂଳ ରାଜପଥ ନିର୍ମାଣ ଆଦି ପ୍ରସଙ୍ଗ ମଧ୍ୟ ଅଧିବେଶନରେ ବିଜେଡି ଉଠାଇବ। ଏହାଛଡ଼ା ବିଧାନ ପରିଷଦ ଗଠନ ଏବଂ କେନ୍ଦୁପତ୍ର ଉପରୁ ଦ୍ରବ୍ୟ ଓ ସେବା ଟିକସ(ଜିଏସ୍ଟି) ୧୦ରୁ ୫ ପ୍ରତିଶତକୁ ହ୍ରାସ କରିବାକୁ ଦଳ ପକ୍ଷରୁ ଦାବି କରାଯିବ ବୋଲି ସୂଚନା ଦିଆଯାଇଛି।
